تشيز كيك بصوص الكراميل

النهارده على "سفرة دايمة" هنقدّم لك طريقة التشيز كيك بصوص الكراميل، بعد ما طلبها عدد كبير من أصدقائنا.. نتمنّى إنكم تجرّبوها وتبعتوا تقولوا لنا على النتيجة...
تشيز كيك الكراميل
المقادير:
1 1⁄2 كوب بسكويت سادة مفروم
5 ملعقة كبيرة زبدة
2 ملعقة سكر
حشوة التشيز كيك:
4 علبة جبنة كريم (هتلاقيها في السوبر ماركت)
ملعقة صغيرة فانيليا
2 ملعقة كبيرة زبدة
5 بيضات
كوب سكر
صوص الكراميل:
1 1⁄2 كوب سكر
كوب كريمة لباني
1⁄2 ملعقة كبيرة عصير ليمون
1⁄2 كوب شيكولاتة خام مبشورة
1⁄4 كوب ميه
الطريقة:
1- اخلطي البسكويت مع الزبدة، وحطّيه في القالب وغطّيه بالورق الفويل، ودخّليه الفرن لمدة 14 دقيقة.
2- لتحضير الحشوة؛ اخلطي الجبنة مع السكر، واضربيهم مع بعض بالمضرب الكهربي، وضيفي عليهم الزبدة والبيض والفانيليا مع الاستمرار في الخفق.
3- حطّي الخليط ده على البسكويت في صينية كبيرة، وحطّي الصينية في حمام مائي، ودخّليها الفرن، وسيبيها لحد ما تستوي، وبعد كده طلّعيها من الفرن، وحطّيها في الثلاجة طول الليل علشان تتماسك.
4- لتحضير صوص الكراميل، اخلطي السكر والمية والليمون مع بعض على نار متوسطة، لحد ما السكر يذوب تماما ويبتدي الخليط يغلي، وبعد كده ضيفي عليهم الكريمة، مع تقليل درجة الحرارة، وقلّبيهم مع بعض لمدة 5 دقايق، وبعد كده ارفعي الصوص من على النار.
5- حطّي صوص الكراميل على التشيز كيك، وزيّنيها بقطع الشيكولاتة.. وبالهنا والشفا.

وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت..