استمتعي بالربيع مع العصائر الطبيعية المنعشة

إيه رأيك النهارده ومع الجو الحر ده، تعملي لعيلتك مجموعة من العصاير الطبيعية علشان تستمتعوا بطعمها مع بعض، وكمان تستفيدوا بمجموعة كبيرة من الفيتامينات والمعادن الضرورية للجسم..
***************

زيني الكاسات بالفراولة والنعناع الأخضر
عصير الفراولة بالزبادي
المقادير:
* 1 و1⁄2 كوب فراولة طازجة ومقطّعة
* علبة زبادي صغيرة
* 5 ملعقة كبيرة سكر
* ماء
الطريقة:
1- حطّي الفراولة مع السكر والزبادي وكمية الميه المناسبة في الخلاط، وبعد كده اضربيهم مع بعض كويس، وبعدين صبّيهم في كاسات العصير، وزينيهم بأوراق النعناع الأخضر.. وبالهنا والشفا.

***************
زيّني الكاسات بشرائح التفاح
عصير التفاح
المقادير:
* 3 ثمرة تفاح مقطّعة أرباع ومنزوعة البذر
* 1⁄2 كوب عصير أناناس
* 1⁄2 كوب لبن
* سكر
الطريقة:
اضربي كل المكونات دي مع بعضها في الخلاط، وبعد كده صبّيها في الكاسات وزيّنيها بشرائح التفاح أو بأوراق النعناع الأخضر.. وبالهنا والشفا.

***************

زيّني الكاسات بشرائح الجزر والبرتقال
عصير البرتقال بالجزر
المقادير:
* عصير 3 ثمرات برتقال
* 5 ثمرة جزر
* سكر
* ميه
الطريقة:
اسلقي الجزر في شوية ميه على النار لمدة 10 دقايق، وبعد كده اضربي الجزر المسلوق في الخلاط مع شوية ميه لغاية ما يتفتت تماما ومايبقاش فيه أي كتل، وبعد كده ضيفي عليه عصير البرتقال والسكر، واخلطيهم مع بعض كويس، وبعد كده صبّي العصير في الكاسات، وزيّنيها بشرائح الجزر.. وبالهنا والشفا.

***************

ممكن تزيّني الكاسات بشرائح الموز والعسل
عصير الموز بالآيس كريم
المقادير:
* 2 ثمرة موز مقشّرة ومقطّعة حلقات
* 2 ملعقة كبيرة عصير ليمون
* 1⁄2 كوب آيس كريم بالفانيليا
* 1⁄2 كوب لبن
الطريقة:
ضيفي عصير الليمون على الموز علشان يحافظ على لونه، وبعد كده حطّي الموز مع الآيس كريم والسكر واللبن في الخلاط، واضربيهم كويس مع بعض، وبعد كده صبّي العصير في الكاسات، وممكن تزيّنيه بالعسل الأبيض.. وبالهنا والشفا.
وبكده تكون خلصت وصفاتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلااااااام،،،