ماسكات بالجوافة وزيت الحنة لتغذية الشعر

أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، والنهارده في حلقتنا هنعمل ماسكات طبيعية لعلاج مشكلات الشعر..

ماسك الكافيار لكل أنواع الشعر
المقادير:
2 ملعقة كبيرة كافيار (هتلاقيه في السوبر ماركت)
3 ملعقة كبيرة زبادي
ملعقة صغيرة زيت زيتون

إضغط لمشاهدة الفيديو:
الطريقة:
اخلطي الكافيار مع الزبادي وملعقتين ميه في الخلاط، وبعد كده وزّعي الخليط ده على شعرك من الجذور وحتى الأطراف باستخدام فرشة الصبغة، وسيبيه من 15 : 20 دقيقة، وبعد كده اغسلي شعرك بالشامبو.
ممكن تضيفي زيت الزيتون على الخليط السابق في حالة الشعر شديد الجفاف، واخلطيهم كويس مع بعض، وبعد كده استخدميه بنفس الطريقة.. والماسك ده مفيد جدا لتغذية وترطيب الشعر.

إضغط لمشاهدة الفيديو:
ماسك الجوافة
المقادير:
2 ثمرة جوافة
ليمونة
الطريقة:
اضربي الجوافة في الخلاط مع كمية قليلة جدا من الميه، وبعد كده صفّيها وضيفي عليها عصير الليمون، واستخدمي الخليط ده على فروة الشعر، والماسك ده مفيد جدا لعلاج قشرة الشعر.

ماسك الجوافة للشعر الجاف
المقادير:
1⁄4 كوب عصير جوافة مركز
ملعقة صغيرة بلسم
الطريقة:
اخلطي البلسم مع عصير الجوافة، وافردي الخليط على شعرك من الجذور وحتى الأطراف، وسيبيه على الشعر لمدة 15 دقيقة، وبعدها اشطفي شعرك.

إضغط لمشاهدة الفيديو:
ماسك بزيت الحنة
المقادير:
2 ملعقة كبيرة حنة
2 ملعقة صغيرة خل
2 ملعقة صغيرة زيت حنة
2 ملعقة صغيرة زبادي
الطريقة:
اخلطي الحنة مع الخل، وضيفي عليهم زيت الحنة، وقلّبيهم كويس جدا مع بعض، وبعد كده ضيفي عليهم الزبادي مع التقليب المستمر، ولو حسّيتي إن الخليط سميك شوية ممكن تضيفي عليه شوية ميه دافية.
حطّي الخليط ده على فروة الرأس والشعر بالكامل، وسيبيه لمدة ساعة على شعرك، وبعد كده اغسلي شعرك كويس بالشامبو.
إضغط لمشاهدة الفيديو:
وبكده تكون خلصت حلقتنا النهارده..
وكل سنة وإنتم طيبين بمناسبة العام الدراسي الجديد..