فراخ بانيه بطريقة جديدة ومافن النسكافيه في عزومة 8 رمضان

أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ماتتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور..
على سفرة النهارده هيكون موجود عصير الكيوي وسلطة البطاطس والبصل الأخضر والزيتون وشوربة لسان عصفور بكريمة المشروم وفراخ بانيه بطريقة مختلفة ومافن النسكافيه وعلى السحور هنقدّم لك طاجن الفول بالبيض العيون..

عصير الكيوي
عصير الكيوي
المقادير:
2 ثمرة كيوي مقطعة
1⁄21 كوب آيس كريم فانيليا
ملعقة كبيرة سكر
2⁄3 كوب لبن
الطريقة:
1- حطّي كل المقادير ما عدا الآيس كريم في الخلاط واضربيهم كويس، وبعد كده ضيفي الآيس كريم واضربي العصير مرة تانية.
2- صبي العصير في الأكواب وزيّنيها بشرائح الكيوي وقدّميه.

سلطة البطاطس والبصل الأخضر
سلطة البطاطس والبصل الأخضر
المقادير:
كيلو بطاطس متوسطة الحجم
2 ثمرة بصل أخضر مقطّعة حلقات
2 ملعقة صغيرة نعناع ناشف مطحون
1⁄2 كوب عصير ليمون
ملعقة كبيرة ثوم مفروم
1⁄3 كوب زيت زيتون
ملح وفلفل أسود
الطريقة:
1- اغسلي البطاطس كويس من غير ما تقشّريها واسلقيها في ميه وكمية ملح مناسبة، وبعد ما تستوي قشريها وقطّعيها مكعبات.
2- اخلطي البطاطس مع باقي المقادير، وفي الآخر رشي النعناع وقدّميها.

شوربة لسان عصفور بكريمة المشروم
شوربة لسان عصفور بكريمة المشروم
المقادير:
1⁄4 كيس لسان عصفور محمّر
صدر فرخة مسلوق ومقطّع مكعبات
1⁄2 كوب مشروم مقطّع قطع صغيرة
2 ملعقة كبيرة جبنة رومي مبشورة
بصلة متوسطة مبشورة
ملعقة كبيرة زيت نباتي
2 ملعقة كبيرة دقيق
5 كوب شوربة فراخ
ملعقة كبيرة زبدة
1⁄2 كوب كريمة
ملح وفلفل أسود
الطريقة:
1- سخّني الزبدة والزيت في حلة على النار وبعد كده ضيفي البصل وشوّحيه لغاية ما يدبل.
2- ضيفي عليه الدقيق وقلّبيهم مع بعض لمدة دقيقتين وبعدين حطّي شوربة الفراخ مع الاستمرار في التقليب، علشان الدقيق مايكلكعش معاكي، وسيبي الشوربة على النار لغاية ما تغلي.
3- ضيفي لسان العصفور على الخليط وسيبيه يغلي لمدة 10 دقايق، وبعد كده ضيفي المشروم.
4- بعد كده حطّي الكريمة والفراخ على الشوربة وتبّليها بالملح والفلفل وسيبيها على النار لمدة 8 دقائق، وبعد كده اغرفي الشوربة في الأطباق ورشي عليها الجبنة الرومي وقدّميها.

فراخ مقلية بطريقة مختلفة
فراخ مقلية بطريقة مختلفة
مقادير تتبيلة الفراخ:
فرخة كبيرة مقطّعة 8 أجزاء
ملعقة صغيرة شطة حمراء
ملعقة صغيرة روزماري
ملعقة صغيرة فلفل أسود
ملعقة صغيرة بابريكا
ملعقة صغيرة زعتر
ملعقة صغيرة ملح
كوب لبن رايب
مقادير خلطة القلي:
كوب دقيق
كوب بقسماط
ملعقة صغيرة ملح
ملعقة صغيرة بابريكا
ملعقة صغيرة ثوم مفروم
ملعقة صغيرة شطة
2 بيضة
الطريقة:
1- اخلطي كل مقادير التتبيلة مع بعض وانقعي فيها الفراخ وحطّيها في الثلاجة لمدة 6 ساعات.
2- اخفقي البيض مع شوية ملح وفلفل، وحطّي فيه الفراخ بحيث يغطّيها بالكامل.
3- اخلطي الدقيق مع البقسماط والشطة والبابريكا والثوم المفروم والملح، وغطّي الفراخ بالخلطة دي من كل الجوانب.
4- سخّني الزيت على النار، واقلي فيه الفراخ لغاية ما تستوي ويبقى لونها ذهبي، وبعد كده ارفعيها على مناديل ورقية علشان تتشرّب الزيت، وبعد كده قدّميها مع مكرونة أو بطاطس شيبسي.

