ماسكات طبيعية لترطيب البشرة ومقاومة التجاعيد

أعدّتها للنشر: آية خالد
أهلا بكل بنات "قمر 14" في حلقة جديدة من "جمالك من الطبيعة مع رانيا"، والنهارده هنقدّم لك ماسكات طبيعية لترطيب البشرة الجافة ونضارتها، ولمقاومة التجاعيد وعلامات تقدم السن..
كريم حبة البركة للبشرة شديدة الجفاف
المقادير:
ملعقة كبيرة دهن حبة البركة (متوفر عند العطار)
1⁄4 ملعقة صغيرة حبة بركة مطحونة
ملعقة صغيرة زيت حبة البركة
2 ملعقة كبيرة زيت الجوجوبا
1⁄2 ملعقة صغيرة زيت الورد
ملعقة كبيرة زيت سمسم
ملعقة صغيرة لانولين
ملعقة صغيرة فازلين


إضغط لمشاهدة الفيديو:
الطريقة:
- ضيفي الفازلين مع اللانولين، وحطيهم على نار هادية جدا لحد ما يسيحوا، وضيفي عليهم زيت الورد، وزيت السمسم والجوجوبا ودهن حبة البركة، وقلبيهم دقيقة، وضيفي زيت حبة البركة، وحبة البركة المطحونة، وقلبيهم على نار هادية جدا لمدة دقيقتين، وبعد كده حطيهم في برطمان صغير، واستخدميه لما يبرد كل يوم بالليل ككريم مرطب للوجه والجسم، ما عدا المنطقة حول العينين.
- الماسك ده بيساعد على تأخير التجاعيد وإخفاء العلامات البيضاء، وهو مناسب للسيدات في سن فوق 30.

إضغط لمشاهدة الفيديو:
ماسك الطماطم المضاد للأكسدة والتجاعيد
المقادير:
3 ملعقة كبيرة عصير برتقال
1⁄2 ثمرة طماطم مبشورة
ملعقة كبيرة عسل
الطريقة:
- اخلطي المقادير على بعضها وقلبيها كويس جدا، وحطيها في زجاجة برفان صغير، ورشي منها على وشك مرتين أو تلاتة في اليوم، واشطفيه بعدها بشوية، والماسك ده بيساعد جدا في تأخير ظهور التجاعيد وحماية البشرة والحفاظ على نضارتها.
ماسك زيت الورد لنضارة وتغذية البشرة
المقادير:
ملعقة كبيرة عسل
ملعقة صغيرة زيت ورد
الطريقة:
- اخلطي العسل وزيت الورد مع بعض وقلبيهم كويس، وبعد كده ادهنيهم على جسمك كله بعد الاستحمام بفرشاة الصبغة من أسفل لأعلى، وسيبيه لمدة نص ساعة، وبعد كده اشطفي جسمك.
- الماسك ده بيخلي البشرة نضرة وفاتحة وبيدي لمعة جميلة ومميزة للبشرة، وكمان بيخلي ريحتها حلوة.

إضغط لمشاهدة الفيديو:
ماسك صنفرة لجميع أنواع البشرة
المقادير:
3 ملعقة كبيرة عصير برتقال
2 ملعقة صغيرة سكر بودرة
ملعقة كبيرة لبن بودرة
الطريقة:
- اخلطي المكونات كلها مع بعض، وقلبيهم م بعض جامد لحد ما يبقى قوامهم متجانس ولين، وبعد كده افرديهم على بشرة وشك وجسمك بعد الاستحمام، لمدة عشر دقايق أو ربع ساعة، وبعدها اشطفي وشك بمية.

إضغط لمشاهدة الفيديو:
ماسك الليمون وزيت الزيتون لبشرة نضرة
المقادير:
ملعقة كبيرة زيت زيتون
ثمرة ليمون أخضر كبير
ملعقة كبيرة عسل
الطريقة:
- ابشري الليمونة الخضراء بحيث تاخدي قشرتها بس من غير العصير اللي في قلبها، وبعدها اعصري عليها الليمونة، وبعدها ضيفي العسل، ودوبيه مع الليمون، وبعدها حطي زيت الزيتون وقلبيهم مع بعض.
- حطي الماسك ده على وشك بعد ما تغسليه واعملي بيه مساج لبشرتك، وسبيبيه لمدة 20 – 30 دقيقة، وبعدها اشطفي وشك، الماسك ده بيحافظ على نظافة البشرة ونضارتها، وبيأخر ظهور التجاعيد وعلامات تقدم السن.

إضغط لمشاهدة الفيديو:
وبكده تكون خلصت حلقتنا النهارده..
استنونا في الحلقة اللي جاية..
سلام..