أرز بالخلطة وكريب سوزيت على "سفرة دايمة"

النهارده هنقدِّم لكم عزومة مكوّنة من: سلطة الفاصوليا الخضراء والفلفل الأحمر، وشوربة السبانخ بالفراخ، وأرز بالخلطة والكبد والكلاوي، وكريب سوزيت..
سلطة الفاصوليا الخضراء والفلفل الأحمر
المقادير:
* 1/ 2 كيلو فاصوليا خضراء مسلوقة مقطّعة قطع صغيرة
* 4 ثمرات فلفل أحمر مقطّع مربعات
* 4 ثمرات طماطم جامدة مقطّعة مكعبات
* كابوتشا مقطّعة شرائح رفيعة
* 1/ 4 كوب زيت زيتون
* فصين ثوم مفرومين
* عصير 2 ليمونة
* ملح وفلفل

الطريقة:
الطريقة بسيطة جدا، وكل اللي عليكي إنك تخلطي كل المكوّنات مع بعضها، وتحطّيها في طبق التقديم.. وبالهنا والشفا.

*******************

صبّي الشوربة في الأطباق وقدّميها ساخنة
شوربة السبانخ بالفراخ
المقادير:
* كوب سبانخ مقطّعة
* 1/ 8 كيلو صدور فراخ مشوية
* 1 1/ 2 كوب كريمة لباني
* بصلة صغيرة مقطّعة
* لتر شوربة فراخ
* زيت
الطريقة:
1- سخّني الزيت في حلة على نار متوسّطة، وشوّحي فيه صدور الفراخ لمدة دقيقتين، وبعد كده ضيفي عليهم البصل مع التقليب لغاية ما تحسي إن البصل لونه ذبل.
2- ضيفي السبانخ لخليط الفراخ والبصل مع الاستمرار في التشويح لمدة 30 ثانية، وبعد كده ضيفي الكريمة اللباني وشوربة الفراخ، وبعدين غطّي الحلة، وسيبي الخليط يغلي على نار هادية لمدة 10 دقايق، وبعد كده ارفعي الحلة من على النار، وصبّي الشوربة في الأطباق وقدّميها ساخنة.. وبالهنا والشفا.

*******************

اغرفي الأرز في طبق التقديم وحطّي على الوش خليط الكبد والكلاوي
أرز بالكبد والكلاوي
المقادير:
* 2 كوب أرز
* 1/ 4 كيلو كبدة بتلو مقطّعة قطع صغيرة
* 1/ 4 كيلو كلاوي مقطّعة قطع صغيرة
* 1/ 4 كيلو قلوب مقطّعة قطع صغيرة
* ملعقة كبيرة معجون طماطم
* 1/ 2 كيلو لحمة مفرومة
* 2 ملعقة صغيرة سكر
* 4 ملعقة كبيرة سمن
* 3 ثمرات بصل مفروم
* ملعقة صغيرة قرفة
* ملح وفلفل أسود
* 3 كوب شوربة
* 3 فص ثوم
* بهارات
* قرنفل
الطريقة:
1- اغسلي الكبد والكلاوي والقلوب كويس، وبعد كده حطيهم في حلة على النار، وضيفي معاهم السمنة واللحمة والمفرومة، وشوّحيهم كلهم مع بعض على النار.
2- ضيفي نصف كمية البصل على الخليط، وبعد كده ضيفي الثوم، وكوب شوربة، وتبّليهم بالملح والفلفل، وسيبيهم على النار، لغاية ما تحسي إن كل المكونات استوت.
3- هاتي حلة تانية وحطّي فيها السكر، وسيبيه يسيح على نار هادية لغاية ما يتحوّل لكراميل، وبعد كده ضيفي عليه باقي البصل وصلصة الطماطم وملعقتين سمنة، وضيفي معاهم القرفة والقرنفل والبهارات.
4- ضيفي الأرز على الخليط السابق، وقلّبيهم مع بعض كويس، وبعد كده ضيفي عليهم باقي الشوربة وسيبيهم يغلوا، وبعد كده غطّي الحلة، وقلّلي درجة الحرارة، وسيبيهم لغاية ما يستوي يعني تقريبا لمدة 20 دقيقة.
5- اغرفي الأرز في طبق التقديم، وحطّي على الوش خليط الكبد والكلاوي واللحمة المفرومة.. وبالهنا والشفا.

