انتظريه ولكن.. هل أنت واثقة أنه سيتمسك بك ويحافظ عليكِ؟!

بالله عليكم ردوا عليّ وبسرعة جدااا لأني والله محتاجة جدا لرأيكم, وعلى فكرة أنا ترددت كتيراً قبل ما أبعت ليكم، وكتير كتبت ومسحت تاني الرسالة؛ بس النهارده خلاص مش قادرة أستحمل والحيرة هتجنني.
أنا بنت تعرفت على شاب في آخر سنة في الكلية وقال لي إنه بيحبني من زمان وما صارحنيش لأنه عارف إني مش باكلم أي حد، واللي خلاه دلوقتي يصارحني إنه ظروفه اتحسنت ويقدر يتقدم لي بعد شهر ونص؛ رغم إني كنت مترددة جداااا؛ بس أصحابي شجعوني وقالوا لي ده شخص كويس ومحترم.
وبعدين حصل ظروف وما نفعش يتقدم خالص وبقالي على الحال ده سنة ونص, وأنا بحبه جداااا وعارفة إن هو كمان بيحبني، وما يقدرش على زعلي أبداا، وفي خلال الفترة دي طبعا كان بيتقدم لي ناس كتير، وكلهم ولاد ناس ومناصب؛ بس كنت باتحجج بعيوب تافهة، وكنت باصر على رأيي..حبيبي ده دلوقتي جت له شغلانة كويسة؛ بس أهله مصرّين إنه يسافر الأول سنة وبعدين يخطب؛ رغم علمهم بعلاقتنا؛ بس أنا مش مقتنعة بيها خالص، وفي نفس الوقت أنا متقدم لي واحد كويس، وأهله كويسين، ويتمنوا إننا نوافق بيهم..
أنا كنت مصرة على حبيبي عشان كان نفسي أتجوز عن حب ولأنه فعلا شخص يتحب، وخايفة أندم عليه، وكنت باقول لنفسي: مادام مش هتتمسكي بيه وافقتي ليه من الأول؟ وبرضه ما فيش حاجة أكيدة وكنت لازم أحط الاعتبار ده في حسابي؛ بس دلوقتي أنا خايفة من موقف أهله، خايفة بعد ما استنى سنة يطلعوا بحجة تانية، وخصوصا أنهم يريدون له الزواج من أحد أقرابه، وهو يرفض تماما، وفي نفس الوقت لا يستطيع الضغط عليهم بالموافقة على خطوبيتنا.
بالله عليكم دلوني أعمل إيه؟ ولو تبعتوا لي الرد بسرعة على إيميلي، والله بجد تعبت من التفكير، يمكن الحل قصاد عيني؛ بس محتاجه منكم التنوير أو التشجيع، بالله عليكم أفيدوني وشكرا ليكم جدااا.
m_yassen