عزومة 29 رمضان

عصير الكيوي بالليمون
العصير ده من العصاير اللذيذة جداً..
المقادير:
* 4 حبات كيوي مقشرة ومقطعة قطعاً صغيرة
* 1/2 كوب عصير ليمون
* 1/2 كوب سكر
* شرائح ليمون أو كيوي "للتزيين"
* 2 كوب مية
* مكعبات ثلج
الطريقة:
اخلطي كل المقادير مع بعضها، واضربيها في الخلاط كويس، وبعد كده حطيها في كوبايات العصير، وزيني الكوبايات بشرائح الليمون.

*******************
شوربة البطاطس
شوربة البطاطس
المقادير:
* 3 ثمرات بطاطس كبيرة الحجم مقطعة قطع صغيرة
* بصلة كبيرة مقطعة قطع صغيرة
* 1/2 كوب زبدة
* 3 أكواب شوربة فراخ أو لحمة
* علبة قشطة
* ملح وفلفل وكمون
* أوراق بقدونس "للتزيين"
الطريقة:
1- هاتي البصل وقشريه وقطعيه قطعاً صغيرة، وبعد كده حمريه على النار مع الزبدة لمدة خمس دقائق أو لغاية ما تلاقي إن لونه ذهبي.
2- بعد كده ضيفي إليه قطع البطاطس، وقلبيهم مع بعض لمدة عشرة دقائق.
3- وبعدين ضيفي إليها الشوربة والملح والكمون والفلفل وسيبيهم على النار لغاية ما البطاطس تستوي.
4- بعد كده اطفي البوتاجاز، وسيبيها لغاية ما تبرد، واضربيها في الخلاط.
5- قبل أذان المغرب بربع ساعة حطيها على النار مرة تانية، وضيفي إليها القشطة مع التقليب المستمر لمدة عشرة دقائق أو لغاية ما تغلي، وبعد كده حطيها في طبق الشوربة وضيفي إليها أوراق البقدونس.

*******************
سلطة الباذنجان الرومي على الطريقة الفرنسية
سلطة الباذنجان الرومي على الطريقة الفرنسية
المقادير:
* 3 ثمرات طماطم مقطعة قطعاً صغيرة
* ثمرة باذنجان رومي مقطعة قطعاً صغيرة
* قرن فلفل رومي مقطع قطعاً صغيرة
* حزمة بقدونس مقطعة قطعاً صغيرة
* فص ثوم مفروم
* ملح وفلفل
* ملعقة مسطردة
* كوب زيت للتحمير
الطريقة:
قطعي الباذنجان لمكعبات صغيرة أو شرائح بالطول، واقليه في الزيت، وبعد كده ضيفي إليه باقي المقادير وقلبيهم مع بعض.

*******************
فراخ على الطريقة اللبنانية
فراخ على الطريقة اللبنانية
المقادير:
* فرخة متوسطة الحجم
* ثمرة طماطم مبشورة
* 2 بصلة مبشورة
* 5 فصوص ثوم مدقوق
* 2 ليمونة مبشورة بالقشر
* فلفل رومي مبشور
* حزمة بقدونس مقطعة قطع صغيرة جداً
* ملح وفلفل أسود وبهارات
* 1/4 كوب زيت ذرة
الطريقة:
1- هاتي الفرخة، واغسليها كويس، وبعد كده اخلطي كل المقادير الباقية مع بعضها البعض، واحشي بيهم قلب الفرخة، وبين الجلد واللحم، ورشي عليها من برة الزيت وسيبها لمدة ساعتين علشان تتبل.
2- بعد مرور الساعتين هاتي صينية فرن وحطي فيها الفرخة ودخليها الفرن لمدة ساعة ونصف، أو لغاية ما تستوي وتحمر.
3- بعد كده خرجيها وحطيها في أطباق التقديم، وعلى فكرة ممكن مع الطبق ده تعملي طبق مكرونة بيضاء وتاخدي الصوص بتاع الفرخة تحطيه على المكرونة.

*******************
تارت التمر والكسترد
تارت التمر والكاسترد
المقادير:
* 1/2 كوب زبدة
* 1بيضة
* 2 كوب دقيق
* 3ملاعق كبيرة سكر
* 1/4 كوب تمر مقطعاً قطعاً صغيرة
* 1/3 كوب مية
الحشو:
* كوب تمر
* كوب كاسترد
* ملاعق كبيرة سكر بودرة للتزيين
الطريقة:
1- اخلطي الدقيق مع السكر وقطع التمر وقلبيهم مع بعض كويس، وضيفي إليهم الزبدة واعجني الخليط ده مع بعضه بأطراف أصابعك.
2- ضيفي للخليط السابق البيض والمية مع استمرار التقليب لغاية ما تلاقي العجينة بقت لينة، افرديها في القوالب الخاصة بالتارت، ُوغطيها بالكاسترد والتمر، وبعد كده حطيها في فرن درجة حرارته 160 درجة مئوية لمدة 20 دقيقة، وبعدين طلعيه من الفرن، وسيبيه لغاية ما يبرد وزينيه بالسكر البودرة.

*******************
وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..


وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************