كبدة الفراخ بالمشروم وتارت الخوخ في عزومة "سفرة دايمة"

يوم الجمعة بتحلى اللمة على الأكل..
علشان كده حبينا نشاركك اللمة الحلوة دي..
ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا..
ونقدّم لك كل أسبوع اقتراح لعزومة مكوّنة من: العصير، والطبق الرئيسي، وطبق السلطة، وطبق الحلو..
علشان تنوّعي لعيلتك.. وتبهريهم بأكلاتك الجامدة..
تعالي بقى نشوف هنعمل إيه النهارده..
***************************
ممكن تزيني الكوبايات بورق النعناع
عصير الشيكولاتة بالنعناع
المقادير:
2 كوب لبن
1/4 كوب بودرة كاكاو
1/2 معلقة صغيرة فانيليا
1/2 معلقة صغيرة نعناع
5-4 معلقة كبيرة آيس كريم
فانيليا
الطريقة:
1- سخّني 1/2 كوب من اللبن اللي عندك، وبعد كده ضيفي عليه الكاكاو، وقلّبيهم مع بعض كويس.
2- بعد ما خليط اللبن والكاكاو يبردوا، حطيهم في الخلاط وضيفي عليهم باقي اللبن والفانيليا والنعناع واضربيهم مع بعض كويس، وبعد كده ضيفي عليهم الآيس كريم واضربيهم مرة كمان في الخلاط، وبعد كده صبي العصير في الكوبايات.. وبالهنا والشفا.
***************************
طبق سلطة جنان
سلطة المكرونة مع الخضراوات
المقادير:
كيس مكرونة
1/4 كيلو بسلة
1/4 كيلو جزر مقطع لقطع صغيرة
1 حبة فلفل أحمر
1 حبة فلفل أخضر
1 حبة فلفل أصفر
6 معالق كبيرة مايونيز
1 معلقة كبيرة مسطردة
4/1 كوب خل
4/1 كوب زيت زيتون
2 معلقة صغيرة زعتر
2 معلقة صغيرة مطحون
ملح وفلفل
الطريقة:
1- اسلقي المكرونة، واسلقي البسلة والجزر.
2- قطّعي الفلفل الأحمر والأصفر والأخضر على شكل عيدان.
3- هاتي طبق وحطّي فيه المايونيز والمسطردة والخل والزيت والزعتر والريحان والملح والفلفل وقلّبيهم مع بعض كويس.
4- حطي المكرونة في طبق السلطة، وضيفي عليها البسلة والجزر وعيدان الفلفل الملون وخلطة المايونيز والمسطردة اللي حضرتيها.. وبالهنا والشفا.
***************************
طبق شوربة مغذي ولذيذ
شوربة الكريمة والفراخ
المقادير:
2 صدور فراخ مسلوقة ومقطّعة لمكعبات
2 كوب شوربة فراخ
كوب لبن
كوب كريمة لباني
صفار بيضة
2 معلقة عصير ليمون
4 معالق دقيق
2 معلقة زبدة
ملح وفلفل
الطريقة:
1- حطي الزبدة في حلة النار، وسيبيها لغاية ما تسيح، وبعد كده ضيفي عليها الدقيق وقلبيه لغاية لونه ما يبقى ذهبي.
2- اضربي صفار البيضة مع اللبن وضيفيه على الدقيق، وقلّبيهم مع بعض على نار متوسطة لغاية ما تحصلي على قوام سميك.
3- بعد كده ضيفي الكريمة اللباني وشوربة الفراخ.
4- بعد كده ضيفي قطع الفراخ للشوربة، وسيبيهم على نار هادية لمدة 10 دقائق.. وبالهنا والشفا.
***************************
طبق مفيد جداً
كبدة الفراخ بالمشروم
المقادير:
1/2 كيلو كبدة فراخ
2 معلقة صغيرة زيت زيتون
كوب مشروم مقطّع لقطع صغيرة
2/1 كوب بصل مقطع لقطع صغيرة
6 فصوص ثوم مفرومين
ملح وفلفل
4/1 كوب لبن
معلقة زعتر مطحون
عصير ليمونة
الطريقة:
1- هاتي كبدة الفراخ، واغسليها كويس، وبعد كده انقعيها لمدة نص ساعة في شوية ملح وعصير نصف ليمونة.
2- بعد كده هاتي الكبدة، واغسليها كويس من الملح والليمون، وبعدين سخني زيت الزيتون في الطاسة، وضيفي له كبدة الفراخ والمشروم والبصل والثوم والزعتر والملح والفلفل، وقلّبيهم مع بعض كويس لغاية ما تلاقي إن الكبدة بقى لونها بني، وبعد كده ضيفي عليهم كمية صغيرة من المية، وسيبي الخليط ده على نار هادئة لمدة ربع ساعة أو لغاية ما تلاقي إن السائل اللي موجود بدأ ينشف.
3- هاتي اللبن وضيفيه عليهم، وسيبيهم على النار لمدة عشر دقائق، وبعد كده اطفي البوتاجاز.
4- هاتي طبق التقديم، وحطي فيه الكبدة وزيّني الطبق بالقدونس.. وبالهنا والشفا.
***************************
ممكن تقدميه بارد أو ساخن
تارت الخوخ
المقادير:
4 معلقة كبيرة زبدة
كوب دقيق
2 معلقة كبيرة سكر
معلقة صغيرة ونصف بيكينج باودر
1/2 معلقة صغيرة ملح
1/2 كوب لبن
مقادير خليط الخوخ:
8 ثمرات خوخ مقطّع لمكعبات صغيرة
1/2 كوب سكر
ملعقة كبيرة نشا
الطريقة:
1- حطي الخوخ في وعاء واخلطي معاه السكر والنشا، وحطيهم مع بعض على النار مع التقليب المستمر، لغاية ما تحسي إن الخليط بقى سميك ومتجانس، وبعد كده صبي الخوخ في صينية الفرن.
2- اخلطي الزبدة مع السكر والبيكينج باودر والملح في الخلاط الكهربائي.
3- بعد كده صبي الخليط في وعاء، وضيفي عليه اللبن، وقلّبيهم كويس لغاية ما يتجانسوا مع بعض.
4- بعد كده صبي الخليط ده فوق الخوخ اللي في الصينية، ودخليه في فرن ساخن على درجة حرارة متوسطة، وسيبيه في الفرن لمدة 20 دقيقة تقريباً أو لغاية ما تحسي إن العجينة بقى لونها ذهبي.. وبعد كده طلعيه وقدميه وبالهنا والشفا.
وفي النهاية نتمنّى إن عزومة النهارده تكون عجبتِك..
وتجرّبي كل الوصفات وتبعتي تقولي لنا على النتيجة..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...
"ورّينا شطارتِك"
وإلى اللقاء في العزومة الجاية،،،