ماسك الأرز والياسمين لترطيب وتعطير الجسم.. والنخاع لتنعيم الشعر

أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"
النهارده حلقتنا هيكون فيها حاجات كتير للشعر..
هنعرف إزاي نستخدم النخاع لعلاج مشكلات الشعر..
وكمان هنعمل ماسك الترمس والحلبة لكل أنواع البشرة، تابعونا.

ماسك الترمس والحلبة لكل أنواع البشرة
المقادير:
* ملعقة كبيرة ترمس مطحون
* ملعقة كبيرة حلبة مطحونة
* ملعقة كبيرة لوز مطحون
* ملعقة صغيرة زيت ورد
* ملعقة كبيرة عسل نحل
* 2 ملعقة كبيرة زبادي
* عصير ليمون
الطريقة:
اخلطي كل المكونات مع بعض، وبعدين اعجنيهم بالزبادي كويس.
الماسك ده بيمشي مع كل أنواع البشرة وكل الأعمار؛ لأنه بيدي ترطيب، ونعومة، وتنظيف، وتغذية، وروقان للبشرة، وتفتيحها كمان.
بالنسبة للسن فوق 45 سنة هيضيفوا على الماسك إضافات تانية؛ زي مثلا كبسولة فيتامين (أ)، أو ممكن يضيفوا زيوت طبيعية؛ زي زيت جنين القمح، أو الجوجوبا، أو بذر الكتان، ولكن كبسولة الفيتامين هتكون أفضل.
بنوزع الماسك ده على بشرة نظيفة، ونسيبه لمدة من ساعة إلا ربع لساعة، وبعدين نشطفه ونعطر وشنا بمية الورد، وبعدين هنكرره مرة كل أسبوع أو 10 أيام مش أكتر من كده، وده هيكون كافي أوي للبشرة.

إضغط لمشاهدة الفيديو:
ماسك الرز والياسمين لسنفرة وتعطير الجسم
المقادير:
* 2 ملعقة كبيرة رز مطحون
* 3 ملاعق زيت الياسمين
* مقدار ميه ساخنة جدا
الطريقة:
هنخلط الرز وزيت الياسمين، وبعدين نحط عليه مقدار من الميه الساخنة جدا؛ بحيث تكون العجينة لزجة ومرملة وماتكونش سايلة أوي، وطبعا هنزود المقادير دي على حسب حجم كل جسم.
بناخد من الماسك ده على الجسم كله ونبعد عن الوش، ونفرك جسمنا كويس، وكمان ممكن نزود منه في منطقة الكوع والركبة، وكمان في الأماكن الخاصة، ونسيبه على الجسم لمدة من ساعة إلا ربع لساعة، ويفضل إننا نسيبه ساعة علشان يجيب نتيجة هايلة، وبعدين نشطف جسمنا بالميه فقط من غير صابون أو شاور جل.
طبعا الماسك ده من الماسكات اللي بترطب وتنعم الجسم جدا؛ لأنه بيعمل سنفرة قوية، كمان بتخلي الجسم ريحته حلوة أوي، وده بسبب زيت الياسمين، وعلشان كده بنحط منه كمية كبيرة على الماسك.

إضغط لمشاهدة الفيديو:
ماسك النخاع للشعر
المقادير:
* ماسورة نخاع (من عند الجزّار)
* ملعقة كبيرة زيت خروع
* ملعقة كبيرة زيت زيتون
الطريقة:
هنسلق الماسورة كويس؛ وبعدين ناخد النخاع من جواها وندوبها بالملعقة، وبعدين نضيف عليه الزيوت التانية، ونخلطهم كويس أوي.
هنحط منه على جذور الشعر وعلى الشعر نفسه، ونسيبه لمدة من ساعتين لثلاث ساعات، ويفضل إننا نلبس بونيه على شعرنا، ونحط فوطة سخنة على شعرنا كل 10 دقائق؛ لأن النخاع مع الوقت بيتجمد على الشعر، وبلاش نستعمل السيشوار مع الماسك، وهنكرره مرة كل أسبوع.
الماسك ده بينعم الشعر جدا وبيغذيه وبيقويه ويرطبه.

فوايد مية الورد:
* غسل البشرة يوميا بمية الورد بيخلي البشرة نقية وجذابة وطبعا ريحتها حلوة.

* شرب مية الورد كل يوم الصبح بيخلي البشرة صافية، وبيفتحها، ويغذيها.

* بتساعد على قفل مسام البشرة، وعلاج حب الشباب، ولو حطينا منه على وشنا 10 مرات في اليوم بيساعد جدا على ترطيبها، وبتدي طراوة للبشرة وبيخليها نقية.

* بتساعد في علاج الانتفاخات البسيطة اللي تحت العين، ولكن الانتفاخات الشديدة ممكن تساعد في تهدئتها فقط.

* بتساعد على علاج الهالات السودا، وكمان بتغذي الرموش.

* خليط مية الورد والنشا بيساعد في تفتيح البشرة، كمان لو استخدمناه للأطفال بيساعد في تهدئة أي تهيج في البشرة.

إضغط لمشاهدة الفيديو:

خلصت حلقتنا النهارده
استنونا الحلقات الجاية؛ هنقدم لكم حلقات خاصة للعروسة
وكمان لسه معانا ماسكات للبشرة والشعر
سلام،،،
*********************
للرجوع للحلقات السابقة
اضغط هنا "جمالك من الطبيعة مع رانيا"
*********************