"سفرة دايمة" في المطبخ الإيطالي

طبعاً الأكل المصري الأصيل اللي كلنا بنحبه زي الكشري والملوخية والمحشي وغيرها من الأكلات اللي بتعتبر تراث الأكل المصري ما حدش يقدر يستغني عنه..
لكن أكيد كلنا من وقت للتاني بنبقى عايزين نجدّد في أكلاتنا، ونذوق حاجات جديدة ونجرّب نكهات مختلفة في الأكل...
علشان كده فكّرنا إننا ندخل كل مطابخ العالم، وننقي منها أكلات مختلفة تكون جديدة وفي نفس الوقت تكون سهلة وبسيطة..
والنهارده عزومتنا كلها هتكون أطباق من المطبخ الإيطالي يا رب تعجبكم..
*******************
سلطة البانزيللا
سلطة البانزيللا "Panzanella"
المقادير:
3 شرائح توست محمّص أو 2 رغيف فينو
3 حبات طماطم متوسطة الحجم
4 أعواد بصل أخضر
4 ثمرة خيار مقطعة
حزمة بقدونس
10 حبات زيتون
3 معالق كبيرة خل
3 فصوص ثوم مفروم
1/3 كوب زيت زيتون
ليمونة
ملح وفلفل
2 معلقة كبيرة زبدة
الطريقة:
1- هاتي وعاء عميق، وكسّري فيه التوست لمكعّبات متوسطة، ولو هتستخدمي الفينو قطّعيه لقطع صغيرة، وحطي عليهم الزبدة ودخّليهم الفرن شوية علشان يتحمّصوا.
2- قطعي كل الخضار لقطع صغيرة، وحطيهم كلهم في طبق التقديم، وعليهم الخبز المحمّص وتبّليهم بالملح والفلفل والخل والليمون.
**********************
شوربة الطماطم الإيطالية
شوربة الطماطم الإيطالية
المقادير:
2 معلقة كبيرة زبدة
بصلة كبيرة مقطّعة قطعاً صغيرة
5 حبات طماطم مقشرة ومقطعة قطعاً صغيرة
5 أكواب ماء
جزرة مقطعة
مكعّب ماجي
معلقة ثوم
معلقة أورجانو (موجود عند العطار)
ملح وفلفل
1 ثمرة بطاطس
الطريقة:
1- شوّحي البصل والثوم في الزبدة، وبعد ما لونهم يصفرّ ضيفي الطماطم وقلّبيهم مع بعض.
2- ضيفي الميه ومكعّب ماجي والأورجوانو والملح والفلفل، وسيبيهم على النار شوية، وبعد كده ضيفي قطع الجزر والبطاطس وسيبيهم على نار متوسطة، لغاية ما تتأكدي إن البطاطس والجزر استووا تماماً.
3- بعد كده اضربي كل المكوّنات في الخلاط، وبعدين صَفّيهم كويس ورجّعيهم تاني، بعد كده سيبيهم على نار هادية.. وقدّميها سخنة وبالهنا والشفا.
********************
اللازانيا طبق مميز جداً ولذيذ
لازانيا باللحمة المفرومة
زي ما كلّنا عارفين إن المطبخ الإيطالي بيتميز بأطباق المكرونة والمعجّنات، النهارده الطبق الرئيسي عندنا طبق مميز جداً ولذيذ..
المقادير:
12 شريحه لازانيا (موجودة في السوبر ماركت)
1/2 كيلو لحمة مفرومة
3 معالق كبيرة زيت
معلقة كبيرة زبدة
2 بصلة مفرومة
فصين ثوم مفرومين
2 معلقة بقدونس مفروم
ملح وفلفل وزعتر
جبنة موتزاريللا
1 بيضة
مقادير الصلصة البيضاء:
5 معلقة كبيرة زبدة
5 معلقة كبيرة دقيق
4 كوب لبن
الطريقة:
1- اسلقي شرائح اللازانيا في ميه مغليّة، وضيفي قليلاً من الزيت وسيبيها على النار لغاية ما تستوي، وبعد كده برّديها تحت الماء البارد وسيبيها تتصفى.
2- هاتي وعاء تاني، وحطي فيه الزيت والبصل والثوم وشوّحيهم شوية على النار لغاية لونهم ما يبقى ذهبي فاتح، وبعد كده حطي اللحمة وممكن تضيفي كمية ميه صغيرة، وتبّليها بالملح والفلفل والزعتر وسيبيها لغاية ما تستوي.
