مكرونة اسباجتي بالفراخ والروزماري

زي ما وعدناكم إن كل يوم هيكون عندنا وصفة جديدة، النهارده هنقول لكم على طريقة مميزة جداً للمكرونة الاسباجتي سهلة ولذيذة...
مكرونة اسباجتي بالفراخ والروزماري
المقادير:
• نص كيلو مكرونة اسباجيتي.
• نص كيلو صدور فراخ مخلية.
• 2/1مكعب مرقة دجاج.
• 3 فصوص ثوم مدقوق.
• 3 معالق كبيرة زيت عباد الشمس.
• 4 معالق كبيرة من عصير الليمون.
• 2 معلقة كبيرة جبنة رومي مبشورة.
• 2 معلقة صغيرة روزماري طازج، أو معلقة صغيرة روزماري جاف.
• 2 معلقة كبيرة بقدونس مقطع قطع صغيرة.
• ملح وفلفل.
الطريقة:
1- اسلقي المكرونة وصفّيها من الميه وسبيها في المصفاة، وضيفي إليها معلقة كبيرة زيت وقلبيهم كويس؛ وده علشان المكرونة ما تلزقش في بعضها.
2- بعد كده أحضري قطع الفراخ واغسليها كويس، وبعد كده قطعيها إلى مربعات متوسطة الحجم.
3- سخني الزيت في حلة متوسطة، وبعد كده ضيفي إليه الثوم والروزماري وقلبيهم مع بعض لمدة دقيقة، بعد كده ضيفي إليهم الفراخ وحمّريها فيهم لغاية ما لونها يبقى ذهبي.
4- بعد كده ضيفي لها مرقة الدجاج وعصير الليمون، وقلبيهم مع بعض لغاية ما تقل كمية السائل إلى النصف.
5- وفي الآخر ضيفي المكرونة الاسباجتي والبقدونس والملح والفلفل وقلبيهم كلهم مع بعض.. وبعد ربع ساعة شيليهم من على النار وحطيهم في طبق التقديم، ومن على الوش رشي الجبنة.. و"بالهنا والشفا".

ونتمنى إنكم تجرّبوا الوصفة وتعجبكم..
وتبعتوا تقولوا لنا رأيكم فيها إيه..
ولو عندكم أي أكلة عايزين تعرفوا طريقتها
يا ريت تبعتوا لنا..
وكمان لو عندكم طريقة أكلة جديدة
ابعتيها لنا علشان نقدّمها على "قمر 14"..
وإلى اللقاء،،،،