كوردون بلو وبسبوسة في عزومة 20 رمضان

أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ما تتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور..
على سفرة النهارده هيكون موجود عصير البطيخ وسلطة الثومية وشوربة الفراخ بالشعيرية والخضار وكوردون بلو وبسبوسة وعلى السحور هنقدّم لك فول بالصلصة..

عصير البطيخ
عصير البطيخ
المقادير:
1⁄2 بطيخة مقطّعة ومخلية من القشر
ملعقة صغيرة زنجبيل فريش مفروم
1⁄2 ليمونة مخلية بدون قشر
2 كوب ثلج مجروش
الطريقة:
1- اضربي كل المكونات في الخلاط كويس وصبّيها في الكاسات وقدّميها.
***************
سلطة الثومية
سلطة الثومية
المقادير:
6 فص ثوم
4 ملاعق كبيرة زيت زيتون
1⁄2 ملعقة صغيرة ملح
3 ملاعق كبيرة نشا
عصير 1⁄2 ليمونة
كوب ميه
الطريقة:
1- دقّي الثوم كويس مع الملح وعصير الليمون، وذوّبي النشا في الميه وحطّيها على النار مع التقليب المستمر لغاية ما الخليط يغلي، وبعد كده ارفعيه وسيبيه يبرد.
2- بعد ما النشا المذوّب يبرد، ضيفي معاه خليط الثوم واضربيهم مع بعض في الخلاط لغاية ما المكونات تتجانس وتعمل رغوة، وبعد كده ضيفي زيت الزيتون بالتدريج على هيئة خيط رفيع مع الاستمرار في الخفق لغاية ما قوام الخليط يبقى كريمي، وبعد كده حطّي السلطة في طبق التقديم وزيّنيها بزيت الزيتون وقدّميها.
***************
شوربة الفراخ بالشعيرية والخضار
شوربة الفراخ بالشعيرية والخضار
المقادير:
1⁄2 كوب شعيرية
1⁄2 كيلو صدور فراخ مقطّعة مكعبات
ثمرة جزر متوسطة مقطّعة شرائح
ملعقة كبيرة بصل أخضر مفروم
3 ملعقة كبيرة بقدونس مفروم
3 ملعقة كبيرة شبت مفروم
3 ملعقة كبيرة كزبرة مفرومة
2 ملعقة كبيرة عصير ليمون
5 كوب ميه
ورقة لاورا
ملح وفلفل
الطريقة:
1- اسلقي الفراخ في الميه مع إضافة ورق اللاورا والبقدونس والكزبرة والجزر والبصل الأخضر والملح والفلفل.
2- حمّصي الشعيرية في طاسة مع ملعقة كبيرة زيت زيتون لغاية ما يبقى لونها ذهبي، وبعد كده ضيفيها على الشوربة وسيبيها تغلي، وبعد كده قللي درجة الحرارة عليها، وسيبيها لغاية ما الشعيرية والخضار يستووا كويس، وبعد كده اطفي عليها واغرفي الشوربة في أطباق التقديم وقدّميها مع عصير الليمون.
***************
كوردن بلو
كوردن بلو
المقادير:
كيلو صدور فراخ
شرائح ديك رومي مدخن أو لانشون
شرائح جبنة شيدر
2 كوب بقسماط
بصلة متوسطة
عصير ليمونة
كوب دقيق
ملح وفلفل
2 بيضة
بابريكا
الطريقة:
1- افرمي البصل واعصريه كويس وخدي الميه بتاعته واخلطيها مع الملح والفلفل والبابريكا وعصير الليمون، وتبّلي الفراخ بالخليط ده.
2- افردي صدور الفراخ على سطح مستوي، وافردي على كل قطعة شريحة من الرومي المدخن أو اللانشون وشريحة من الجبنة الشيدر.
3- لفّي الفراخ بحرص واقفليها كويس باستخدام خلة الأسنان، وبعد كده حطّي قطع الفراخ في الدقيق بحيث يغطّيها من كل الجوانب، وبعد كده حطّيها في البيض المخفوق مع ملح وفلفل، وفي الآخر حطيها في البقسماط.
4- سخّني طاسة فيها زيت غزير واقلي فيها الفراخ لغاية ما يبقى لونها ذهبي، وبعد كده ارفعيها على مناديل ورقية، وممكن تقدّميها مع خضار سوتيه أو أرز أبيض.
***************
بسبوسة
بسبوسة
المقادير:
3 كوب دقيق سميد
2 كوب زبادي بلدي
2 ملعقة كبيرة زبدة
معلقة كبيرة جوز هند
كيس بيكينج بودر
كوب سكر
فانيليا
1⁄2 كوب لوز أو أي نوع من المكسرات
الطريقة:
1- اخلطي كل المقادير الجافة مع بعض (دقيق السميد والبيكينج بودر والسكر والفانيليا وجوز الهند).
2- ضيفي الزبدة على الخليط ده، واخلطيهم مع بعض بإيدكي كويس، وبعد كده ضيفي عليهم الزبادي، وقلّبي الخليط بهدوء لغاية ما يتجانس.
3- ادهني الصينية بطبقة خفيفة من الزبدة والدقيق، وصبي فيها خليط البسبوسة، وساويها كويس، ووزّعي اللوز بشكل متناسق على عجينة البسبوسة.
4- دخّلي الصينية في الفرن وسيبيها لمدة 20 دقيقة أو لغاية ما يبقى لونها ذهبي، وبعد كده طلّعيها واسقيها وهي سخنة بالشربات البارد.
5- لتحضير الشربات؛ اخلطي كوب سكر مع كوب ماء وعصير نصف ليمون، وحطّي الخليط على النار وسيبيه يغلي شوية، وبعد كده قللي درجة الحرارة وسيبيه لغاية ما يُعقد وبعد كده ضيفي الفانيليا وقلّبيه كويس، وارفعيه من على النار وسيبيه يبرد.
***************
فول بالصلصة
للسحور.. فول بالصلصة
المقادير:
2 كوب فول
2 ملعقة كبيرة صلصة طماطم
1⁄2 كوب طماطم مقطّعة مكعبات صغيرة
2 ملعقة كبيرة بقدونس مفروم
بصلة صغيرة مفرومة
2 فص ثوم مفروم
ملعقة كبيرة زبدة
ملح وكمون
الطريقة:
1- شوّحي البصل في الزبدة على النار لغاية ما يدبل، وبعد كده حطّي عليه الثوم، وقلّبيهم مع بعض لغاية ما لونهم يصفرّ.
2- بعد كده ضيفي عليهم الطماطم المقطّعة وقلّبيها لمدة دقيقتين على النار، وبعد كده ضيفي عليها الصلصة والملح والكمون، وقلّبيهم مع بعض.
3- ضيفي الفول على الخليط مع شوية ميه وسيبيه يغلي على النار، وبعد كده اطفي عليه وضيفي البقدونس المفروم، وقدّميه مع العيش البلدي.
وكده خلصت عزومة النهارده..
مستنيين تجرّبي وتقولي لنا إيه رأيك..
واستنينا بكره إن شاء الله مع عزومة جديدة..
نتمنى لكم صوما مقبولا وإفطارا شهيا بمشيئة الله..
سلااام،،،