تشيز كيك بالمانجا في عزومة "بص وطل"

يوم الجمعة بتحلى اللمة على الأكل..
علشان كده حبينا نشاركك اللمة الحلوة دي..
ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا..
ونقدّم لك كل يوم جمعة اقتراح لعزومة مكوّنة من العصير والطبق الرئيسي وطبق السلطة وطبق الحلو..
علشان تنوّعي لعيلتك.. وتبهريهم بأكلاتك الجامدة..
تعالي بقى نشوف هنعمل إيه النهارده..
**********************
عصير الجزر
عصير الجزر
المقادير:
1/4 كيلو جزر مقشر
1/2 كوب سكر
كوب مية كبير
مكعبات تلج
الطريقة:
هاتي الجزر واغسليه كويس، وبعد كده قطعيه إلى قطع صغيرة، وحطيه في الخلاط، وضيفي إليه السكر والمية واضربيهم مع بعض كويس، وبعد كده صفيه وحطيه في كأسات العصير وحطي معاه مكعبات التلج.
*********************
سلطة الكسبرة الخضراء
سلطة الكسبرة خضراء
لو جرّبتي طبق السلطة ده مرة مش هتنسيه وهتحبي إنك تعمليه على طول مع كل أكلة سمك وعلى فكرة الطبق ده بسيط جداً.
المقادير:
حزمة كسبرة خضراء مقطعة قطعاً صغيرة
2 فصوص ثوم مفرومين
3 حبات طماطم مقطعة قطعاً صغيرة أو طماطم صغيرة سليمة
خيارة مقطعة قطعاً صغيرة
عصير ليمونة
معلقة صغيرة خل
بصلة صغيرة مقطعة قطعا ًصغيرة
ملح
معلقة صغيرة شطة
زيت زيتون
الطريقة:
اخلطي كل المكونات دي مع بعضها، وبعد كده حطيها في طبق السلطة.
**********************
شوربة الجرجير والبطاطس
شوربة الجرجير والبطاطس

المقادير:
حزمة جرجير
2 حبة بطاطس
مكعب مرقة الدجاج
4 أكواب ماء
معلقة ملح
معلقة فلفل
معلقة كمون
3 فصوص ثوم مفرومين

الطريقة:
1- حطي المية في حلة وحطيها على النار وسيبها لغاية ما تغلي، وبعد كده ضيفي إليها مكعب مرقة الدجاج.
2- في الوقت اللي المية بتغلي فيه قشري البطاطس، واغسليها وقطعيها إلى مكعبات صغيرة، وضيفيها إلى المية مع مرقة الدجاج.
3- اغسلي الجرجير وقطعيه، وضيفيه إلى البطاطس، وضيفي إليهم الملح والفلفل والكمون. سيبهم على النار لمدة ربع ساعة أو لغاية ما تلاقي إن الجرجير والبطاطس استوت اطفي البوتاجاز وسيبيها لغاية ما تبرد.
4- هاتي الخلاط وحطي فيه الخليط السابق واضربيه في الخلاط كويس، وبعد كده حطيه على النار مرة أخرى علشان يغلي.
5- أثناء ما بيغلي هاتي الثوم المدقوق وحمّريه في الزيدة، وضيفيه إلى الشوربة، بعد كده حطي الشوربة في أطباق الشوربة.
**********************
صينية السمك على الطريقة المغربية
صينية السمك على الطريقة المغربية

المقادير:
كيلو سمك فيليه "هامور أو أي نوع إنت بتحبيه"
عصير ليمون
شرائح ليمون أو برتقال
زيت زيتون
كسبرة خضراء مفروم ناعم
بقدونس أخضر مفروم ناعم
كمون مطحون
كسبرة مطحونة
شطة حارة ناعمة
شطة حارة خشنة
ملح و فلفل
بطاطس
فلفل أخضر و أحمر مُقطع حلقات
فلفل أحمر حامي (اختياري)
صلصة طماطم
حلقات ليمون
شرائح زيتون بدون بذر
الطريقة:
1- اغسلي السمك كويس.
2- اخلطي عصير الليمون وزيت الزيتون والتوابل والكسبرة الخضراء والبقدونس مع بعض وتبلي بيهم السمك كويس.
3- اسلقي البطاطس وقطعيها إلى شرائح سميكة.
4- حطي حلقات البطاطس في الصينية، وبعد كده حطي السمك بالتتبيلة بتاعته، ومن فوقه حطي الفلفل الأحمر والأخضر والفلفل الحامي وصلصة الطماطم وحلقات الليمون وقطع من الزيتون والكسبرة الخضراء.
5- غطي الصينية وسيبها على البوتاجاز لمدة نص ساعة علشان تستوي، وبعد كده دخليها الفرن لمدة نص ساعة أو لغاية ما وشها يحمرّ.
6- بعد مرور النص ساعة خرّجي السمك من الفرن؛ ممكن مع الطبق ده إنك تعملي طبق رز أبيض.
*********************
تشيز كيك بالمانجا
تشيز كيك بالمانجا

المقادير:
1 علبة بسكويت
1/4 كوب زبدة
علبة جبنة بالكريمة
6 معالق صغيرة جيلي بطعم المانجو
3 حبات مانجو مقطعة قطعاً صغيرة (ممكن تستخدمي علب المانجا المحفوظة)
1/2 كوب عصير برتقال
1/2 كوب سكر
2 معلقة كبيرة عصير ليمون
2 كوب كريمة للخفق
الطريقة:
1- دقي البسكويت كويس لغاية ما يبقى ناعم، وضيفي إليه الزبد الطري وامزجيهم كويس مع بعض.
2- حطي البسكويت والزبدة في صينية مستديرة ذات جوانب متحركة (قطرها 20 سم)، واضغطي عليها بإيدك كويس علشان الخليط ينزل في قاع الصينية، وبعد كده حطي الصينية في الفريزر لمدة ساعة.
3- دوّبي بودرة الجيلي في عصير البرتقال، وحطيهم هما الاتنين على نار هادئة لغاية ما يذوب الجيلي تماماً مع التقليب باستمرار، وبعد كده اطفي البوتاجاز، وسيبي الجيلي لغاية ما يبرد.
4- اضربي الجبن مع السكر في وعاء باستخدام مضرب بيض كهربائي لغاية ما الخليط ده يبقى ناعم، وضيفي إليه عصير الليمون مع الاستمرار في الضرب لمدة دقيقة أخرى.
5- اخفقي الكريمة كويس باستخدام مضرب البيض وضيفي نص الكريمة المخفوقة إلى مزيج الجبن، وقلبيهم مع بعض كويس..
6- هاتي قطع المانجو الصغيرة وضيفيها إلى الجبنة وضيفي عصير البرتقال وقلبيهم مع بعض كويس، وبعد كده صبي المزيج على البسكويت اللي إنت عملتيه، وسوّي السطح بظهر المعلقة وحطيه في التلاجة لمدة 7 ساعات، وبعد كده طلعيه من التلاجة، وزيّنيه بقطع المانجو، والباقي من الكريمة المخفوقة.

وفي النهاية نتمنى إن عزومة النهارده تكون عجبتِك..
وتجربي كل الوصفات وتبعتِ تقولي لنا على النتيجة..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...
"ورينا شطارتِك"
وإلى اللقاء في العزومة الجاية،،،