سمك مشوي وسمبوسك بالتمر في عزومة 22 رمضان

أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ما تتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور.
على سفرة النهارده هيكون موجود مشروب الموكا المثلجة وسلطة المكرونة بالمايونيز وشوربة الكرفس وسمك بوري مشوي وسمبوسك بالتمر وعلى السحور بنقدّم لك فطيرة البطاطس بالبيض.

موكا مثلجة
موكا مثلجة
المقادير:
6 ملاعق صغيرة نسكافيه
6 ملاعق كبيرة لبن بودرة
سكر حسب الرغبة
6 كوب ماء بارد
مكعبات ثلج
الطريقة:
1- اضربي كل المكونات دي مع بعضها في الخلاط لغاية ما تتجانس، وبعد كده صبّيها في كوبايات التقديم، وممكن تزيّنيها بالكريم شانتيه.
***************
سلطة المكرونة بالمايونيز
سلطة المكرونة بالمايونيز
المقادير:
1⁄4 كيلو مكرونة صغيرة مسلوقة
1⁄2 ثمرة فلفل أخضر مقطّع مكعبات
1⁄2 ثمرة فلفل أحمر مقطّع مكعبات
11⁄2 ملعقة صغيرة بصل مبشور
11⁄2 ملعقة صغيرة ثوم مفروم
4 ملاعق جبنة رومي مبشورة
1⁄2 ملعقة صغيرة زنجبيل
2 ملعقة كبيرة مستردة
11⁄4 كوب مايونيز
ملح وفلفل أسود
كوب زبادي
الطريقة:
1- اخلطي المكرونة مع الفلفل الأخضر والأحمر والمايونيز والزبادي والجبنة الرومي والثوم والبصل والملح والفلفل الأسود والزنجبيل والمستردة وقلّبيهم كلهم مع بعض كويس، وبعد كده غطّي السلطة وحطيها في الثلاجة طول الليل، وقدميها باردة.
***************
شوربة الكرفس
شوربة الكرفس
المقادير:
حزمة كرفس مقطّعة قطع صغيرة
4 ثمرة بصل أخضر مقطّع قطع صغيرة
3 ثمرة طماطم مقطّعة قطع صغيرة
فلفل أخضر مقطّع قطعا صغيرة
بصلة مقطّعة قطعا صغيرة
ملعقة كبيرة زبدة
3 كوب شوربة
ملح وفلفل
كوب لبن
الطريقة:
1- اخلطي قطع الكرفس مع البصل الأخضر والطماطم والبصل، وشوّحيهم في الزبدة على النار لمدة 10 دقائق.
2- بعد كده صبّي عليهم الشوربة واللبن، وسيبيهم مع بعض على النار، لغاية ما كل المكونات تستوي كويس، وبعدين اطفي النار، وسيبي الشوربة لغاية ما تبرد، وبعد كده اضربيها في الخلاط.
3- بعد كده حطّي الشوربة تاني على النار وسيبيها تسخن، وتبّليها بالملح والفلفل، وصبّيها في الأطباق، وممكن تزيّني الأطباق بأوراق النعناع أو الكرفس الطازة.
***************
سمك بوري مشوي
سمك بوري مشوي
المقادير:
4 سمكة بوري
2 ثمرة طماطم مقطعة قطع صغيرة
1⁄2 ملعقة صغيرة فلفل أسود
2 ملعقة كبيرة بشر ليمون
1⁄4 كوب عصير ليمون
2 ملعقة صغيرة كزبرة
2 ملعقة صغيرة كمون
2 ملعقة صغيرة سماق
2 ملعقة كبيرة زيت
3 ثمرة فلفل أخضر مفروم
ملعقة صغيرة شطة
10 فص ثوم مفروم
1⁄4 كوب خل
2 كوب ردة
ملح
الطريقة:
1- ادهني السمك بزيت الذرة، اخلطي الثوم والفلفل والشطة والملح والكمون والكزبرة والسماق والفلفل الأسود مع بعض كويس، وبعدين ضيفي عليهم الطماطم والخل وعصير الليمون وبشر الليمون والزيت وقلبيهم كلهم مع بعض لحد ما الخليط يتجانس.
2- خدي الخليط وحطيه في السمك لكن سيبي نسبة بسيطة من الخليط على جنب، بعد كده غطي السمك بالردة، وبعدين ابدئي سخّني الشواية وحطّي السمك عليها واشويه على الناحيتين لحد ما يبقى لونه دهبي.
3- خدي باقي الخليط وافرديه في الطبق، وبعدين شيلي السمك من على الشواية ورصيه على الخليط، وقدميه.
***************
سمبوسك بالتمر
سمبوسك بالتمر
المقادير:
علبة صغيرة عجينة السمبوسك
ملعقة صغيرة بشر البرتقال
1⁄4 كيلو تمر منزوع البذر
ملعقة صغيرة قرفة
كوب لوز مفروم
2 صفار بيضة
مقادير لاصق العجينة:
دقيق
ميه
الطريقة:
1- لعمل اللاصق، اعجني الدقيق مع الميه وسيبيه على جنب.
2- لعمل الحشو؛ اخلطي صفار البيض والقرفة وبشر البرتقال واللوز والتمر مع بعض كويس بإيدك لحد ما الخليط يتجانس.
3- خدي ورقة من السمبوسك واحشيها بخليط التمر، والزقي العجينة بعجينة الدقيق، وكرّري الخطوة دي مع باقي السمبوسك، وبعدين حمّريها في الزيت على النار، لغاية ما يبقى لونها ذهبي وبعدين ارفعيها على مناديل ورقية علشان تشرب الزيت.
4- حطّي السمبوسك في الشربات البارد، وبعدين ارفعيها وصفّيها من الشربات وقدميها.
***************
فطيرة البطاطس بالبيض
للسحور.. فطيرة البطاطس بالبيض
المقادير:
10 بيضات
بطاطس مقطّعة شرائح
كيس سوسيس مقطّع حلقات
ثمرة فلفل أخضر مقطّعة شرائح رفيعة
فلفل أحمر مقطّع شرائح رفيعة
جبنة رومي مبشورة
زيت زيتون
الطريقة:
1- حمّري البطاطس في زيت القلي، وبعدين ارفعيها على مناديل ورقية علشان تشرب منها الزيت.
2- حطّي البطاطس في طاسة تانية مع زيت الزيتون وضيفي عليها الفلفل الأخضر والفلفل الأحمر والسوسيس وقلّبيهم مع بعض على النار، وبعدين ضيفي عليهم البيض واستمري في التقليب لحد ما يستوي، وبعدين رشي الجبنة الرومي على الوش وسيبيهم على النار لغاية ما الجبنة تسيح، وبعد كده ارفعيه وقدّميه.
وبكده خلصت عزومة النهارده..
مستنيين تجرّبي وتقولي لنا إيه رأيك..
واستنينا بكره إن شاء الله مع عزومة جديدة..
نتمنى لكم صوما مقبولا وإفطارا شهيا بمشيئة الله..
سلااام،،،