كباب الحلة وجرانيتا البطيخ في عزومة "سفرة دايمة"

يوم الجمعة بتحلى اللمة على الأكل..
علشان كده حبينا نشاركك اللمة الحلوة دي..
ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا..
ونقدّم لك كل يوم جمعة اقتراح لعزومة مكوّنة من: العصير، والطبق الرئيسي، وطبق السلطة، وطبق الحلو..
علشان تنوّعي لعيلتك.. وتبهريهم بأكلاتك الجامدة..
تعالي بقى نشوف هنعمل إيه النهارده..
********************
ممكن تزيّني الكاس بقطع الأناناس
كوكتيل الفواكه
المقادير:
4 ثمرات موز مقطّعة صغير
2 كوب عصير برتقال
1/2 كوب أناناس مقطع صغير
كوب مية باردة
معلقة كبيرة عصير ليمون
2 كوب ونصف مية
سكر
الطريقة:
1- اضربي الموز مع ربع كوب من عصير البرتقال في الخلاط.
2- بعد كده اضربي قطع الأناناس مع ربع كوب من عصير البرتقال في الخلاط.
3- ضيفي عصير الأناناس على عصير الموز.
4- بعد كده اخلطي المية مع باقي عصير البرتقال مع الشربات مع خليط الموز والأناناس، واضربيهم في الخلاط مع المية والسكر، وشيليهم في الثلاجة، وبعد كده صبيهم في كاسات العصير، وممكن تزيّني الكاسات بقطع الأناناس.. وبالهنا والشفا.
********************
سلطة جامدة ومفيدة جداً
سلطة بابا غنوج
المقادير:
ثمرة باذنجان عروسي
3 معلقة كبيرة طحينة
2 معلقة كبيرة مية دافية
4 فصوص ثوم مقطع لقطع صغيرة
ثمرة فلفل أخضر حار مقطع لحلقات صغيرة
معلقة صغيرة كمون
معلقة صغيرة شطة
2 معلقة كبيرة خل
عصير ليمونة
ملح وفلفل
الطريقة:
1- اشوي الباذنجان في الفرن أو على النار من فوق، لغاية ما يطرى وتحسي إنه استوى، بعد كده قشريه وافرميه بالشوكة.
2- بعد كده اخلطي الطحينة مع عصير الليمون وقلبيهم كويس أوي مع بعض، لغاية ما تحسي إن الخليط بقى سميك، وبعد كده ضيفي المية الدافية لغاية ما تحصلي على القوام اللي اللي إنتِ عايزاه.
3- افرمي الفلفل الحار مع الثوم وضيفيه على الطحينة، وبعدين ضيفي الملح والفلفل والكمون والشطة عليهم، وفي الآخر اخلطي الباذنجان المهروس على سلطة الطحينة.. وبالهنا والشفا.
********************
طبق شوربة كلنا بنحبه
شوربة لسان العصفور
المقادير:
4/1 كوب لسان عصفور
بصلة مقطّعة لمكعبات
معلقة كبيرة سمنة
فص حبهان
6 أكواب شوربة
ملحوظة:
لو ما فيش عندك شوربة ممكن تخلطي 6 أكواب ماء مع 3 مكعبات مرقة دجاج.
الطريقة:
1- شوّحي البصل في السمنة مع الحبهان، وممكن تضيفي كمان فص مستكة؛ لأنها بتديها طعم وريحة حلوين جداً، وبعد كده ضيفي لسان العصفور لغاية وقلبيهم معاهم لغاية ما يبقى لونه ذهبي.
2- بعد كده ضيفي عليهم الشوربة، أول لما تبدأ تغلي قللي النار وسيبيها لغاية ما تحسي إن لسان العصفور استوى، وبعد كده ممكن تحطي لها ملح على حسب رغبتك وقدميها.. وبالهنا والشفا.
********************
دخليه الفرن في صينية فخار
كباب حلة بالبطاطس
المقادير:
كيلو لحم بتلو أو كندوز
4 ثمرات بطاطس مقشرة ومقطعة لمكعبات
2 بصلة متوسطة مبشورة
5 فصوص ثوم مفروم
ملعقة صغيرة سكر
2 ملعقة كبيرة سمن
2/1 كوب ماء
حبهان
قرفة
ملح وفلفل
الطريقة:
1- سيّحي السمنة في حلة على النار، وبعد كده ضيفي السكر وقلبيه لغاية لما يحمر ويبقى عامل زي الكراميل.
2- بعد كده ضيفي اللحمة ومعاها الفلفل الأسود والملح والحبهان والقرفة، وغطي الحلة وسيبي اللحمة على نار عالية، لغاية ما اللحمة تنزل ميتها وتشربها.
3- أول ما تلاقي اللحمة لونها احمّر، ضيفي الثوم والبصل المفروم، وبعدين ضيفي المية، وأول لما المية تغلي، وطي النار شوية وسيبيهم على النار.
4- في الوقت ده بتحمري البطاطس في الزيت، وبعد كده بتضيفيها على اللحمة وقلبيهم مع بعض على النار لمدة 10 دقايق علشان البطاطس تشرب من الصوص، ولو حسيتي إن اللحمة محتاجة مية كمان ممكن تزودي عليها مية، وبعد كده حطيها في صينية فخار ودخليها الفرن لمدة 20 دقيقة.. وبعد كده قدميها وبالهنا والشفا.
********************
الجرانيتا لذيذة ومناسبة مع جو الصيف
جرانيتا البطيخ
المقادير:
3 كوب بطيخ منزوع البذر
2 معالق كبيرة جيلي فراولة
3 معالق كبيرة عصير أو شربات فراولة
4 معالق كبيرة سكر
3 معالق كبيرة شيكولاتة مقطعة لقطع صغيرة
الطريقة:
1- اضربي البطيخ مع السكر في الخلاط كويس، لغاية ما تحسي إن السكر ذاب تماماً مع البطيخ.
2- بعد كده حطي خليط السكر والبطيخ على نار متوسطة، وضيفي معاهم شربات الفراولة، وقلبيهم كويس مع بعض، وأول ما الخليط يبدأ في الغليان ضيفي الجيلي وقلّبيهم على نار هادية لمدة دقيقتين، وبعد كده ارفعي الخليط من على النار وسيبيه يبرد، وبعد كده ضيفي عليه قطع الشيكولاتة وقلبيها معاهم علشان تبان كإنها البذر.
3- هاتي قالب وافردي فيه ورق بلاستيك، وبعد كده صبّي فيه خليط البطيخ، وحطي القالب في الفريزر لمدة 3 ساعات أو لغاية ما يتجمّد، وبعد كده طلعيه، وقطعيه وحطيه في طبق أو في كاس وقدّميه.. وبالهنا والشفا.
وفي النهاية نتمنّى إن عزومة النهارده تكون عجبتِك..
وتجرّبي كل الوصفات وتبعتي تقولي لنا على النتيجة..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...
"ورّينا شطارتِك"
وإلى اللقاء في العزومة الجاية،،،