جمالك من الطبيعة مع رانيا.. حلقة خاصة لعروسة "قمر 14"

هنبدأ حلقتنا النهارده واللي هتكون عن المشاكل اللي بتقابلها العروسة وهي بتجهّز نفسها للفرح...
وأهم حاجة أحب أبدأ بها حلقتنا هي إني أؤكد على أهمية ودور النظافة الشخصية في الحفاظ على جمال بشرتنا وشعرنا، وطبعا اتكلمنا كتير في الحلقات السابقة عن النظافة والعناية الشخصية...
وكمان فيه حاجة تانية عايزة أؤكد عليها وهي إننا لازم نهتمّ بنفسنا مش بس قبل الفرح، ولكن بعد الجواز كمان، يعني مش بس نهتم بجمالنا قبل الفرح، لكن لازم نحافظ دايما على إننا نظهر بأفضل شكل...
وفي حلقة النهارده هنعرف مع بعض إزاي نتغلّب على مشكلة الخطوط البيضاء واسمرار البشرة، وخصوصا المناطق الحساسة، وكمان الكوعين والركب، وهنعرف إزاي نعالج تساقط الشعر، وإزاي نظهر ببشرة نضرة ولها طلّة منورة دايما...
تخلّصي من الوزن الزائد بطرق طبيعية
قبل ما نتكلم عن العناية بالبشرة والشعر، مش هننسى المشكلة اللي دايما بتؤرق معظم البنات قبل الفرح وهي مشكلة الوزن الزائد، علشان كده هاقول لكم النهارده بعض الطرق الطبيعية اللي بتساعد على تقليل الوزن بشكل سريع خلال 15 يوم:
- العسل مع الشاي الأخضر: بناخد ملعقة عسل الصبح على الريق، وبعدها نشرب كوب من الشاي الأخضر، والطريقة دي بتدي نضارة للبشرة بسبب العسل الأبيض، وكمان زي ما كلنا عارفين إن الشاي الأخضر بيقلل الوزن، ولكن مع المداومة عليه، يعني ناخد من 4 ل5 أكواب في اليوم، وكل كوب يكون فيه في حدود 200 مللي.
- كوكتيل البرتقال والجريب فروت: نهتم دايما إننا نشرب عصير البرتقال على مدار اليوم، وممكن نخلط معاه عصير جريب فروت أو نشرب عصير الجريب فروت لوحده.
- خلطة الأعشاب الطبيعية: دي خلطة جميلة أوي بتساعد على تقليل نسبة الدهون الموجودة في الجسم وهي عبارة عن كمون وزنجبيل وشاي أخضر ونعناع، وبنغلي الثلاثة مع بعض بمقادير متساوية.
- الماء مع الليمون والكمون: بنجيب كوب فيه ميه دافية، ونقطّع عليها شرائح ليمون، ونحطّ عليهم نصف ملعقة كمون، ونسيبهم من بالليل للصبح ونشربهم على الريق، وممكن بعد ما ناخد الكوكتيل ده بنصف ساعة ناخد ملعقة العسل اللي قلنا عليها في أول طريقة، وبعد كده ناخد كوباية الشاي الأخضر.
لكن عايزة أنبّه إن لو أي عروسة بتعاني مشكلة صحية زي مرض السكر لازم تستشير الدكتور بتاعها قبل ما تستخدم الطرق دي.
الأكل الصحي ضروري للحفاظ على وزنك وبشرتك وشعرك
مع استخدام الطرق الطبيعية للتخسيس اللي قلنا عليها، لازم نهتم بالتغذية الجيدة؛ لأننا لو استخدمنا حاجات بتسيح الدهون من غير تغذية كويسة ممكن تأثر على نضارة بشرتنا.
ولازم كمان نهتم إننا ناكل الأكلات الصحية اللي بتدّينا طاقة من غير دهون، زي إننا ناخد مثلا قطعة فراخ أو لحمة أو سمك، ونحاول على قدّ ما نقدر نكتّر من السمك، بالإضافة إلى سلطة خضراء أو سلطة زبادي أو سلطة بنجر، وخصوصا إن سلطة البنجر دي بتعتبر من السلطات المهمة جدا للبشرة والشعر، ومش لازم ننسى كمان أهمية شرب المية بكميات كبيرة خلال اليوم.
وطبعا بنات كتير هتقول لي إن قبل الفرح بابقى مشغولة طول النهار وبانزل أشتري حاجات كتير طول اليوم، ومش بالاقي وقت آكل إلا بالليل، لكن لازم نحاول على قد ما نقدر إننا نوزّع وجباتنا على طول اليوم، أما فترة بالليل دي ممكن ناكل فيها حاجات خفيفة؛ زي: التفاح مع كوب زبادي وعليه ملعقة عسل نحل أو ملعقة جنين قمح، ولو اتّبعنا النظام ده بدقة هتلاقي وزنك نزل بشكل ملحوظ خلال 15 يوم بالكتير.

