كيكة جوز الهند بطريقة سهلة ولذيذة

هنشوف مع بعض النهارده إزاي تقدري بحاجات بسيطة جدا وبسرعة تعملي كيكة جوز الهند؛ تعالي نشوف مع بعض إزاي..
كيكة جوز الهند
المقادير:
* بيضة
* كوب دقيق
* كوب سكر
* 1⁄4 كوب زبدة
* كوب جوز هند
* 1 1⁄2 كوب لبن
* 3/ 4 ملعقة صغيرة فانيليا
* 3 ملعقة صغيرة بيكينج باودر
* 3/ 4 ملعقة صغيرة ملح
الطريقة:
1- اخفقي البيض في إناء عميق مع الفانيليا، واخلطي السكر والزبدة مع بعض وضيفيهم على البيض، وضيفي معاهم اللبن واضربيهم مع بعض بالمضرب الكهربائي لمدة ربع ساعة، أو لغاية ما تلاقي الخليط بقى عامل زي الكريمة.
2- بعد كده ضيفي الدقيق والبيكينج باودر والملح وجوز الهند بالتدريج على خليط البيض والسكر الزبدة، وقلّبيهم مع بعض كويس باستخدام ملعقة خشب.
3- هاتي قالب الكيك وادهني القاع والجوانب بشوية زبدة ورشّي رشة صغيرة من الدقيق؛ علشان الكيكة ما تلزّقش منك في القالب، وبعد كده صبّي خليط الكيكة فيها.
4- شغّلي الفرن لمدة 5 دقائق، وبعد كده دخّلي قالب الكيكة في الفرن على درجة حرارة متوسطة، وسيبيها لمدة نصف ساعة، أو لغاية ما تلاقي وشها بقى لونه دهبي.
5- ولو عايزة تتأكّدي من إن الكيكة استوت من جوه، ممكن تجيبي سكينة نضيفة وتحطّيها في وسط الكيكة، ولو خرجت السكينة نضيفة زي ما هي يبقى كده الكيكة استوت من جوه، لكن لو خرجت وفيها أي حاجة يبقى الكيكة محتاجة تستنى في الفرن شوية.
6- بعد ما تستوي الكيكة خرّجيها من الفرن، وسيبيها شوية لغاية ما تبرد علشان تقدري تنقليها في طبق التقديم... وبألف هنا وشفا.
وبكده تكون خلصت وصفتنا النهارده..
ماتنسيش تجرّبيها وتبعتي تقولي لنا على النتيجة..
سلاااااااااام،،،