الروتين الأسبوعي للعناية بالبشرة والشعر

أعده للنشر: مها مصطفى
أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، وحلقتنا النهارده هنكمّل فيها كلامنا عن الروتين الأسبوعي للعناية بالبشرة والشعر..
ماسك الرز لتفتيح البشرة
المقادير:
* ملعقة كبيرة رز بلدي مطحون
* ملعقة كبيرة ترمس مطحون
* 1⁄2 ملعقة صغيرة كربوناتو
الطريقة:
اخلطي المقادير دي كلها مع بعض، وشيليها عندك في برطمان زجاجي، ولما تيجي تستخدميه اعجنيه بمقدار مناسب من المية السخنة، وهتحسّي إن فيه فوران خفيف لما تضيفي الميه عليه بسبب الكربوناتو، اللي بيعتبر من الحاجات المفيدة جدا لتفتيح البشرة، وكمان بيشيل الحبوب الصغيرة، وبيزيل الدهون عن بشرة الوش والجسم، وبيطرّي البشرة جدا.
بس خلّي بالك لو بشرتك جافة شوية ممكن تستبدلي الترمس بالحمص مطحون.
بعد ما تضيفي الميه وتبقى العجينة ليّنة، افرديها على بشرتك وسيبيه لمدة من 15 : 20 دقيقة بس.
الماسك ده بيساعد في تفتيح بشرة الوش والجسم، لكن ما ينفعش إننا نستخدمه فوق وتحت العين، وممكن نعمله مرة كل أسبوع أو أسبوعين.

ماسك الطمي لنضارة ولمعان البشرة
المقادير:
* ملعقة صغيرة طمي مغربي مدوّب في ميه سخنة
* 1⁄2 ملعقة صغيرة زيت بندق
* 1⁄4 ملعقة صغيرة زيت ورد
* ملعقة صغيرة عصير برتقال
* ملعقة كبيرة زبادي
الطريقة:
دوّبي الطمي وزيت البندق وزيت الورد والزبادي مع بعض، وفي الآخر ضيفي عليهم عصير البرتقال؛ لأنه بيدّي نضارة ولمعان للبشرة، وبيساعدها على أن تكون أكثر شبابا، والماسك ده ممكن نستخدمه لبشرة الوش والجسم وكمان للأماكن الحساسة.

إضغط لمشاهدة الفيديو:
حمام الزيت الخماسي لتغذية الشعر
ده حمام زيت ممكن نعمله مع كل أنواع الشعر؛ وهو بيساعد على تقوية وتنعيم وترطيب الشعر، وكمان بيغذّيه وبيخلّي ريحته عطرة وبيلمع.
المقادير:
* ملعقة كبيرة زيت جوز الهند
* ملعقة كبيرة زيت زيتون
* ملعقة كبيرة زيت صبار
* ملعقة كبيرة زيت خروع
* ملعقة كبيرة زيت لوز
الطريقة:
اخلطي كل الزيوت دي مع بعضها، وحطّي الخليط على فروة راسك بعد ما تغسليها كويس بالميه السخنة، وحمام الزيت ده ممكن تسيبيه على شعرك من 3 : 8 ساعات؛ يعني ممكن تعمليه بالليل قبل ما تنامي وتغسليه تاني يوم الصبح.
ممكن تعملي كمية كبيرة من خليط الزيوت ده، وتحتفظي به في برطمان زجاجي في الثلاجة، بس خلّي بالك إنك تطلّعيه قبل الاستخدام بساعة أو اتنين؛ لأن زيت جوز الهند بيكون جامد.

إضغط لمشاهدة الفيديو:

خلصت حلقتنا النهارده..
استنونا الحلقة الجاية مع مزيد من الماسكات..
وفي انتظار تعليقاتكم وأسئلتكم..