جمالك من الطبيعة مع رانيا.. "جنين القمح" شباب دائم للبشرة الجافة

أهلا وسهلا بيكم في حلقة جديدة من حلقات جمالك من الطبيعة مع رانيا..
والنهارده هنكمّل مع بعض حلقتنا الخاصة بالعناية بالبشرة الجافة..
عصير الجزر والعسل.. لترطيب البشرة
الجزر من الحاجات المفيدة جدا للبشرة الجافة، والمرة اللي فاتت عملنا مع بعض ماسك بالجزر المسلوق، ودلوقتي هنعمل ماسك تاني بعصير الجزر..
المكوّنات:
* عصير جزرة متوسّطة
* ملعقة كبيرة عسل
* ملعقة صغيرة لبن

الطريقة:
بنخلط كل المكوّنات دي مع بعضها، ونحطها على جذور وأطراف الشعر، وممكن كمان نستخدمه للبشرة، وبنسيبه لمدة ساعة، وبعد كده بنغسل الشعر مرة تانية بالشامبو؛ لأن أي ماسك بيحتوي على بيض أو لبن لازم نغسله كويس بالشامبو.

إضغط لمشاهدة الفيديو:
الفازلين وجنين القمح.. نضارة وصحة للبشرة الجافة
اتكلّمنا في الحلقة اللي فاتت عن أهمية الفازلين في العناية بالبشرة الجافة، ودلوقتي هنعمل مع بعض ماسك هايل جدا لتغذية وترطيب البشرة الجافة...
المكوّنات:
* 1/ 2 ملعقة كبيرة فازلين
* ملعقة كبيرة عسل
* ملعقة كبيرة جنين القمح
الطريقة:
بنسيّح الفازلين على النار، لغاية ما يبقى سايل، وبعد كده نرفعه من على النار، وبعد كده نضيف عليه العسل، وجنين القمح، ونقلّبهم كويس مع بعض علشان يمتزجوا تماما، ونصب كل المكوّنات دي في برطمان زجاجي ونشيله في الثلاجة.
وبنستخدم التركيبة دي على بشرة الوجه والجسم، بعد ما ناخد الحمام الليلي بتاعنا، وبنحطه على بشرة مبلولة، وبنسيبه لمدة ساعة أو اتنين، وبعد كده نشطفه؛ لكن أنا بافضّل إننا نسيبه على جسمنا طول الليل ونغسله تاني يوم الصبح.
ومش عايزاكم تضايقوا من قشور جنين القمح اللي هتلتصق بجسمكم؛ لأن جنين القمح بيعتبر من أهم وأفيد 10 أغذية عالمية، وله فوايد كتيرة جدا للبشرة والشعر، وبيأخر ظهور التجاعيد، وبيعطي لمعان وروقان للبشرة.
طبعا بالإضافة إلى أن الفازلين من الحاجات اللي بترطّب البشرة جدا وبتغذّيها وبتدّيها لمعة، وكمان مفيد جدا لتقوية الأظافر، وإعطائها طبقة لامعة طبيعية.

إضغط لمشاهدة الفيديو:
جنين القمح.. وجبة أساسية في نظامك الغذائي
جنين القمح غني جدا بفيتامين E، وزي ما إحنا عارفين إن فيتامين E مفيد جدا جدا للبشرة والشعر، وبيدخل في كتير من الكريمات المعروفة؛ لأنه بيدّي للبشرة نضارة وشباب وحيوية.
بالإضافة إلى أنه بيحتوي على الأستروجين النباتي المهم جدا لكل امرأة؛ وبيحافظ على نسبة الكولاجين اللي بتقل في البشرة مع تقدُّم العمر؛ علشان كده بانصحكم إنكم على أد ما تقدروا تضيفوه على الأكلات؛ زي الزبادي أو سلطة الفواكه، وممكن تضيفي معاهم ملعقة عسل نحل، وتاكلي الوجبة دي كل يوم بالليل قبل ما تنامي.
زيت جنين القمح وزيت الجوجوبا.. لبشرة شباب على طول
زي ما قلنا قبل كده إن جنين القمح بيحتوي على الأستروجين النباتي، وفيتامين E، أما زيت الجوجوبا بيحتوي على الكولاجين الطبيعي..
وممكن بطريقة بسيطة إنك تخلطي كميات متساوية من زيت الجوجوبا وزيت جنين القمح، وتحتفظي بهم في برطمان زجاجي، وتشيليه في الثلاجة أو بره الثلاجة، وتستخدمي منه كل ما تحتاجي، وممكن تستخدميه كمرطب ليلي لبشرتك.
إضغط لمشاهدة الفيديو:
الخميرة.. للبشرة شديدة الجفاف
هنعمل مع بعض دلوقتي ماسك من الخميرة، بس عايزة أنبّه في البداية إن الماسك ده من الماسكات اللي ما ينفعش نشيلها في الثلاجة..
المكونات:
* 1/ 2 ملعقة خميرة بيرة
* ملعقة كبيرة عسل
* ملعقة كبيرة لبن بودرة
* صفار بيضة
* ملعقة كبيرة خل تفاح
الطريقة:
بنذوّب الخميرة مع العسل، لغاية ما الخميرة تذوب تماما، وبعد كده نضيف اللبن، ونقلّب كويس جدا، وبعد كده نضيف صفار البيضة، وآخر حاجة هنضيفها هي خل التفاح.
وقبل ما بنوّزع الماسك ده على بشرتنا، بندهن البشرة الأول بطبقة خفيفة جدا من زيت السمسم، ونسيبه على البشرة لمدة 15 دقيقة، بس لازم تكون البشرة نظيفة تماما، وبعد كده نفرد الماسك على الوش كله حتى منطقة العيون، ومش هننسى طبعا منطقة الرقبة.
وبنسيب الماسك لمدة 30 دقيقة، وبعد كده نشطفه بشوية لبن، ونسيبه لمدة ربع ساعة كمان، وبعد كده نشطف الوش بمية فاترة.

إضغط لمشاهدة الفيديو:

ولغاية هنا خلصت حلقتنا النهارده..
نتمنّى إنها تكون عجبتكم وتستفيدوا منها..
وانتظرونا في الحلقات القادمة..
للرجوع للحلقات السابقة يُمكنكم الدخول من خلال الضغط على لينك "قمر 14"
إلى اللقاء،،،

*********************
للرجوع للحلقات السابقة
اضغط هنا "جمالك من الطبيعة مع رانيا"
*********************