أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، حلقتنا النهارده هنعمل فيها ماسكات بالفراولة لبشرة فاتحة ورايقة من غير تجاعيد، وهنعمل منها كمان مزيلات طبيعية للماكياج تابعونا وابعتوا قولوا لنا رأيكم... ماسك الفراولة والطمي للبشرة الدهنية المقادير: * ملعقة كبيرة قشطة * 3 ملعقة كبيرة عصير فراولة * قطعة طمي صغيرة مطحونة (في حجم عين الجمل) * 3 ملعقة صغيرة زيت لوز حلو * ملعقة صغيرة عسل نحل * ملعقة صغيرة زيت بندق * 3 أو 4 نقط مية ورد الطريقة: اخلطي القشطة مع عصير الفراولة كويس جدا. اخلطي باقي المكونات؛ وهي: (الطمي المطحون والعسل وزيت اللوز وزيت البندق ومية الورد)، وخدي من الخليط ده ملعقة كبيرة، وضيفيها على خليط الفراولة والقشطة. الماسك ده ممكن تعمليه مرة واحدة في الأسبوع، وبتفرديه على بشرة الوش والرقبة، وسيبيه على بشرتك لمدة من 20 : 30 دقيقة وبعد كده اشطفيها بالميه العادية، وعلى فكرة ممكن تستخدمي الماسك ده على بشرة جسمك وعلى المناطق الحساسة كمان، ومع الاستخدام هتحصلي على بشرة فاتحة رائعة وصافية ونظيفة جدا.
إضغط لمشاهدة الفيديو: مزيل للماكياج بالفراولة واللبن المقادير: * 3 ملعقة كبيرة عصير فراولة * 2 ملعقة كبيرة لبن بودرة أو 1⁄2 كوب لبن سايل الطريقة: اخلطي المكونات دي مع بعضها كويس جدا، لغاية ما يبقى قوامها كريمي بعض الشيء، واحتفظي بالخليط ده في برطمان زجاجي أو خشبي، وممكن تشيليها لمدة 3 أو 4 أيام في الثلاجة وتستخدمي منها لإزالة الماكياج. بس خلّي بالك إنك لو عملتي الوصفة دي باستخدام اللبن العادي هيبقى تأثيرها في إزالة الماكياج مش أوي زي اللي استخدمنا فيه اللبن البودرة، وكمان مش هتقدري تحتفظي به في الثلاجة أكثر من يومين فقط. الليمون والفراولة لتغذية البشرة المقادير: 1⁄4 كوب عصير فراولة 2 ملعقة كبيرة لبن بودرة ملعقة صغيرة زيت ليمون (وممكن تستبدليه ببشر ليمون أو عصير ليمون) الطريقة: اخلطي المكونات دي كلها مع بعض كويس جدا، وممكن تستخدمي الخلطة دي كمزيل طبيعي للماكياج، وكمان ممكن تستخدميه الصبح بعد ما تغسلي وشك بالمنظف بتاعك، وهتحصلي على بشرة متغذية ونضرة وناعمة.
ولغاية هنا تكون خلصت حلقتنا النهارده.. استنونا الحلقة الجاية علشان نكمّل ماسكاتنا بالفراولة.. ويا ريت تجرّبوا الوصفات اللي عملناها وتبعتوا تقولوا لنا على النتيجة.. سلام،،،
