عصير التين البرشومي العصير ده مش بنعمله كتير في البيوت، لكن عايزة اقول لك إن طعمه حلو جداً وله فوائد كثيرة جداً.. المقادير: * لكل كوب عصير أربع حبات تين برشومي * 3 ملاعق كبيرة سكر * ماء بارد الطريقة: 1- خدي التين وقطعيه قطع صغيرة، وبعد كده اضربيه في الخلاط مع السكر والميّة. 2- بعد ما تضربيه في الخلاط هاتي مصفاة وصفّي العصير، وحطيه في الثلاجة، وقبل أذان المغرب بنصف ساعة طلّعيه وصبيه في كوبايات العصير.
******************* شوربة الخضار والفراخ والمشروم شوربة الخضار والفراخ والمشروم المقادير: * 1/4 كيلو صدور فراخ مسلوقة مقطعة قطع كبيرة * 3 بصلات مقطعة قطع صغيرة جداً * كوب لبن * 3 أكواب شوربة فراخ * كوب دقيق * 1/4 كيلو مشروم مقطع شرائح * 3 ملاعق كبيرة زبدة * عصير ليمونة * 1/2 حزمة بقدونس مقطعة قطعاً صغيرة * ملح وفلفل * 3 أكواب خضار مشكل ومقطع مكعبات صغيرة الطريقة: 1- سيحي الزبدة على النار، وبعد كده ضيفي إليها البصل مع استمرار التقليب لغاية ما لون البصل يبقى ذهبي. 2- لما تلاقي إن لون البصلة بقى ذهبي ضيفي إليها الدقيق مع استمرار التقليب لمدة خمس دقائق أو لغاية ما الدقيق يحمرّ. 3- بعد مرور الخمس دقائق ضيفي إليه اللبن تدريجياً مع التقليب المستمر علشان الدقيق ما يكلكعش. 4- بعد كده ضيفي شوربة الفراخ مع استمرار التقليب لغاية ما تلاقي إن العجينة بقت متجانسة وسمكية ومش مكلكعة، ضيفي إليها الخضار والمشروم. 5- سيبي الخليط على النار لمدة ربع ساعة، وبعد كده ضيفي إليه عصير الليمون والبهارات والملح، وسيبيه على النار لمدة ربع ساعة كمان، أو لغاية ما تلاقي الخضار والمشروم استوى، اطفي البوتاجاز وحطي الشوربة في أطباق التقديم، وزيني الأطباق بالبقدونس.
******************* سلطة عيش الغراب سلطة عيش الغراب المقادير: * علبة عيش الغراب * فص ثوم مفروم * 2 ملعقة كبيرة عصير ليمون * ملعقة صغيرة زعتر مجفف ومطحون * 1/2 ملعقة كبيرة زبدة * ملعقة كبيرة زيت زيتون * 2 ملعقة كبيرة بقدونس مفروم ناعم * ملح الطريقة: 1- اغسلي عيش الغراب كويس، وبعد كده قطعيه إلى قطع صغيرة. 2- ذوبي الزبدة في طاسة على نار هادية، وبعد كده ضيفي إليها عيش الغراب وقلبيه لمدة دقيقة، وبعد كده ضيفي الثوم وقلبيهم مع بعض لمده 5 دقائق أو لغاية ما تلاقي إن عيش الغراب استوى. 3- حطي عيش الغراب في طبق التقديم، وضيفي إليه الملح وعصير الليمون، وزيت الزيتون والبقدونس والزعتر المطحون، وقلبيهم مع بعض.
******************* مكرونة إسباجتي بالفراخ والروزماري مكرونة إسباجتي بالفراخ والروزماري المقادير: * 1/2 كيلو مكرونة إسباجتي * 1/2 كيلو صدور فراخ مخلية * مكعب مرقة دجاج * 3 فصوص ثوم مدقوق * 3 ملاعق كبيرة زيت عباد الشمس * 4 ملاعق كبيرة عصير ليمون * 2 ملعقة كبيرة جبنة رومي مبشورة * 2 ملعقة صغيرة روزماري * 2 ملعقة كبيرة بقدونس مقطعاً قطعاً صغيرة * ملح وفلفل * أوراق بقدونس للتزيين الطريقة: 1- اسلقي المكرونة وصفّيها من الميّة، وسيبيها في المصفاة، وضيفي إليها ملعقة كبيرة زيت، وقلبيهم كويس، وده علشان المكرونة ما تلزقش في بعضها. 2- بعد كده هاتي قطع الفراخ، واغسليها كويس، وبعد كده قطّعيها إلى مربعات متوسطة الحجم. 3- سخني الزيت في حلة متوسطة، وبعد كده ضيفي إليه الثوم والروزماري، وقلبيهم مع بعض لمدة دقيقة، وبعد كده ضيفي إليهم الفراخ وحمريها فيهم لغاية ما لونها يبقى ذهبي. 4- بعد لون الفراخ ما يبقى ذهبي ضيفي إليها مرقة الدجاج وعصير الليمون، وقلبيهم مع بعض لغاية ما تقل كمية السائل إلى النصف. 5- بعد كده ضيفي المكرونة الإسباجتي والبقدونس والملح والفلفل وقلبيهم كلهم مع بعض.. وبعد ربع ساعة شيليهم من على النار وحطيهم في طبق التقديم وعلى الوش رشي الجبنة وأوراق البقدونس.
******************* سلطة فواكه سلطة فواكه المقادير: * ثمرة تفاح * 5 ثمرات برتقال * ثمرة كيوي * ثمرة كمثرى أو جوافة * ثمرة مانجو * 6 ثمرات فراولة * 6 حبات عنب أخضر * 6 حبات عنب أحمر * عصير ليمونة الطريقة: هاتي البرتقال واعصريه، وقطعي التفاح والكيوي والكمثرى والمانجو والبرتقال مكعبات متوسطة الحجم، وقطعي الفراولة بالنصف.. اخلطي كل المقادير مع بعضها، وحطيهم في طبق كبير، وضيفي إليهم عصير البرتقال وعصير الليمون. *************** وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة... واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك.. كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله مع أطيب التمنيات بصوم مقبول وإفطار شهي بإذن الله سلااااااااام ********************* للتعرف على مزيد من الوصفات الشهية اضغط هنا "سفرة دايمة" *********************