مافن النسكافيه
مافن النسكافيه
المقادير:
كوب دقيق
2 ملعقة كبيرة نسكافيه
كوب شيكولاتة مبشورة
1⁄4 كوب زبدة سايحة
1⁄2 كوب لبن دافئ
11⁄2 ملعقة صغيرة بيكينج بودر
1⁄2 ملعقة صغيرة ملح
ملعقة صغيرة قرفة
3⁄4 كوب سكر
فانيليا
بيضة
مقادير صوص النسكافيه:
2 ملعقة كبيرة نسكافيه
1⁄2 كوب زبدة سايحة
2 كوب سكر بودرة
ملعقة كبيرة ماء دافئ
فانيليا
الطريقة:
1- لتحضير المافن، دوّبي النسكافيه مع اللبن الدافئ، وقلّبيهم كويس، وبعدين ضيفي عليهم الزبدة السايحة والبيض والفانيليا، واخلطيهم كويس لحد ما يتجانسوا.
2- هاتي طبق تاني، واخلطي فيه الدقيق والسكر والبيكينج بودر والقرفة والملح.
3- صبّي خليط الزبدة والبيض على الدقيق، وقلّبيهم كويس مع بعض، وبعد كده ضيفي عليهم الشيكولاتة المبشورة.
4- هاتي قوالب الكيك وافردي فيها ورق الزبدة، وصبّي فيها الخليط، ودخّليها فرن ساخن وسيبيها لمدة 20 دقيقة.
5- لتحضير صوص النسكافيه، اضربي السكر مع الزبدة والفانيليا بالمضرب الكهربي، ودوّبي النسكافيه مع الماء الدافئ، وضيفيه على خليط السكر والزبدة والفانيليا، وبعد ما يبرد المافن زيّنيه بالصوص ده، وقدّميه.

طاجن الفول بالبيض العيون
طاجن الفول بالبيض العيون
المقادير:
كوب فول مدمس أو علبة فول جاهزة
2 ثمرة فلفل أخضر مقطّع قطع صغيرة (بارد أو حامي)
2 ثمرة طماطم مقطّعة مكعبات صغيرة
2 ملعقة كبيرة زيت نباتي
ملعقة صغيرة ثوم مفروم
ملعقة صغيرة كمون
ملح وفلفل أسود
4 بيضة
الطريقة:
1- حطّي الزيت في طاسة ولما يسخن حطّي الثوم وقلبيه لغاية ما يصفرّ وبعدين ضيفي عليه الطماطم، وقلّبيهم مع بعض على النار لحد ما تتسبّك، ولو نشفت منك حطّي شوية ميه صغيرة.
2- بعد كده ضيفي الفلفل الأخضر، وقلّبيهم مع بعض، وسيبيهم على النار لمدة 3 دقائق، وبعدين حطّي الفول، وتبّليه بالملح والفلفل والكمون.
3- اكسري البيض واحدة واحدة على الفول، وسيبيه من غير ما تقلّبيه، وابعدي كل بيضة عن التانية، ورشّي على كل بيضة شوية صغيرة ملح وفلفل وغطّي الحلة وسيبيها على نار هادية لغاية البيض ما يستوي.
4- اغرزي سكينة رفيعة جوه البيض علشان تتأكدي إنه استوى، وبعد كده قدّميه.
وبكده خلصت عزومة النهارده..
مستنيين تجرّبي وتقولي لنا إيه رأيك..
واستنينا بكرة إن شاء الله مع عزومة جديدة..
نتمنى لكم صوما مقبولا وإفطارا شهيا بمشيئة الله..
سلام،،،