3- بعد ما اللحمة المفرومة تبدأ تدخل في السوى ضيفي البقدونس المفروم وسيبيهم على النار لمدة دقيقتين، وبعد كده ارفعيها من على النار.
4- لتحضير الصلصة البيضاء هاتي حلّة صغيرة وحطي فيها الزبدة ومعاهم الدقيق وقلبيهم كويس، لغاية ما تحسّي إن الدقيق اتحمّر وبقى لونه ذهبي، ابدئي ضيفي اللبن تدريجياً مع الاستمرار في التقليب على نار متوسطة لغاية ما تحصلي على الكثافة اللي إنتي عايزاها، وبعد كده حطي الملح والفلفل حسب رغبتك.
5- أحضري صينية متوسطة الحجم وادهنيها بشوية زبدة، وبعد كده حطي شرائح اللازانيا بطريقة متناسقة، وبعد كده افردي عليها طبقة من اللحمة المفرومة وطبقة من الجبنة الموتزاريللا، وكرري العملية دي بحيث تكون اللازانيا هي الشريحة الأخيرة.
6- في النهاية حطي الصلصة البيضاء؛ بس لازم تراعي إنها تغطي كل الجوانب، وممكن تسيبي شوية صلصة بيضاء صغيرين في الآخر وتضربي معاهم بيضة وتفرديها على وش الصينية مع كمية كبيرة من الجبنة الموتزاريللا، وممكن تستبدليها بجبنة رومي مبشورة.
7- بعد كده دخّلي الصينية في الفرن في درجة حرارة متوسطة، وسيبيها لغاية ما تستوي ووشها يحمر، وبعد كده طلّعيها من الفرن وسيبيها تهدى شوية، وقطّعيها وقدّميها.. وبالهنا والشفا.
*******************
بانا كوتا طبق بارد وخفيف علشان يخفف من حرارة الجو
بانا كوتا "Panna Cotta"
في الصيف دايماً، بيُفضّل إننا نختم وجبتنا بطبق حلو بارد وخفيف علشان يخفف علينا حرارة الجو، وطبق الحلو معانا النهارده طبق إيطالي مية في المية، وبيعتبر من الأطباق المشهور جداً عند الإيطاليين، و"بانا كوتا" تعني الكريمة المطبوخة، وطريقتها سهلة وسريعة جداً.
المقادير:
كوبين ونصف لبن كامل الدسم
2/3 كوب كريمة لبّاني "موجودة في السوبر ماركت"
معلقة صغيرة فانيليا
باكيت ونصف جيلاتين "موجود عند العطار"
1/3 كوب سكر
مقادير صوص التزيين:
1/4 كيلو فراولة
3/4 كوب سكر
الطريقة:
1- اخلطي كوبين من اللبن مع الكريمة اللبّاني في وعاء غويط وسخّنيهم على النار.
2- ذَوّبي الجيلاتين في نصف كوب اللبن المتبقي على النار، وبعد ما الجيلاتين يذوب تماماً ارفعي الخليط من على النار وضيفي عليه معلقة فانيليا.
3- ضيفي الجيلاتين الذائب في اللبن إلى خليط الكريمة واللبن، وقلّبيهم كويس مع بعض، وبعد كده حطّيه في أطباق التقديم ودخّليه الفريزر لمدة ساعتين على الأقل.
4- ابدئي حضّري صوص الفراولة، بإنك تقطّعي الفراولة لقطع صغيرة، وتحطيها مع السكر، ونصف كوب ميه في وعاء على النار، وسيبيهم لغاية ما يغلوا كويس، وبعد كده اضربي الصوص في الخلاط، ودخّليه الثلاجة لمدة ساعة علشان يبرد.
5- في النهاية طلّعي الخليط من الفريزر وحطّي على الوش صوص الفراولة اللي حضّرتيه، وممكن تزيّني الأطباق ببعض قطع الفراولة.. وقدّميه وبالهنا والشفا.

نتمنّى إنها تكون عجبتك..
وتجربي كل الوصفات وتبعتي تقولي لنا على النتيجة..
واستنونا في عزومات تانية من كل مطابخ العالم..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...
"ورينا شطارتِك"