خطيبي معقد نفسيا وخنقني

أنا مخطوبة بقالي 6 شهور، خطيبي قعد معايا 3 شهور وسافر قطر، أنا اتظلمت كتير في حياتي ولما اتخطبت كان نفسي هو يعوّضني عن كل حاجة، بس للأسف والله هو ظلمني أكتر لدرجة إني دخلت في حالة نفسية.
أنا في كلية تربية وهو دبلوم.. أنا مش بابص لحاجة زي دي وعمري ما قلت له كده، بس هو شايف إن فلوسه هتعوض حاجة زي دي.
دايما يزعق لي على أقل حاجة، دايما يغلط وممكن يسيبني بالأسبوع مايكلمنيش، وأفضل أبعت له رسايل أصالحه ومايكلمنيش لحد ما أنا أتصل بيه.
كل أما أزعل منه وأستنى يقول لي أنا آسف، مش عارفة إزاي يطلعني أنا اللي غلطانة، لحد ما أقول له أنا آسفة، وكل اللي أحكي له يقول لي هو مش عايزك وبيعمل كده علشان تسيبيه إنتي.
إمبارح كنا بنتكلم على النت فقال لي أنا باقعد أقول لنفسي إنك مش حلوة، وكان فيه ألف واحدة أحسن منك، ومش عارف إيه اللي غصبني عليكي، بس بارجع أقول لا.. قلت له يعني أنا وحشة؟ قعد يزعق ويقول لي إنتي مخك تعبان، وبتعملي أفلام، وقال لي أنا غلطان إني باكلمك كل يوم.. أنا هاكلمك كل أسبوع.
أنا بقى مخنوقة أوي، وفيه حاجات كتير بتحصل بس أنا باعدّي، بس خلاص أنا مش قادرة لأنه معقد، وعايز يقلل ثقتي في نفسي علشان ماحسش إني أحسن منه.. على فكرة هو برج الأسد، وولا حاجة تنطبق عليه.

Love


صديقتنا العزيزة.. فترة الخطوبة اتعملت علشان كده، علشان تعرفي الشخص اللي هتعيشي معاه طول عمرك وتفهميه، ولو زي ما بتقولي هو معقد من فكرة عدم التكافؤ العلمي بينكم يبقى لازم تفكري مرة تانية.
أنا فاهمة طبعا إن ممكن البنت تتخطب لحد أقل منها علشان ممكن تكون اتأخرت في السن أو إنها بتحبه مثلا، بس التكافؤ بين الزوجين مهم جدا، وأحيانا بيكون تفوّق الزوج أفضل، لأن مجتمعنا مجتمع ذكوري والأبناء أكتر بينتسبوا للأب، زائد إن شخصية معقدة وعندها إحساس بالنقص بالشكل ده مستحيل يخليكي تشتغلي أو تحققي نفسك، وبكده إنتي ممكن تبقي بعد فترة مجرد ماكينة للجنس والإنجاب، وطبعا هتفتقدي الحوار والتفاهم ما بينكم، واللي واضح إنه مش موجود من دلوقتي بدليل إنكم مش قادرين تتواصلوا.
صديقتي.. ما تسيبيهوش يعقدك؛ مافيش بنت حلوة وبنت وحشة، كل البنات حلوين لأن الجمال نسبي كل واحد بيشوفه بطريقته، والوحشة هي اللي مش بتعرف تظهر جمالها، بس جمالك مش لازم يكون السبب الوحيد لاختياره ليكي، لازم الرجل يحترم مراته وعقلها ويعرف إن الفلوس مش كل حاجة لأنه مش بيشتري جارية، وإنتي مش هتكوني خدامة يأجرك بالفلوس، إنتي هتكوني شريكة في الحياة.
أنا رأيي إنك تفكري تاني، وصدقيني الجواز قسمة ونصيب، وماتخافيش خليكي واثقة في اختيار ربنا ليكي، وإنه دايما هيختار لك الخير حتى لو بعيد عن خطيبك ده، حاولي تعيدي تفكير وتقييم لشخصيته ولعلاقتك بيه، وتفكري هي المشاكل اللي بينكم سببها البعد ولا هي مشاكل أصيلة وكانت موجودة خلال الثلاث شهور الأولى من خطوبتكم.
لأن أحيانا البعد بيخلق مشاكل من النوع ده وبيكون الخلافات سببها الأكبر هو أنكم مفتقدين بعض، وفي عقلك الباطن بتلومي عليه طول الوقت سفره وبُعده عنك، وهو كمان بيكون حاسس بالذنب ومش بيقدر يعالج ده غير بإنه يبعد أو يزعق لك أو يلوم عليكي زي ما بتلومي عليه.
لازم تفهمي السبب الحقيقي وراء خلافكم، هل هو سبب جوهري ممكن يعمل لك مشاكل طول حياتك معاه ولا هو مجرد سبب عارض بسبب سفره وبعده؟ وهل سفره ده مؤقت أو حتى إنتم مخططين تكونوا سوا بعد الجواز ولا سفره ده ممكن يستمر ويسيبك بعد كده إنتي والأولاد زي ما فيه ناس كتير بتعمل؟!
القضية قضية عُمر ومستقبل يا صديقتي تستحق التفكير الكثير والصبر، مش تحليل أبراج وخلاف على نتكلم كل يوم ولا كل أسبوع، الخلاف على إحنا هنعيش مع بعض طول العمر وهنتفاهم ولا مش هنقدر.. حاولي تفكري كتير وتقرري وربنا معاكي.

لو عايز تفضفض لنا دوس هنا