كل سنة وأنتم طيبين، بكره هنحتفل كلنا برأس السنة الهجرية؛ وعلشان كده على "سفرة دايمة" هنقدّم لك عزومة شهية تقدّميها لأسرتك في اليوم ده، وعزومتنا النهارده هتكون مكوّنة من: شوربة لسان العصفور بكبد البط، وبط بالبرتقال، وجلاش بالرز والكبدة، وطاجن رز معمر. بط بالبرتقال المقادير: بطة 2 ملعقة كبيرة دقيق 2 ملعقة كبيرة خل زعتر ,روزماري ملعقة كبيرة عسل أبيض 1/ 2 كوب زيت ملح وفلفل لعمل الحشو: 2 ملعقة كبيرة زبدة وزيت 2 حبة بصل 2 حبة جزر 2 حبة برتقال كوب عصير برتقال 2 ملعقة كبيرة صويا صوص الطريقة: 1- بعد ما تغسلي البطة كويس شرّحيها بالسكينة تشريحات رفيعة، وابدئي تبّليها بالخل والدقيق والملح والفلفل والزعتر والروزماري والعسل، وادعكيها كويس أوي من جوه وبره، وحاولي توّصلي التتبيلة في البطة كلها. 2- بعد كده ادعكيها بالزيت من كل الجوانب، وبعدين حطّي البطة على الجريل أو في طاسة مدهونة زيت، وشوّحيها تشويحة بسيطة؛ علشان تقفلي مسام البطة. 3- بعد كده ابدئي اعملي الحشوة: قطّعي البصل شرايح رفيعة، وحطّيه في الزيت والزبدة، وشوحيه شوية لحد ما يدبل، وبعدين ابشري الجزر خشن، وحطّيه مع البصل يتشوح. 4- قطعي البرتقال شرايح رفيعة وحطّيها مع البصل، وحطّي معاها الزعتر وعصير البرتقال والصويا صوص، وقلبي الخليط كويس لحد ما المكونات تتداخل. 5- بعد كده احشي البطة من جوه بالحشوة اللي جهزتيها، وحطّيها في صينية وتكوني مقطعة فيها البوكيه جارنيه (جزر وبصل وكرفس وبقدونس)، وبعدين صبّي السائل المتبقي من الحشوة على البطة، واسقي البوكيه جارنيه بكمية بسيطة من الشوربة. 6- غطّي الصينية بورق فويل، ودخليها فرن ساخن على درجة حرارة 200 لمدة ساعة؛ لحد ما البطة تستوي كويس. 7- بعد ما تطلعي البطة من الفرن صفّي السائل اللي نتج عن تسوية البطة، وممكن تستخدميه في عمل صوص تقدميه مع البطة، وبعدين قدميها.. بالهنا والشفا. لعمل الصوص: صفّي السائل المتبقي، وحطّيه على النار، واخلطي معاه 1/ 2 كوب صوص ديمجلاس ونصف كوب عصير برتقال، وسيبيهم على النار لحد ما الصوص يتقل، وقدّميه مع البطة.
************************
شوربة لسان عصفور بكبد البط شوربة لسان عصفور بكبد البط المقادير: كبد وقوانص بط أو فراخ 1/ 2 كوب لسان عصفور بصلة صغيرة حبة طماطم حبهان ورق لورا ملح وفلفل روزماري 2 ملعقة كبيرة زبدة الطريقة: 1- حُطّي الكبدة تتسلق في ميه، وحُطّي معاها البصلة وورق اللورا والحبهان والروزماري، وتبّليها بالملح والفلفل الأسود. 2- حمّري اللسان عصفور في الزبدة، وقطّعي الكبد والقوانص بعد ما تتسلق لقطع صغيرة، وشوّحيها مع اللسان عصفور، وبعدين حطّي معاهم الطماطم المفرومة والكرفس المفروم. 3- صبّي عليهم الشوربة اللي نتجت من سلق الكبد والقوانص، وسيبيها على النار لحد ما تغلي، وبعدين اطفي عليها وغطي الحلة، وسيبيها لحد ما لسان العصفور يستوي، وبعدين صبّيها في الأطباق، وقدّميها.. بالهنا والشفا.
************************
جلاش بالرز والكبدة جلاش بالرز والكبدة المقادير: 1/ 4 كيلو رز مسلوق 1/ 4 كيلو كبدة فراخ بصلة متوسطة ملح وفلفل 2 فص ثوم كوب بسلة ملعقة كبيرة صلصة طماطم 1/ 4 كوب كزبرة خضرا 3 ملاعق كبيرة زيت أو زبدة لفة جلاش الطريقة: 1- أول حاجة اسلقي الكبدة في ميه، وحطّي معاها بصلة صغيرة وملح وفلفل وخل؛ علشان يبقى لونها فاتح، وبعد ما تتسلق صفّيها من الميه، وقطّعيها قطع صغيرة. 2- شوحي البصل والثوم المفروم في الزبدة لحد ما لونها يصفر، وبعدين ضيفي عليها الكبدة والبسلة والكزبرة، وتبّليها بالملح والفلفل وصلصة الطماطم، وبعدين قلبي معاها الرز لحد ما المكونات تمتزج كويس. 3- رصي ورق الجلاش في صينية، وادهنيه بالزيت، وخلي أطرافه تبقى بره الصينية، وبعدين احشيه بالرز والكبدة، وغطيها بأطراف ورق الجلاش واقفليها كويس وادهنيها بالزيت، وبعدين حطّي عليها ورقة جلاش تانية؛ علشان يبقى شكلها متساوي، وادهنيها بالزيت. 4- دخّلي الصينية في الفرن لحد ما الجلاش يستوي ويبقى لونه دهبي، وقدّميه.. بالهنا والشفا.
************************
طاجن رز معمر باللبن طاجن رز معمر باللبن المقادير: 1/ 2 كيلو رز 3/ 4 كيلو لبن ساخن 1/ 2 كوب سكر 1/ 4 كوب كريمة لباني أو قشطة رشة ملح كوب سمنة بلدي سايحة الطريقة: 1- حطّي نصف كمية السمنة على الرز ومعاها الملح والسكر، وادعكيه كويس أوي لحد ما يتشرب السمنة. 2- اقلبي الرز في الطاجن، وبعدين صبي عليه اللبن الساخن والكريمة اللباني أو القشطة، وحطّيه على النار من فوق شوية لمدة 10 دقائق، وبعدين دخليه الفرن. 3- سيبيه لمدة 20 دقيقة أو لحد ما الوش يبقى لونه دهبي، وقدميه.. بالهنا والشفا.
خلصت وصفاتنا النهارده.. استنونا كل يوم مع وصفات جديدة.. سلام،،،