تشيز كيك بالفراولة

النهارده هنعمل تشيز كيك بالفراولة لكل أصدقائنا اللي طلبوا مننا تقديم طريقة عمل التشيز كيك، واخترنا الفراولة لأنها من الفواكه اللي متوفّرة في السوق بكثرة الأيام دي، تعالوا نشوف هنعملها إزاي...
تشيز كيك بالفراولة
مقادير قاعدة التشيز كيك:
* 2 علبة بسكويت دايجستف مفروم
* 1⁄4 كوب زبدة طرية
* 1⁄4 كوب عسل
مقادير خليط الجبنة:
* علبة جيلي فراولة
* 1⁄2 كوب لبن
* 1⁄2 كيلو جبنة كريمي
* 2 ملعقة كبيرة عصير ليمون
* 2 ملعقة كبيرة بشر ليمون
* 1⁄2 كوب كريمة لباني
* 1⁄4 كيلو فراولة مقطّعة أنصاف (للتزيين)
الطريقة:
1- لتحضير قاعدة التشيز كيك؛ حطّي الزبدة في حلة على النار ومعاها العسل وسيبيهم لغاية ما يسخنوا، وبعدين ضيفي عليهم البسكويت، وقلّبيهم مع بعض كويس، وبعد كده حطّي الخليط ده في صينية التشيز كيك اللي بيبقى لها جوانب متحركة علشان تقدري تطلعي الكيكة منها بسهولة، وراعي إنك تفردي الخليط في الصينية بإيدك كويس، وبعد كده دخّلي الصينية في الثلاجة لمدة نصف ساعة.
2- دوّبي الجيلي في كوب ماء ساخن، وبعد كده ضيفي عليه كوب ماء بارد.
3- اخفقي الجيلي مع باقي مكونات خليط الجبنة كويس بالمضرب الكهربي.
4- حطّي الخليط ده في الصينية اللي فيها البسكويت، وساوي السطح كويس، وبعد كده دخّلي الصينية في الثلاجة علشان تبرد، وسيبيها لمدة 6 ساعات، وبعد كده طلّعيها وزيّنيها بقطع الفراولة الطازجة.. وبألف هنا وشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااااام،،،