جمالك من الطبيعة مع رانيا.. لتفتيح الكوع والركبتين وتوحيد لون الجسم

أهلاً بيكم في حلقة جديدة من حلقات "جمالك من الطبيعة مع رانيا"..
النهارده هنكمّل مع بعض حلقاتنا عن العناية بالبشرة والشعر في فصل الخريف والشتاء...
وهنعرف إيه المشكلات اللي بتواجهنا في الوقت ده من السنة وإزاي نتعامل معاها بطرق طبيعية 100%...
وخاصة جفاف الشعر والبشرة، والقشور اللي بتظهر على الجلد سواء في فروة الرأس أو على بشرة الوجه...
مش بس كده ده إحنا هنتكلّم عن حنة الشعر، وإزاي نجيب نوع كويس، ونعملها إزاي على شعرنا بالطريقة الصحيحة...
إضغط لمشاهدة الفيديو:
الزنجبيل.. لتفتيح الكوع والركبتين
الزنجبيل من الحاجات المفيدة جداً للجسم والصحة، لكن مش كل الناس تعرف إن له فوايد تجميلية كتيرة جداً سواء للبشرة أو للشعر...
والماسك اللي هنعمله دلوقتي عبارة عن:
* ملعقة كبيرة زنجبيل مطحون
* عصير ليمونة ونصف
* ملعقة ملح ناعم
نخلط المكوّنات مع بعضها كويس؛ بحيث إننا نحصل على قوام متماسك يعني مش سايب أوي ولا جامد أوي، ولو كان الليمون بتاعنا مافيهوش عصير كتير ممكن نزوّد عصير الليمون شوية.
وطبعاً الماسك ده بنحطّه على الكوع والركبتين بعد ما ناخد شاور علشان الجسم يكون نظيف تماماً.
وبنسيب الماسك على البشرة لمدة 20 : 30 دقيقة أو لغاية ما ينشف تماماً على البشرة.
وبعد كده نشطف البشرة كويس، وندهن المناطق دي بزيت اللوز الحلو؛ لأن الماسك ده مكوّناته جامدة شوية على البشرة، وبالتالي لازم نرطب البشرة كويس بعد ما نعمله، بالإضافة إلى أن زيت اللوز بيساعد على تفتيح البشرة وتنعيمها.
والماسك ده بنستخدمه بشكل يومي لمدة شهر، وبعد كده بنستخدمه مرتين في الأسبوع لفترة طويلة شوية من 3 : 4 شهور، وبجد مع المواظبة عليه هتحسّي بنتيجة كويسة جداً، وهتحسّي إن الجلد في المناطق دي بقى ناعم وفاتح وفيه نضارة.

إضغط لمشاهدة الفيديو:
صابون النشا وزيت الزيتون لتفتيح وتنعيم بشرة الجسم
الصابون اللي هنعمله دلوقتي بيستخدم لتفتيح وتنعيم بشرة الجسم فقط؛ يعني ما بنستخدمهوش على بشرة الوجه...
ومكوّنات الصابون ده عبارة عن:
* صابونة عادية متوسّطة مبشورة
* فنجان مية ورد (تركيزها متوسّط أو تقيل)
* 1/ 2 كوب عصير ليمون
* ملعقة كبيرة زيت زيتون
* ملعقة كبيرة زيت لوز حلو
* ملعقة كبيرة نشا
* بشر ليمونة
نبدأ أول حاجة إننا نسخن مية الورد على النار، وبعد كده نضيف عليها الصابون المبشور، مع الاستمرار في التقليب، لغاية ما الصابون يسيح تماماً ويندمج مع مية الورد كويس أوي، وبعد كده نضيف عصير الليمون، وأوّل لما نضيف عصير الليمون هنلاحظ إن الخليط مابقاش متماسك زي الأول، وبدأ يتقطّع معانا، وبعد ما نقلب الخليط شوية هنبدأ نضيف زيت الزيتون وزيت اللوز، وبعد كده هنضيف النشا وهنضيفها تدريجياً علشان ماتكلكعش في جزء معين، وطبعاً مع التقليب المستمر، وبعد كده هنضيف بشر الليمون، ونقلّب المكوّنات كويس أوي على النار لغاية ما نتأكّد إن الصابون والنشا اندمج تماماً مع بعضه.

إضغط لمشاهدة الفيديو:
وبعد كده نصبّ الصابون في برطمان زجاج وله غطاء، ونشيله لمدة يوم في الثلاجة، وبعد كده نبدأ نستعمله، ولما نيجي نستخدمه بنطلعه قبلها بساعة، وناخده معانا في الحمام، ولما نخلّص لازم نرّجعه في الثلاجة مرة تانية؛ لأن الصابون ده مافيهوش أي مواد حافظة، وممكن لو سيبناه برّه الثلاجة، الصابون مع زيت الزيتون مع الليمون يعملوا طبقة عفن، علشان كده يفضّل إننا ما نعملش كميات كبيرة من الصابون ده، يعني نكتفي بالمقدار اللي عملناه النهارده ولما يخلص نعمل تاني.
وبانصح وإحنا بنعمل أي ماسك إننا نستخدم ملاعق وأواني أركوبال أو زجاج أو خشب أو ستانلس ستيل، لكن نبعد عن الحاجات المعدن أو البلاستيك لأن الليمون أو الخل بيتفاعل مع المواد دي.

إضغط لمشاهدة الفيديو:
والصابون ده بنستخدمه بعد ما ناخد الشاور بتاعنا العادي، ونفرك جسمنا كويس باستخدام الليفة العادية أو الليفة المغربية والصابون أو الشاور جل العادي اللي بنستخدمه، علشان نفتّح مسام الجسم.. وبعد كده بندهن الصابون اللي عملناه دلوقتي على جسمنا زي الكريم، وبنسيبه لمدة 20 : 30 دقيقة، وبعد كده نشطف جسمنا كويس.
والصابون ده ممكن نستخدمه بشكل يومي مع الشاور اليومي بتاعنا لمدة شهر، علشان نفتّح المناطق الغامقة في الجسم ونوحّد لونه، وبعد كده ممكن نستخدمه مرتين في الأسبوع.

إضغط لمشاهدة الفيديو:
وبكده تكون خلصت حلقتنا النهارده...
نتمنّى إنها تكون عجبتكم...
وتابعونا في الحلقة اللي جاية...
علشان هنعمل وصفات كتيييير خاصة بالشعر...
انتظرونا،،،

*********************
للرجوع للحلقات السابقة
اضغط هنا "جمالك من الطبيعة مع رانيا"
*********************