شوربة الطماطم بالشعرية

وصفتنا النهارده سهلة وكمان مغذيّة ومناسبة جدا مع البرد، وهي شوربة الطماطم بالشعرية.. جرّبيها وابعتي لنا رأيك فيها، وماتنسيش تقولي لنا على كل الوصفات اللي عايزة تعرفيها..
شوربة الطماطم بالشعرية
المقادير:
2 كوب عصير طماطم
1⁄2 كيلو لحمة مقطّعة مكعبات
ملح وفلفل
كوب شعرية
بصلة صغيرة
2 ملعقة زبدة
ملعقة صغيرة قرفة
1⁄4 ملعقة صغيرة شطة (اختياري)
الطريقة:
1- تبّلي اللحمة بالملح والفلفل والبصل، واسلقيها في مقدار مناسب من الميه.
2- حمّري الشعرية في الزبدة، وبعد كده حطي عليها عصير الطماطم ومقدار 2 كوب من الشوربة اللي سلقتي فيها اللحمة، وتبّلي الشوربة بالملح والفلفل والقرفة، وسيبيها على النار لحد ما تبدأ تغلي، وبعد كده حطي عليها اللحمة.
3- حطّي الشوربة في أطباق التقديم وزيّنيها بأوراق النعناع الطازجة.. وبالهنا والشفا.

وبكده تكون خلصت وصفتنا النهارده..
نتمنّى إنكم تجرّبوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدّمها لك في أقرب وقت..