أفكار فريدة لسنة جديدة سعيدة

نفسك تعملي حفلة لأسرتك.. علشان تودعي عام 2009..
وتستقبلي عام 2010 مع كل أهلك وأصدقائك اللي بتحبيهم..
بس نفسك إنك تعملي كل حاجة فيها بإيديكي..
يعني تعملي ديكور مختلف للبيت..
وتعملي الأكل بإيديكي..
يبقى خليكِ معانا النهارده؛ لأننا هنحقق كل اللي بتفكري فيه..
وهنبدأ كلامنا ب....
1- أفكار لتزيين البيت
الزينة هي أكتر حاجة بتميّز الاحتفال برأس السنة، بس إيه رأيك السنة دي تستغني عن الزينة اللي بتشتريها وتعملي بنفسك ديكورات بسيطة داخل بيتك؟؟ وأهو منها تستفيدي مِن بعض الخامات القديمة اللي عندك وتعيشي كأنك في احتفالات رأس السنة اللي في أوروبا.. وما تخافيش الأفكار دي مش هتاخد منك وقت كبير في تحضيرها كل الحكاية ساعتين اتنين وبس.
غطاء للكرسي بشكل رجل الثلوج.
غطاء لظهر كراسي السفرة
دي فكرة بسيطة ممكن إنك تعمليها بنفسك في البيت، وهي عبارة عن غطاء لظهر كراسي السفرة على شكل رجل الثلوج.
كل اللي هتحتاجي إليه:
• قماش أبيض.
• مقص.
• مسطرة.
• مسدس شمع أو صمغ.
• إبرة وخيط.
• زراير سوداء.
• ورق مقوى باللون البرتقالي والأسود.
• قماش أحمر أو برتقالي.
الخطوات:
1- قيسي طول وعرض "ظهر كراسي السفرة" بتاعتك.
2- قصي القماش بتاعك بعرض أكبر من عرض الكراسي 2 سم، وقصي طوله ضعف طول الكراسي وزودي كمان عليهم 2 سم.
3- اتني القماش بالعرض من النصف.
4- خيّطي طرفي القماش اليمين والشمال مع بعض، وسيبي الطرف اللي تحت مفتوح، وبكده تكوني خلصتِ غطاء الكرسي ومش فاضل غير التزيين.
5- هتقصي الورقة اللي باللون البرتقالي على شكل جزرة، وهتقصي الورقة السوداء على شكل طاقية.
6- هتلزقي الطاقية اللي عملتيها من الورق في أعلى القماش على جنب، وهتلزقي الجزرة مكان المناخير بحيث يكون طرفها المدبب لبره.
7- الزقي الزراير مكان العينين والفم ومكان زراير الجاكت.
8- أحضري القماش الملوّن وخيطيه في القماش الأبيض من الجانبين "في المنتصف" وبعد كده اربطي طرفيه مع بعض على هيئة كوفية.

حبل الغسيل بين الأركان
حبل الغسيل بين الأركان
ممكن كمان إنك تعملي حبل الغسيل وتزيني بيه أي ركن في البيت زي الحوائط والأبواب، وعلى فكرة الشكل ده لذيذ جداً وبيضيف جواً من المرح داخل البيت، مش كده وبس ده كمان تنفيذه مش هياخد أكتر من ساعة.
كل اللي هتحتاجي إليه:
• مقص.
• ورق مقوّى باللون الأبيض والأحمر.
• حبل أو دوبارة.
• مسدس شمع أو صمغ.
• زراير ملوّنة.
• مشابك غسيل "صغيرة".
الخطوات:
1- قصي من الورق المقوى أشكال مختلفة من اللبس زي الطاقية والحذاء والبووت والشاربات والجوانتي والقميص والجاكت والبنطلون.
2- بعد كده الزقي الزراير الملوّنة على الجاكت والطاقية والبنطلون أو على أي شكل من اللي قصتيه، هتحسي إنه هيبقى أجمل لو زودتي له زراير.
3- حطي صمغ على الحبل أو الدوبارة وابتدي في لزق كل قطعة عندك على الحبل وسيبيها لغاية ما تنشف.
4- حطي على كل شكل منهم مشبك غسيل من فوق كأنك نشراهم على الحبل بالظبط.
5- بعد كده اختاري ركن في البيت يكون مميز، وعلّقي فيه حبل الغسيل اللي عملتيه بإيدك.

