الكبريت والبصل والعنبر لتفتيح البشرة وإزالة البقع والنمش

أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، والنهارده في حلقتنا هنعمل ماسكات طبيعية لعلاج مشكلة شحوب البشرة والنمش والكلف، وهنقول نصائح لإعطاء حمرة طبيعية ونضارة للبشرة..

نصائح لعلاج البشرة الشاحبة
شحوب البشرة له أسباب كتيرة، بعضها عضوي: زي الإصابة بالأنيميا، أو مشكلات الكبد والكلى، علشان كده لو حسّيتي إن بشرتك شاحبة لازم في البداية تعملي بعض التحاليل والفحوصات علشان تطمني على صحتك، وكمان تلتزمي بتناول أكل صحي ومفيد وماتنسيش الخضراوات الطازجة وخاصة الورقية، وبعد كده تبدأي تتّبعي بعض النصائح اللي هنقول عليها دلوقتي..
- ممكن تستخدمي أنواع الكولونيا العادية اللي بتكون بالبرتقال أو اللافندر، وتحطّي منها كمية بسيطة على إيدك وتوزّعيها على بشرة وشك بالراحة بعد ما تنظّفي البشرة كويس، والطريقة دي بتدي حمرة طبيعية للبشرة، بس خلّي بالك إنك بتحطّي الكولونيا دي بعد ما تعملي ماسك لبشرتك وترطبيها كويس، وتغسليها مرة بميه سخنة وبعد كده تغسليها من 3 : 4 مرات بالميه الباردة.
- ممكن تعملي مساج لبشرتك باستخدام فوطة مبللة بميه سخنة؛ عن طريق إنك تحرّكيها على بشرتك بشكل دائري لمدة 10 دقائق، مرة الصبح ومرة بالليل.
- ممكن تعملي كمادات لبشرتك باستخدام قطنة مبللة بميه مدوّب فيها ملح، وبعد كده تعملي لها كمادات بقطن مبلل بلبن دافي لمدة 3 دقائق، وفي الآخر تحطّي على بشرتك شرائح الخيار، أو تعملي كمادات بعصير الخيار البارد.
إضغط لمشاهدة الفيديو:
ماسك الكبريت واللبن لإزالة الكلف والنمش
الماسك ده مفيد جدا في علاج الكلف والنمش والبثور السوداء وحبوب البشرة، والماسك ده ممكن نعمله مرتين في اليوم مرة الصبح ومرة بالليل..
المقادير:
1⁄2 ملعقة صغيرة كبريت مطحون (هتلاقيه عند العطار)
4 ملعقة صغيرة لبن حليب
الطريقة:
اخلطي المقادير دي مع بعضها كويس، وبعد كده حطّيها على بشرتك، وسيبيه على البشرة لمدة 20 دقيقة، وبعد كده اغسلي وشك بميه عادية من الحنفية، وبعد كده حطّي على بشرتك مسحة خفيفة من زيت اللوز المر؛ لكن لو بشرتك فيها حبوب ممكن تحطّي عليها عسل نحل توزّعيه على بشرتك من أسفل لأعلى، والماسك ده ممكن تعمليه يوميا، وتستمري عليه من شهر : 3 شهور علشان بشرتك تستجيب، والماسك ده ممكن تحتفظي به في الثلاجة لمدة يومين مش أكتر من كده.
مساج البصل لتفتيح البشرة وإزالة البقع
كل اللي عليكي إنك تجيبي بصلة صغيرة وتفرميها، كويس وتعملي بها مساج لبشرتك على شكل حركات دائرية من أسفل لأعلى، بس ابعدي عن منطقة العيون، وسيبي الماسك ده على بشرتك لمدة ربع ساعة، مع تكرار المساج 3 مرات خلال الفترة اللي هتسيبي فيها الماسك على بشرتك، وبعد كده اشطفي وشك كويس بالميه، والمساج ده بيعمل على تأخير ظهور التجاعيد وإزالة النمش والبقع.
وممكن تستخدمي كمان عصير البصل أو مية البصل في عمل ماسك لتفتيح البشرة وعلاج الكلف والنمش.. ودي المقادير اللي هتحتاجي لها:
المقادير:
ملعقة صغيرة عصير بصل
ملعقة صغيرة خل تفاح
ملعقة صغيرة عسل نحل
الطريقة:
اخلطي المقادير دي كويس مع بعضها، وحطّي منه كمية مناسبة على بشرتك، وسيبيه لمدة من 15 : 20 دقيقة، واستمري عليه يوميا أو يوم ويوم، على حسب حالة بشرتك واحتياجها، وبعد كده اشطفي بشرتك بالميه العادية، وادهني بشرتك بمسحة خفيفة من زيت اللوز المر.

إضغط لمشاهدة الفيديو:
زيت العنبر لإزالة وتفتيح بقع البشرة
المقادير:
1⁄4 ملعقة صغيرة زيت عنبر
1⁄4 ملعقة صغيرة جلسرين
ملعقة صغيرة عصير ليمون
ملعقة صغيرة سبرتو أبيض (هتلاقيه في الصيدليات)
ملعقة صغيرة عسل نحل
الطريقة:
اخلطي كل المقادير دي مع بعضها، وحطّيها على بشرتك يوميا أو يوم ويوم، وممكن تحتفظي بالماسك ده في الثلاجة من 4 : 7 أيام.

إضغط لمشاهدة الفيديو:
ماسك لترطيب البشرة الجافة والعادية
المقادير:
* عصير نصف ليمونة
* 1⁄4 ملعقة صغيرة عسل نحل
* 1⁄4 ملعقة صغيرة جلسرين
* 3 ملعقة صغيرة لبن حليب
الطريقة:
اخلطي المقادير دي مع بعضها كويس، وحطّيه على بشرتك وممكن تسيبيه على بشرتك طول الليل، والصبح تغسلي بشرتك بدقيق الذرة، بعد ما تشطفيها بالميه العادية، والماسك ده ممكن تعمليه يوميا، والماسك ده بيعمل ترطيب عالي للبشرة، وكمان بيفتّحها وبيعمل على تأخير ظهور التجاعيد.

إضغط لمشاهدة الفيديو:
وبكده تكون خلصت حلقتنا..
في انتظار أسئلتكم وتعليقاتكم..