جاوبوني بسرعة من فضلكم قبل ما أجل معاد فرحي، ويبقى ذنبي في رقبتكم.. أنا فرحي كمان شهر، وأنا مش محجبة، والمفروض إن الفترة دي أبدأ في اختيار تسريحة للفرح. وبصراحة مش عارفة أختار أي حاجة، فيا ريت تساعدوني وتقولوا لي أعمل إيه؛ لأني ما ليش حد غيركم أستشيره... ده كان نموذج من المئات من المشاركات اللي جت لينا خلال الفترة اللي فاتت، وإحنا قلنا: "حاضر.. هنعمل عدد مخصوص نتكلّم فيه عن الموضوع ده.. وفعلاً قعدنا نلف وندور وفي الآخر عملنا العدد. يلّا نشوف مع بعض... إزاي تختاري التسريحة المناسبة؟! علشان تقدري إنك تختاري تسريحة شعر مناسبة يبقى لازم تكون حاطة في دماغك الأربع اعتبارات دول: 1- شكل وجهك. 2- شكل فستانك. 3- مكان الحفل. 4- شخصيتك. أولاً: شكل وجهك ودي أهم نقطة لازم تاخدي بالك منها، علشان كده عايزاك قبل ما تختاري تسريحة شعرك تقفي قدام المرايا وتدرسي شكل وجهك كويس أوي، وتشوفي إيه العيوب الموجودة فيه، واللي ممكن إنك تخفيها بتسريحة شعرك.. وإيه أماكن الجمال الموجودة فيه واللي ممكن إنك تظهريها بتسريحة شعر مناسبة. يعني مثلاً لو كانت تفاصيل وجهك كبيرة، يبقى ممكن إنك تخفيها باختيار تسريحة شعر كبيرة، أو إنك تختاري تسريحة بها بعض من الإكسسوارات الضخمة علشان تداري التفاصيل دي، لكن لو كانت معالِم وجهك صغيرة يبقى اختاري تسريحة حجمها بسيط جداً، أو إكسسوارات حجمها صغير. وده لأن اختيارك لتسريحة شعرك لازم يكون على أساس شكل وجهك، واوعي تختاري تسريحة شعرك على أساس إنك شوفتي صديقتك كانت عاملة التسريحة دي في فرحها والتسريحة عاجبتك وعايزة تعملي زيها؛ وده لأن كل وجه وليه تسريحة مناسبة تليق عليه. وعلشان تقدري إنك تختاري التسريحة المناسبة ليكِ فعلاً، يبقى لازم تقعدي مع الكوافير اللي هتعملي عنده ماكياجك وتسريحة شعرك أكتر من مرة قبل معياد الفرح بفترة كافية وليكن مثلاً عشرة أيام، وتختاري أكتر من تسريحة من أكتر من كتالوج خاص بتسريحات الشعر، وتسأليه عن أكتر صورة وشكل ممكن إنه يكون مناسب ليكِ؛ وده لأنه أكتر واحد يقدر إنه يحدد لك إيه المناسب وغير المناسب. وفي النهاية لما تستقروا على شكل معين، اطلبي منه إنه يصممه ليكِ كبروفة قبل الفرح بأسبوع مثلاً، علشان تتأكدي إن الشكل ده فعلاً مناسب ليكِ، على فكرة ممكن إنك تضيفي بعض التعديلات في التسريحة اللي أنتِ اخترتيها، بحيث يكون في التسريحة دي بصمتك أنتِ. وعايزاكِ ما تزعليش لو التسريحة اللي اخترتيها طلعت مش لطيفة أو مش مناسبة ليكِ؛ لأن لسة قدامك الوقت إن تختاري واحدة تانية وتعملي نفس الخطوات اللي فاتت. يا ريت إنك تحرصي في اختيارك على اختيار التصميمات البسيطة، وابعدي نهائياً عن التصميمات المعقدة؛ وده لأن جمال العروسة بيكون في بساطتها في تسريحة شعرها وماكياجها، وبلاش تمشي ورا الموضة في اختيار تسريحة شعرك؛ لأن الموضة دي ممكن تكون مش مناسبة ليكِ.
ثانياً: شكل فستانك أنتِ طبعاً عارفة إن فستان الفرح أو الخطوبة له أكتر من تصميم، علشان كده عايزاكِ تكوني حاطة في اعتبارك وأنتِ بتختاري تسريحة شعرك شكل فستانك، ويا ريت إنك توصفيه أو ترسميه للكوافير اللي هيعملك تسريحة شعرك علشان يقدر إنه يساعدك على الاختيار الصحيح... فلو كان مثلاً فستانك كلاسيك وبسيط يبقى اختاري التسريحة الكلاسيك البسيطة، علشان يكون الجو العام والشكل العام واحد وما فيش تناقض بين شكل الفستان وشكل تسريحة الشعر.
كمان حطي في اعتبارك تطريز الفستان؛ فكل ما كان الفستان فيه تطريز وشغل كتير يبقى في الوقت ده هتختاري تسريحة بسيطة وما فيهاش إكسسوارات كتير، لكن لو كان الفستان تطريزه خفيف يبقى أنتِ في الوقت ده هتختاري تسريحة فيها شغل كتير وإكسسوارات كتير. ثالثاً: مكان الحفل مكان الحفل برضه يبفرض عليكِ شكل تسريحة شعرك، فمثلاً لو كنتِ هتعملي الحفل في مكان مفتوح زي جنينة فيلا أو على حمام السباحة، يبقى لازم تختاري تسريحة بسيطة جداً ما فيش فيها شغل كتير، وممكن إنك تحطي على شعرك بعض من الورد الطبيعي أو إنك تعملي تموجات خفيفة في شعرك أو يكون مجعد علشان يناسب جو الفرح، لكن لو كنتِ هتعملي الفرح في قاعة فالمجال قدامك واسع لإنك حتختاري أي تسريحة أنتِ عايزاها.. رابعاً: شخصيتك طبعاً كل بنت وليها شخصيتها الخاصة بيها، ففي البنت الهادية وفيه البنت الروشة، علشان كده عايزاكِ تكوني صادقة مع نفسك، وتختاري تسريحة الشعر اللي تحسي إنها تشبه شخصيتك.. علشان ما تبقيش حاسة إنك غريبة عن شخصيتك في الفرح.
ودي مجموعة متنوّعة من أحدث تسريحات الشعر لعام 2010
أحدث تسريحات الشعر لعام 2010 * صحة وجمال اضغط على الصورة لمشاهدة الجاليري:
وبكده يكون خلص عددنا النهارده.. ومستنيين نعرف رأيكم إيه في عددنا النهارده.. ولو عندك أي سؤال أو استفسار ابعتِ وقولي لنا على طول.. سلام،،،،