بابا نويل
بابا نويل
استحالة إن رأس السنة تعدي من غير ما يكون بابا نويل موجود، بس إيه رأيك السنة دي لما تعمليه أنتِ بنفسك وتستغليه في تزيين شجرة عيد الميلاد، أو تعلقيه في أي جزء في البيت.
كل اللي هتحتاجي إليه:
• كورة بلاستيك صغيرة "وش بابا نويل".
• كورة بلاستيك صغيرة "جسم بابا نويل".
• كورة أصغر منهما لونها بيج.
• زرارين باللون الأسود.
• قطن.
• مسدس شمع أو صمغ.
• قطعة قماش لونها أحمر.
الخطوات:
1- الزقي الكورتين البلاستيك الصغيرين فوق بعض بمسدس الشمع.
2- الزقي القطن على جنب من جوانب الكرة اللي فوق، بحيث إنه يكون ده وش بابا نويل وسيبيه حوالي 1/2 ساعة علشان القطن يثبت على الكورة.
3- بعد كده الزقي الزراير مكان العينين على القطن من فوق.
4- الزقي الكورة الصغيرة اللي باللون البيج مكان المناخير.
5- أحضري القماش الأحمر ولفيه على الكورة اللي تحت والزقيه وحطي على الأطراف من تحت قطن علشان يبقى زي لبس بابا نويل.
6- أحضري قطعة كمان من القماش الأحمر ولفيها على شكل قرطاس، والزقيه علشان ما يتفتحش وبعدين حطي على الأطراف شوية قطن أبيض عشان يبقى زي الطرطور اللي بيلبسه بابا نويل.
7- بعد كده الزقي الطرطور ده على الكورة من فوق "رأس بابا نويل".
8- ممكن تخرمي الطرطور من فوق وتمرري منه دوبارة وتعلقي "بابا نويل" في شجرة عيد الميلاد، أو ممكن تحطيها في أي مكان عندك في البيت تضيفي بيها شكل جديد.

كباب بالخضروات
2- عشاء ضيوفك من صنع إيديكِ
بعد ما اتكلمنا وعرفنا إزاي تزيني بيتك، تعالي دلوقتي نشوف إزاي إنك تحضري عشاء بسيط لضيوفك وهنبدأ ب....
ساندويتشات كباب بالخضروات

المقادير:
• كيلو لحمة "فيليه" مقطّعة مكعبات متوسطة الحجم.
• 6 حبات طماطم صغيرة مقطعة شرائح سميكة.
• 6 حبات باذنجان رومي صغيرة مقطعة مكعبات متوسطة الحجم.
• 6 حبات كوسات مقطعة شرائح سميكة.
• 6 حبات بطاطس مقطعة شرائح متوسطة الحجم.
• بصلة مقطعة شرائح متوسطة الحجم.
• 2 حبة فلفل أخضر مقطع قطعا متوسطة الحجم.
• 2 حبة فلفل أحمر مقطع قطعا متوسطة الحجم.
• 2 حبة فلفل أصفر مقطع قطعا متوسطة الحجم.
• عصير ليمون.
• قشر ليمونة مبشور.
• ربع كوب صغير زيت زيتون.
• معلقة توابل.
• 2 معلقة صغيرة ملح.
• 1/4 معلقة فلفل أسود مطحون.
• حزمة بقدونش مقطعة قطعا صغيرة.
الطريقة:
1- أحضري طبق كبير.. واخلطي فيه عصير الليمون مع القشر الليمون وزيت الزيتون والملح والتوابل مع بعض، ثم قسّمي الخليط اللي أنتِ عملتيه إلى جزأين.
2- أحضري طبق كبير وحطي فيه اللحمة وضيفي إليها جزءا من الخليط السابق وقلبيهم كويس مع بعض علشان اللحمة تتبل كويس، وأحضري طبق تاني وحطي فيه الخضار اللي عندك كله، وضيفي إليه باقي الخليط وسيبهم مع بعض لمدة ساعة علشان الخضار هو كمان يتبل كويس.
3- سخني الشواية اللي عندك وشغليها على درجة حرارة متوسطة.
4- أحضري أسياخ الشوي "الحديد" أو أسياخ الخل "الخشب"، وابدئي حطي الخضار مع اللحمة في السيخ ده، عن طريق إنك تحطي مكعب لحم ووراه شريحة خضار لغاية ما السيخ يخلص، خذي بالك من إنك لو هتستخدمي أسياخ الخل المصنوعة من الخشب يبقى لازم تغلّفي الأجزاء اللي ما فيهاش خضار بورق الفويل علشان ما تتحرقش من الشوي.
5- ابدئي اشوي الكباب بتاعك على الشواية اللي إنتِ كنتِ مسخناها قبل كده وسيبيه على الشواية لمدة ربع ساعة أو لغاية ما تلاقي إن اللحمة احمرت واستوت مع مراعاة التقليب من وقت للتاني.
6- بعد ما يستوي طلعيه من الشواية وحطيه الساندويتشات ورشي عليه من فوق البقدونس، ممكن كمان تقدمي ساندويتشات جبنة رومي... وبألف هنا وشفا.

