كريم الخيار ولوسيون البرتقال للبشرة الجافة

أهلا بكل بنات "قمر 14" وحلقة جديدة من حلقات "جمالك من الطبيعة مع رانيا"..
في حلقتنا النهارده هنتكلّم عن العناية بالبشرة مع دخول الخريف والشتاء..
وهنعمل ماسكات بالخيار والبرتقال، وكمان لبن بالموالح لنعومة البشرة، تابعونا.
كريم الخيار للبشرة الجافة والعادية
الكريم ده بيعتبر من الكريمات الليلية اللي بندهنها على البشرة كلها قبل النوم؛ علشان تحتفظ بنعومة البشرة.
المقادير:
* ثمرة خيار
* ملعقة فازلين (من عند العطار)
* 2 ملعقة صغيرة زيت جنين القمح أو زيت لوز
* عصير نصف ليمونة
الطريقة:
- هنقشّر الخيار وناخد اللُب من جوه، ونقطّعه قطع صغيرة، ونضربه كويس في الخلاط، ونضيف عليه حوالي 3 ملاعق ميه أو على حسب ما الخيار يحتاج علشان يبقى ناعم، وبعدين نصفّيه كويس، ونحط عليه عصير الليمون.
- نحط الفازلين على نار هادية لحد ما يسيح بس، وبعدين نرفعه من على النار، ونحط عليه الزيت، هنستخدم زيت جنين القمح لسن فوق الثلاثين، ولو أقل يبقى هنستخدم زيت اللوز.
- بعد كده نحط الخيار على النار لمدة دقيقتين، وبعدين ناخد كمية من خليط الخيار حوالي نصف فنجان، ونضيفه على الفازلين ونخلطهم كويس أوي، ونحط الخليط في برطمان زجاج، وبعد ما يبرد شوية نحطّه في التلاجة.
- الكريم ده بندهنه على الوش والرقبة، وهو آمن جدا للاستخدام حول العين.
- الكريم ده مفيد جدا للبشرة الجافة والعادية وممكن للمركبة، وبيطرّي البشرة جدا ويغذّيها وبينعّمها.

إضغط لمشاهدة الفيديو:
كريم البرتقال للبشرة شديدة الجفاف
المقادير:
* قطعة لانولين
* ملعقة صغيرة جنين قمح
* ملعقة صغيرة زيت ليمون
* ملعقة صغيرة زيت برتقال
* ملعقة صغيرة زيت جوجوبا
* 3 ملاعق صغيرة عصير برتقال
* ملعقة عصير ليمون
الطريقة:
- هنحط اللانولين على النار لحد ما يسيح، وبعدين نرفعه ونضيف عليه كل الزيوت، ونقلّبهم كويس.
- نخلط عصير البرتقال وعصير الليمون ونضيفهم على الزيت ونقلّبهم كويس أوي؛ وده علشان يبقى الخليط متماسك، وبعدين نصبّه في برطمان زجاج، ونحتفظ به في التلاجة.
- الكريم ده يعتبر من الكريمات الليلية؛ يعني بندهنها على الوش والجسم كله قبل ما ننام، وناخد بالنا إننا مانتعرّضش لضوء علشان ما يسمّرش الجسم.

إضغط لمشاهدة الفيديو:
لوسيون البرتقال والليمون لتفتيح البشرة
المقادير:
* 1/ 2 ثمرة برتقال صغيرة
* 1/ 2 ثمرة ليمون
* فنجان زيت زيتون
الطريقة:
- هنقطّع البرتقال والليمون بالقشر، ونضيف عليهم الزيت، ونضربهم في الخلاط كويس أوي، وبعدين نصفيه، وممكن نحتفظ باللوسيون ده في التلاجة لمدة 3 أيام فقط مش أكتر من كده.
ونقدر نستخدمه بشكلين:
- أول حاجة بعد ما نصفيه هناخد الخليط ده وندهنه على الوش والجسم 3 أيام متتالية أو يوم بعد يوم، ولازم ندهنه عند النوم فقط ومانتعرّضش به للضوء طبعا.
- ممكن بعد ما نصفيه نستخدمه كسنفرة للبشرة والجسم بعد ما ناخد شاور، ونسيبه على الجسم لمدة نصف ساعة وبعدين نشطفه، هيخلي البشرة ناعمة وطرية جدا.

تونيك للبشرة باللبن والبرتقال
المقادير:
* مقدار لبن بودرة مذوّب في ميه
* عصير برتقال
الطريقة:
نضيف اللبن على عصير البرتقال، وممكن استخدم أي نوع من الموالح سواء ليمون أو كيوي، وممكن نعمل خليط منهم.
هناخد من اللوسيون ده بقطنة وندهن الوش والرقبة والجسم كله.
ولو عايزينه زي سنفرة يبقى ممكن ما نصفّيش البرتقال بعد ما نعصره، لكن لو هنستخدمه لوسيون عادي يبقى هنصفيه.
واللوسيون ده بيعتبر تونيك للبشرة بيغذّيها وينعمها جدا ويطرّيها.

إضغط لمشاهدة الفيديو:
خلصت حلقتنا النهارده..
استنونا في حلقة جديدة وماسكات ونصايح كتيرة..
سلام،،،
*********************
للرجوع للحلقات السابقة
اضغط هنا "جمالك من الطبيعة مع رانيا"
*********************