إضغط لمشاهدة الفيديو:
نصائح بسيطة تظهر جمالك في الفرح
من الحاجات المهمة أوي كمان لو كنتي عروسة إنك تُحسني اختيار لون الفستان، بحيث إنه يكون مناسب ولايق مع لون بشرتك، ده طبعا بالنسبة لفساتين الخطوبة، وبالنسبة لفساتين الزفاف لازم يكون التطريز والشغل اللي عليه بسيط وشيك، يعني مش لازم نقلّد حد أو نجري ورا الموضة؛ لأن كل ما كان الفستان بسيط وهادي والمكياج شكله طبيعي هيديكي شكل راقي ومميز في فرحك.
ومن ضمن الحاجات اللي عرايس كتير بتقع فيها هي إنها تلبس إكسسوارات من الذهب الأصفر على الفستان الأبيض، وطبعا ده مش مقبول تماما؛ لأنه بيدي شكل مش لطيف، وبيبقى مش متناسق مع بعضه، يعني بما إنك لابسة فستان أبيض يبقى أكتر حاجة هتليق عليه هي اللولي والألماظ والإستراس.
كمان بلاش تجيبي حذاء بكعب عالي ومبالغ فيه؛ لأنه مش هيديكي حرية في الحركة وهيخليكي مقيدة في حركتك، والأفضل إنك تكتفي بكعب 4 سم.
اعتني بشعرك بعد الصبغة
طبعا وإنتي عروسة بتبقي عايزة تغيري لون شعرك قبل الفرح؛ ولكن بتبقي خايفة إن الصبغة تضرّ شعرك وتسبب له مشاكل أكتر من اللي بيعاني منها أصلا، وعلشان تتجنبي المشكلة دي، من الأفضل إنك تصبغي شعرك الأول، وبعد كده تقصّيه، وبعدين تتبعي كورس مكثف للعناية بالشعر.
وعلى فكرة الشعر من الحاجات اللي بيظهر عليها آثار الاهتمام بسرعة لو اعتنينا بيه؛ لكن اللي بتعاني مشكلة تساقط الشعر أو إن فيه مناطق خفيفة فيه أو مش بيطول بسرعة، كل ده هيحتاج منك إنك تبدئي العلاج من بدري يعني من 6 شهور قبل الفرح؛ لأن علاج المشكلات دي بيحتاج لوقت ومواظبة علشان الماسكات تجيب نتيجة معاه.
ومن أنواع حمامات الزيوت اللي بتعالج مشكلات الشعر، هي حمام زيت مكوّن من مقادير متساوية من زيت الثوم وزيت جوز الهند وزيت الجرجير، وبتوزعيهم على شعرك بعد ما تغسليه كويس، وبتسيبيه على شعرك من 3 - 4 ساعات، وبعد كده تغسليه مرة كمان، وحمام الزيت ده ممكن تعمليه من مرتين لثلاثة في الأسبوع علشان تحسي بنتيجة، ولما تبدئي تعملي حمام الزيت ده هتحسي إن مشكلة تساقط الشعر قلّت بعد أسبوعين، أما بالنسبة لتكثيف وتطويل الشعر فده هيحتاج إنك تواظبي على حمام الزيت ده لفترة أطول شوية.
كمان زيت القرفة من الزيوت الحلوة أوي اللي بتستخدم لتكثيف وتطويل الشعر، وإن شاء الله هنستخدمه في ماسكات كتيرة في الحلقات الجاية.

إضغط لمشاهدة الفيديو:
ماسك طبيعي لتفتيح البشرة والتخلّص من الخطوط البيضاء
بالنسبة لمشاكل بشرة الجسم والاسمرار اللي بيظهر في بعض المناطق من الجسم، ففيه حاجات معروفة كل العرايس بتلجأ لها زي الحمام المغربي، وطبعا ده من الحاجات المفيدة والجميلة واللي بتجيب نتيجة حلوة أوي، وممكن تستخدمي الليفة المغربي من مرة لمرتين في الأسبوع، ولما بتيجي تستخدميها بتفركي بها جسمك في حركات دائرية، وميزة الليفة دي إنك بتقدري توصلي بها للثنايا الصغيرة في الجلد في الكوع والركب وعند منطقة الأذن.
وطبعا لما بنيجي نعمل ماسك لبشرة الوجه والجسم المفروض إننا ناخد دُش الأول بالليفة سواء المغربي أو المصري، وبعد كده نبدأ نعمل ماسكات تفتيح وترطيب للبشرة.
ودلوقتي هنعمل مع بعض ماسك لتفتيح بشرة الوجه والجسم، وكمان بيعمل على إزالة الغمقان اللي بيسببه تراكم الأتربة والشوائب على البشرة...
الماسك ده مكوناته:
* قطعتين أو ثلاثة من لسان البحر "هتلاقيه عند العطار"
* ملعقة شوفان
* ملعقة ترمس مطحون
* ملعقة عشب اللافندر
* 3 - 4 قطع صغيرة من الطمي المغربي
* ورد مجفف
الطريقة:
بنطحن كل المكونات مع بعضها، وبناخد من البودرة دي ونحطها على جسمنا ووشنا وهو مبلول بس نتجنب منطقة العيون، ونسيبه لمدة 3 دقائق، وبعد كده نبدأ نفرك جسمنا بإيدينا مش بالليفة.
ومع استخدام الماسك ده هنحصل على بشرة رايقة صافية ولونها فاتح، وكمان مع المواظبة عليه بيقلل من الخطوط البيضاء اللي بتظهر على البشرة في بعض المناطق.

إضغط لمشاهدة الفيديو:
وبكده تكون خلصت حلقتنا النهارده
وفي النهاية أتمنى لكل العرايس حياة سعيدة وجميلة مليانة بالأفراح
واستنونا في حلقة عيد الأضحى
وكل سنة وإنتم طيبين،،،