تورتة من صنع إيديكِ
تورتة من صنع إيديكِ
ويا سلام كمان لما تعملي بنفسك تورتة من صنع إيديكِ أكيد هتكون أحلي هدية تقدميها لضيوفك بمناسبة السنة الجديدة...

مقادير الكيكة الأسفنجية:
• 5 بيضات.
• كوب ونصف سكر بودرة.
• 1 كوب سمن.
• 3 أكواب دقيق.
• معلقة صغيرة فانيليا.
• معلقة صغيرة بيكنج بودر.
• كوب ونصف كاكاو "اختياري".
الطريقة:
1- أحضري البيض واكسريه في إناء عميق وضيفي إليه السكر والفانيليا واضربيهم مع بعض "بالمضرب الكهربائي" لمدة ربع ساعة أو لغاية ما تلاقي الخليط ده بقى عامل زي الكريمة.
2- بعد كده أحضري الدقيق والبيكنج بودر وضيفيهم لبعض، ولو عايزة تعملي كيكة بالشيكولاتة ممكن إنك تضيفي إليهم "الكاكاو".
3- ضيفي الدقيق والبيكنج بودر بالتدريج إلى البيض والسكر وقلبيهم مع بعض كويس باستخدام معلقة خشب بس خدي بالك إن التقليب يكون بهدوء.
4- بعد كده أحضري قالب كيك على شكل قلب، وادهني القاع والجوانب بشوية سمنة ورشي رشة صغيرة من الدقيق علشان الكيكة ما تلزقش منك في الصينية وبعد كده صبي خليط الكيكة فيها.
5- شغلي الفرن لمدة 5 دقائق، وبعد كده أدخلي صينية الكيكة الفرن وخلي درجة الحرارة متوسطة وسيبيها لمدة 40 دقيقة أو لغاية ما تلاقي وشها أحمر.
6- ولو عايزة تتأكدي من إن الكيكة استوت من جوه يبقى ممكن إنك تجيبي سكينة نظيفة وتحطيها في وسط الكيكة، لو خرجت السكينة نضيفة زي ما هي يبقى كده الكيكة استوت من جوه، لكن لو خرجت وفيها أي حاجة يبقى الكيكة ما ستوتش.. بعد ما تستوي الكيكة خرجيها من الفرن وسيبيها شوية لغاية ما تبرد علشان تقدري إنك تنقليها في صينية تانية مستديرة، وخدي بالك وإنتِ بتنقليها إنك تحطيها على وشها بحيث تبقى الناحية اللي تحت فوق واللي فوق تحت.
طريقة تزيين وحشو التورتة:
المقادير:
• زبدة.
• لبن.
• مربى.
• علبة كمبوت أناناس.
• نص كيلو فراولة.
• علبة بودرة كريم شانتيه.
• جوزة الهند مبشورة.
• تشكيلة مكسرات مفرومة "لوز وبندق وجوز وفستق".
• كريز.
• قمع لتزويق التورتة.
الطريقة:
1- أخرجي الزبدة من الثلاجة وسيبيها لمدة نصف ساعة علشان لما تيجي تستعمليها تلاقيها سايحة شوية.
2- أحضري طبقا عميقا، وحطي فيه اللبن البارد وبعد كده ضيفي إليه علبة بودرة "الكريم شانتيه" واضربيهم مع بعض كويس بالمضرب الكهربائي، لمدة عشر دقائق وبعد كده حطي الكريم شانتيه في الفريزر.
3- أحضري الكيكة وقسميها باستخدام سكينة الحلويات إلى طبقتين، وخدي الطبقة الأولى وحطيها على صينية تانية ورشي عليها ماء الكمبوت.. وعلى سطح النصف التاني من الكيكة هتفردي طبقة من الزبدة بعد كده طبقة مربى "أي نوع مربى عندك" بعد كده ضمي الجزأين على بعض.
4- أحضري الكريم شانتيه وغطي الكيكة كلها بيه باستخدام ضهر المعلقة.. وأحضري القمع وحطي فيه كريم شانتيه وزوّقي الأطراف، وعلى فكرة ممكن إنك تحطي على الجوانب جوز الهند والمكسرات المفرومة اللي عندك.
5- بعد كده أحضري أي نوع فاكهة عندك "فراولة أو تفاح أو أناناس" وقطعيهم إلى شرائح أو قطع وزوّقي سطح التورتة بالشكل اللي إنتِ تحبيه، بعد كده حطيها في الثلاجة لمدة نص ساعة.. وبألف هنا وشفا.

وبكده يكون خلص احتفالنا النهارده..
ويلّا علشان نطفي النور..
ونبتدي سوا إحنا وإنتم سنة جديدة سعيدة علينا كلنا..
وكل سنة وأنتم طيبين...