فتة لبناني بالباذنجان وقطايف بالقشطة في عزومة 29 رمضان

أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ما تتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور..
على سفرة النهارده هيكون موجود عصير الخوخ بالزبادي وسلطة الطماطم والذرة وشوربة الخضار والمشروم وفتة لبنانى بالباذنجان وقطايف بالقشطة..
**************

عصير الخوخ بالزبادي
عصير الخوخ بالزبادي
المقادير:
6 ثمرة خوخ مقشّر ومخلي
2 ملعقة كبيرة عسل نحل
2 كوب زبادي
الطريقة:
اضربي كل المكونات كويس في الخلاط وبعدين صبّي العصير فى كاسات التقديم وممكن تقطّعي مكعبات خوخ صغيرة في الكاسات مع العصير.
**************

سلطة الطماطم والذرة
سلطة الطماطم والذرة
المقادير:
علبة ذرة جاهزة من السوبر ماركت
3 ثمرة طماطم مقطّعة مكعبات
بصلة متوسطة مقطّعة حلقات
3 ملعقة كبيرة زيت زيتون
1⁄4 كوب ريحان أخضر
ملعقة كبيرة خل أبيض
ملح
الطريقة:
هاتي طبق غويط وحطّي فيه الطماطم والبصل والذرة والريحان وقلّبيهم مع بعض كويس، وبعدين ضيفى الخل وزيت الزيتون والملح، وبكده تبقي عملتي سلطة جديدة صحية وشهية.
**************


شوربة الخضار والمشروم
شوربة الخضار والمشروم
المقادير:
1⁄4 كيلو مشروم مقطّع شرائح
2 ثمرة جزر مقطّعة مكعبات صغيرة
3 ملعقة كبيرة صلصة طماطم
2 كوب ميه أو شوربة
فص ثوم كبير مفروم
حزمة كرفس مفرومة
بصلة كبيرة مفرومة
معلقة صغيرة خل
ملعقة كبيرة زبدة
ورقة لاورا
ملح وفلفل
الطريقة:
1- سيّحي الزبدة على النار وشوّحي فيها الثوم والبصل لحد ما لونهم يصفرّ.
2- ضيفي عليهم المشروم وصلصة الطماطم والطماطم المقطّعة والكرفس وورقة اللاورا وشوّحيهم على النار لحد ما الخضار يدبل، وبعدين ضيفي عليهم الميه أو الشوربة وسيبيهم لمدة 30 دقيقة تقريبا.
3- شيلي ورقة اللاورا وبعدين ضيفي الخل والملح والفلفل وسيبيهم تاني علي النار لمدة 10 دقايق، وبعد كده تبقى الشوربة جاهزة للتقديم.
**************

فتة لبناني بالباذنجان
فتة لبناني بالباذنجان
المقادير:
1⁄2 كيلو لحمة مفرومة
كيلو إلا ربع باذنجان رومي
ملعقة كبيرة نعناع أخضر مفروم
1⁄4 كوب ميه أو شوربة
ثمرة بصل كبيرة مفرومة
3 رغيف عيش شامي
4 فص ثوم مفروم
ملعقة كبيرة زبدة
زيت نباتي للقلي
2 كوب زبادي
ملح وفلفل
الطريقة:
1- قطّعي الباذنجان حلقات سميكة وانقعيه في ميه وملح، وبعد كده اقليه في الزيت وبعدين طلّعيه على مناديل ورقية وسيبيه يتصفّى.
2- قطّعي العيش مربعات صغيرة وحمرّيه في زيت القلي لحد ما يتحمّر، وبعدين افرديه على مناديل ورقية وسيبيه.
3- شوّحي البصل والثوم في طاسة وبعدين ضيفي عليهم نصف كمية الباذنجان وقلّبيهم لمدة 5 دقائق،وبعدين شيليهم من على النار وحطّي مكانهم اللحمة المفرومة لحد ما لونها يبدأ يتغير وبعد كده تبّليها بالملح والفلفل، وبعدين ضيفي عليها خليط البصل والثوم والباذنجان مرة تانية وقلّبيهم مع بعض.
4- افردي العيش المحمر في طاجن الفرن، وبعدين رصي فوقة النصف المتبقي من الباذنجان المقلي، وبعدين افردي فوقيهم خليط اللحمة المفرومة والباذنجان.
5- قلّبي النعناع مع الزبادي في طبق منفصل وخفّفيه بالميه أو الشوربة، وبعدين صبي الخليط ده على الطاجن.
6- دخّلي الطاجن في الفرن على نار متوسطة لمدة من 15 : 20 دقيقة، وبعدين خرّجيه وبكده تبقى فتة الباذنجان جاهزة للتقديم.
**************

قطايف بالقشطة
قطايف بالقشطة
المقادير:
1⁄2 كيلو قطايف
1⁄2 كوب فستق مفروم للتزيين
2 ملعقة كبيرة خل
1⁄2 كوب قشطة
2 كوب لبن
الطريقة:
1- اقفلي عجينة القطايف على شكل طبق صغير، وحمّريه في الزيت لحد ما يبقى لونها ذهبي، وبعد كده طلّعيها على مناديل ورقية علشان تشرب الزيت منها.
2- حطّي اللبن على النار لحد ما يسخن، وبعد كده ضيفي عليه الخل وقلّبيه لغاية ما تحسّي إن اللبن بقى فيه كتل وإن الميه انفصلت عنه، وبعد كده ارفعيه من على النار وحطّيه في مصفاة علشان ينزّل الميه اللي فيه.
3- اخلطي اللبن المضاف عليه الخل مع القشطة وقلّبيهم كويس مع بعض لغاية ما يتجانسوا تماما، ويبقى الخليط معاكي ناعم وعامل زي الكريمة.
4- حطّي في كل طبق من أطباق قطايف ملعقة من الكريمة اللي جهّزتيها، وزيّنيها بالفستق المفروم، وبعد كده اسقيها بالشربات، وقدّميها.
5- لتحضير الشربات؛ اغلي كوب ميه مع كوب سكر على النار، وضيفي عليهم عصير نصف ليمونة وسيبيهم على النار لغاية ما الشربات يتقل وبعد كده ارفعيه من على النار وسيبيه يبرد.

وبكده خلصت عزومة النهارده..
استنونا مع وصفات العيد كل يوم..
وكل سنة وإنتم طيبين،،،