النهارده هنعمل بان كيك شهي ولذيذ علشان تعملي لأطفالك ولزوجك أحلى فطار في إجازة الأسبوع؛ جرّبيه وابعتي قولي لنا رأيك فيه.. بان كيك بالكريمة والعسل المقادير: بيضة كوب دقيق 3⁄4 كوب لبن 2 ملعقة كبيرة سكر 2 ملعقة كبيرة خل أبيض ملعقة صغيرة بيكينج باودر 2 ملعقة كبيرة زبدة سايحة 1⁄2 ملعقة صغيرة بيكينج صودا 1⁄2 ملعقة صغيرة ملح للتزيين: كريم شانتيه عسل أبيض الطريقة: 1- اخلطي اللبن مع الخل في وعاء متوسّط، وقلّبيهم مع بعض وسيبيهم على جنب لمدة 5 دقايق؛ علشان اللبن يتخمّر مع الخل ويبقى قوامه كثيف شوية زي اللبن الرايب. 2- اخلطي الدقيق مع السكر والبيكينج باودر والبيكينج صودا والملح في وعاء كبير. 3- حطّي البيضة والزبدة السايحة في اللبن، واخفقيهم مع بعض بالمضرب اليدوي. 4- ضيفي خليط المكوّنات الجافة على خليط اللبن بالتدريج مع الاستمرار في خلطهم بالراحة بالمضرب اليدوي؛ لغاية ما كل كتل الدقيق تختفي وتدوب تماما. 5- هاتي طاسة تيفال كبيرة، وادهنيها بكمية صغيرة جدا من الزبدة السايحة أو الزيت، وحطّيها على النار وخدي من عجينة البان كيك اللي عملتيها مقدار ربع فنجان شاي وافرديه في الطاسة لغاية ما يبقى شكله دائري وسطحه مستوي، وسيبيه لغاية ما الوش اللي من تحت يتحمّر، وتبدأ تظهر فقاقيع على الوش اللي من فوق، وبعد كده اقلبي البان كيك على الناحية التانية لغاية ما تتحمرّ هي كمان، وممكن تتأكّدي إنها استوت بإنك تغرسي خلة الأسنان في شريحة البان كيك، ولو لقيتي الخلة طلعت نضيفة تبقى استوت. 6- كرّري الخطوة السابقة مع باقي كمية العجينة اللي عندك، وبعد ما البان كيك يبقى جاهز عندك حطّيه في طبق التقديم وزيّنيه بالكريم شانتيه والعسل الأبيض؛ زي ما هو واضح في الصورة، وقدّميه لعيلتك؛ وبالهنا والشفا. (ملحوظة: ممكن تضيفي بعض قطع الفاكهة زي الفراولة أو الموز أو أي فاكهة تحبّيها في البان كيك وإنتي بتعمليه، بإنك تغرزي قطع الفاكهة في قطع البان كيك قبل ما تقلّبيها على الناحية التانية وإنتي بتسوّيه على النار). وبكده تكون خلصت وصفتنا النهارده.. جرّبيها وقولي لنا رأيك فيها.. وماتنسيش تبعتي لنا كل الوصفات.. اللي عايزة تعمليها معانا على "سفرة دايمة".. سلام،،،
