وصفتنا النهارده هتكون عبارة عن بطاطس باللحمة المفرومة، جرّبوها وابعتوا لنا رأيكم فيها، وماتنسوش تقولوا لنا كل الوصفات اللي عايزين تعرفوها.. بطاطس باللحم المفروم المقادير: * كيلو لحم مفروم * كيلو بطاطس * كوب ونصف لبن * بصلة كبيرة مفرومة * ملح وبهارات * 1/ 2 كوب جبنة رومي مبشورة * 2 ملعقة زبدة * زيت للقلي * كوب بقسماط الطريقة: 1- قشّري البطاطس، وبعد كده اسلقيها، واهرسيها كويس، وضيفي ليها اللبن والملح. 2- هاتي طاسة وحطّي فيها الزيت، وشوّحي فيها البصل مع اللحمة المفرومة على النار، لغاية ما اللحمة تستوي، وبعد كده تبّليها بالملح والفلفل والبهارات. 3- ادهني الصينية اللي هتعملي فيها بشوية زبدة، ورشّي عليها كمية من البقسماط. 4- افردي نصف كمية البطاطس في الصينية، وافردي فوقيها اللحمة والجبنة المبشورة، وفي الآخر ضيفي باقي البطاطس. 5- رشّي البقسماط فوق الوش، وحطّي ملعقة زبدة، ودخّليها الفرن لحد ما الوش يحمرّ، وبعد كده طلّعيها، وقدّميها.. وبالهنا والشفا.
خلصت وصفتنا النهارده.. استنونا كل يوم مع وصفات جديدة.. سلام،،،