*******************

حطّي الكريب في طبق التقديم وصبّي عليه باقي الصوص
كريب سوزيت
مقادير الكريب:
* 3 بيضات
* 1/ 4 كوب زبدة سايحة
* 1/ 2 ملعقة فانيليا
* 1/ 2 لتر لبن دافئ
* 1 1/ 2 كوب دقيق
* 1/ 2 ملعقة ملح
* 1/ 2 كوب سكر
* 1/ 4 كوب زيت
مقادير صوص السوزيت:
* 1/ 2 كوب عصير برتقال
* 1/ 4 كوب زبدة
* بشر برتقالة
* كوب سكر
لتحضير عجينة الكريب:
1- اضربي البيض بالمضرب الكهربي على السرعة الأولى لغاية ما يبقى سائل، وبعد كده ضيفي عليه الملح والفانيليا، وبعد كده زوّدي سرعة المضرب، وابدئي في إضافة الزيت بشكل تدريحي، وبعد كده ضيفي الزبدة تدريجيا، وبعد كده ضيفي السكر بالراحة مع استمرار الخفق لغاية ما تتأكدي إن كل المكوّنات ذابت مع بعضها تماما.
2- بعد كده وقفي المضرب، وضيفي كل كمية الدقيق على الخليط، وبعد كده شغّلي المضرب مرة تانية على السرعة الأولى، لغاية ما الدقيق يمتزج تماما مع العجينة، وبعد كده ابدئي في إضافة اللبن الدافي تدريجيا، واضربي المكونات مع بعضها كويس جدا؛ علشان تتأكدي إن مافيش فيه أي تكتلات، وبعد كده صفّيه بالمصفاة، وسيبي العجينة على جنب لمدة 15 دقيقة.
3- بعد كده هاتي طاسة، وحطّي فيها طبقة رقيقة جدا من الزيت، وامسحي أي زيادة من الطبقة الدهنية بالمنديل، وسخني الطاسة على النار، وبعد كده افردي عليها طبقة رقيقة جدا من عجينة الكريب بحيث ما يزيدش سمكها عن 1/ 4 سم.
4- حطي الكريب على النار لغاية ما العجينة تتماسك، ومش هتاخد منك أكتر من دقيقة، وبعد كده اقلبيها على الناحية التانية، علشان تاخد لون، وبعد كده ارفعي الكريب من الطاسة وحطيه في طبق وطبّقيه أربع أرباع، وكرري نفس الطريقة مع باقي الكمية.
لتحضير الصوص:
1- هاتي طاسة وسيبيها تسخن على النار، وبعد كده ضيفي عليها السكر، وسيبيه لغاية ما يسيح ولونه يبقى ذهبي أو بني، وبعد كده ضيفي عليه عصير البرتقال، وقلّبيه كويس مع السكر.
2- بعد كده ضيفي الزبدة وبشر البرتقال، وسيبيهم على النار لغاية ما يمتزجوا مع بعض تماما، ويكوّنوا صوص السوزيت.
3- بعد ما الصوص يبقى جاهز عندك، ضيفي فيه الكريب بس الاتنين لازم يكونوا سخنين، وسيبيهم على النار مع بعض شوية علشان عجينة الكريب تتشرّب من الصوص، وبعد كده حطّيهم في طبق التقديم، وصبّي عليهم باقي الصوص.. وبالهنا والشفا.

وبكده تكون خلصت عزومتنا النهارده
أتمنى إنها تكون عجبتكم
وتجرّبوا كل الوصفات اللي قدّمناها
وتبعتوا تقولوا لنا النتيجة كانت إيه
*********************
للتعرف على مزيد من الوصفات الشهية
اضغط هنا "سفرة دايمة"
*********************