يوم الجمعة بتحلى اللمة على الأكل.. علشان كده حبينا نشاركك اللمة الحلوة دي.. ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا.. ونقدّم لك كل يوم جمعة اقتراح لعزومة مكوّنة من: العصير، والطبق الرئيسي، وطبق السلطة، وطبق الحلو.. علشان تنوّعي لعيلتك.. وتبهريهم بأكلاتك الجامدة.. تعالي بقى نشوف هنعمل إيه النهارده.. ***************** عصير جامد جداً عصير الموز بالآيس كريم المقادير: 2 موز 2 معلقة كبيرة عصير ليمون 1/4 كوب عسل نحل 2 كوب لبن 1/4 كوب آيس كريم ڤانيليا الطريقة: 1- قطّعي الموز لشرائح وحطّي عليه عصير الليمون، علشان يحتفظ بلونه. 2- بعد كده اضربي كل المكوّنات مع بعضها في الخلاط، وحطي العصير في الثلاجة، وعند التقديم صبيه في الكوبايات وزيّنيها بشرائح الموز.. وبالهنا والشفا. ***************** طبق سلطة مكتمل العناصر الغذائية سلطة الجرجير بالزيتون والزعتر المقادير: 2 حزمة جرجير 1/8 كيلو زيتون مقطع شرائح 3 ثمرات طماطم جبنة شيدر مبشورة ملح وزعتر زيت زيتون خل الطريقة: 1- اغسلي الجرجير والطماطم كويس وقطّعيهم. 2- وبعد كده ضيفي عليهم شرائح الزيتون، وحطيهم في طبق التقديم. 3- اخلطي زيت الزيتون والزعتر والخل والملح، وقلّبيهم كويس أوي وضيفيهم للسلطة. 4- وبعد كده حطي السلطة في طبق التقديم، وزيّني الطبق بشرائح الجبنة الشيدر. ***************** ممكن تزيني الطبق بالجزر المبشور والبقدونس شوربة الطماطم بالجزر المقادير: 1/2 كيلو طماطم مقطّعة لقطع صغيرة جزرة كبيرة مقطعة لقطع صغيرة بصلة كبيرة مقطعة لقطع صغيرة ملح وفلفل أسود 2 كوب ونصف شوربة 1/2 كوب لبن 2 حبة قرنفل الطريقة: 1- شوّحي البصل والجزر في شوية زيت. 2- بعد كده ضيفي الطماطم والملح والفلفل والقرنفل. 3- وبعد ما تقلبيهم على النار شوية، ضيفي الشوربة وقلبيها كويس، وسيبيها على نار هادية. 4- بعد ما تحسي إن الطماطم والجزر استوى، اضربي الشوربة في الخلاط، وبعد كده حطيها على النار، وضيفي عليها اللبن وسيبيهم على نار هادية شوية. 5- بعد كده حطي الشوربة في أطباق التقديم وممكن تزينيها بالجزر المبشور.. وبالهنا والشفا. ***************** ممكن تعملي مع الطبق ده مكرونة أو بطاطس محمرة فاهيتا الفراخ المقادير: 1/2 كيلو صدور فراخ مخلية (مقطعة لقطع صغيرة) 2 بصلة مقطعة لشرائح كبيرة 2 فلفل رومي مقطع شرائح طولية 2 ثمرة طماطم مقطعة لقطع صغيرة 1/8 كيلو زيتون أسود ملح وفلفل وبهارات حبهان ورق لاورا مكعب مرقة دجاج الطريقة: 1- شوّحي البصل في شوية زيت، وبعد كده حطي الفلفل الرومي. 2- قطّعي الزيتون لقطع صغيرة، وضيفيها على البصل والفلفل الرومي ومعها قطع الفراخ، وقلبيهم مع بعض كويس على نار هادية. 3- بعد كده دوّبي مكعب مرقة الدجاج كويس في نصف كوب مية، وضيفيها على الفراخ ومعاها الملح والفلفل الأسود والبهارات والحبهان وورق اللاورا. 4- لما تحسي إنهم ابتدوا يستووا شوية ضيفي الطماطم. 5- قلّبي المكوّنات كلها كويس على النار، وممكن إنك تزوّدي شوية مية لو حسيتي إنك محتاجة تزوّدي.. وبعد كده قدّميها وممكن تعملي مع الطبق ده مكرونة أو بطاطس محمرة. ***************** قطعي البراونيز لمربعات صغيرة وقدميها كيكة البراونيز بعين الجمل المقادير: 2 بيضة 1/2 كوب زبدة 200 جرام شيكولاتة، وسيّحيها في حمام مائي ساخن. 1/2 كوب سكر كوب دقيق 1/4 معلقة بيكينج باودر 1/4 معلقة فانيليا 1/8 كيلو شيكولاتة مقطعة لقطع صغيرة 1/4 كيلو عين جمل الطريقة: 1- حطّي البيض والفانيليا في طبق، واضربيهم كويس بالمضرب الكهربائي.
2- بعد كده ضيفي عليه الزبدة والسكر والشيكولاتة السايحة، واضربيهم كلهم مع بعض. 3- اخلطي الدقيق مع البيكينج باودر وضيفيهم لخليط البيض، وقلّبيهم مع بعض بالراحة، وبعد كده ضيفي عليهم عين الجمل وقطع الشيكولاتة. 4- هاتي قالب الكيك وادهنيه بالزبدة، وصبّي فيه الخليط وساوي العجينة من فوق، وممكن تحطي بعض قطع الشيكولاتة على الوش ودخليها في فرن متوسط الحرارة. 5- سيبي الخليط في الفرن لمدة 30 دقيقة. 6- طلعي الصينية من الفرن بعد ما تتأكدي إنها استوت وسيبيها تبرد، وبعد كده قطعي البراونيز لمربعات صغيرة وقدميها.. وبالهنا والشفا.
وفي النهاية نتمنّى إن عزومة النهارده تكون عجبتِك.. وتجرّبي كل الوصفات وتبعتي تقولي لنا على النتيجة.. وكمان لو عندك وصفة حلوة عايزة تشتركي بها معانا.. ممكن تبعتيها لنا على لينك... "ورّينا شطارتِك" وإلى اللقاء في العزومة الجاية،،،