عجينة البيتزا سهلة وسريعة في سفرتك قبل العيد

طبعا مشغولة في تحضيراتك واستعداداتك للعيد، ومش عارفة هتعملي إيه على الفطار بعد صيام وقفة عرفة، علشان كده فكرنا النهارده إننا نقدّم لك على "سفرة دايمة" وجبة خفيفة تعمليها بسرعة، وبناء على طلب كتير منكم هنقدّم لكم البيتزا بطريقة سهلة جدا تقدروا تعملوها بكل سهولة.
عجينة البيتزا
المقادير:
2 كوب دقيق
1/ 3 كوب زيت
2 ملعقة صغيرة بيكنج بودر
ملعقة ملح
بيضة
1 1/2 كوب لبن
الطريقة:
1- اخلطي الأول المكونات الجافة مع بعض؛ الدقيق والملح والبيكنج بودر، وانخليهم في طبق غويط.
2- اضربي البيضة كويس، وحطي معاها رشة فلفل أسود بسيطة، وبعدين اعملي حفرة في وسط الدقيق، وصبي فيها الزيت والبيض، وقلبي الدقيق مع الزيت والبيض بملعقة خشبية بحرص لحد ما الخليط يمتزج كويس.

3- بعد كده ابدئي اخلطي اللبن مع الخليط تدريجيا لحد ما العجينة تبقى لينة، واعجنيها بإيديك كويس، وشكّلي منها البيتزا بكل الأشكال اللي تحبيها.
الخطوة اللي بعد كده هي صوص الطماطم، وده بيكون واحد في كل الأنواع
صوص الطماطم
المقادير:
كيلو طماطم
بصلة صغيرة
4 فصوص ثوم
1/ 2 كوب زيت زيتون
زعتر
ملح
الطريقة:
1- قطعي الطماطم لأنصاف، ورصيها في صينية، وحطي معاها الثوم والبصلة تكون متقطعة نصفين، وحطي عيدان الزعتر، وصبي عليهم الزيت ورشة الملح، ودخّلي الصينية تحت الشواية، وسيبيها لحد ما الطماطم تتشوي.
2- بعد ما المكونات تتشوي كويس اضربيها في الخلاط وصفّيها، هيبقى صوص سميك، وتقدري تستخدميه مع كل أنواع البيتزا اللي هتعمليها.

*************************

بيتزا بالجبنة
بيتزا بالجبنة
المقادير:
عجينة بيتزا
صوص البيتزا
جبنة رومي
جبنة شيدر
جبنة مثلثات
جبنة بيضا
زيتون أسود
رشة زعتر
فلفل رومي مكعبات
الطريقة:
1- افردي العجينة في صينية رفيعة، وحطي عليها الصوص، وخلي بالك ماتحطيش منه عند الأطراف علشان مايتحرقش.
2- بعد كده وزعي كل أنواع الجينة والزيتون والفلفل الرومي ورشّة الزعتر، ودخليها الفرن لمدة تلت ساعة، ولما تستوي قطّعيها أرباع وقدميها.. بالهنا والشفا.

*************************
بيتزا بالخضراوات
بيتزا بالخضراوات
المقادير:
عجينة بيتزا
صوص بيتزا
فلفل ألوان
زيتون أسود أو أخضر
جبنة شيدر
الطريقة:
1- افردي العجينة في صينية البيتزا، وحطي عليها صوص الطماطم، وبعدين وزعي شرايح الفلفل والزيتون والجبنة.
2- دخّليها الفرن وسيبيها لمدة تلت ساعة، وبعدين قدميها.. بالهنا والشفا.
ممكن تنوعي في شكل البيتزا زي ما إنتي عايزة، وتغيّري في شكل الحشو؛ يعني ممكن تحطي لحمة معصّجة أو سوسيس أو جمبري مع الخضار أو تونة أو أي محتويات عايزة تحطيها.
*************************
عصير البرتقال بالنعناع والليمون
بعد الفطار طبعا محتاجين مشروب يروي عطشنا ويعوض السوائل اللي فقدناها طول اليوم، والعصير اللي هنقدمه النهارده هو:
عصير البرتقال بالنعناع والليمون
المقادير:
كوب سكر
1/ 2 كوب ميه
10 حبات برتقال
3 حبات ليمون
6 كوب صودا أو ميه غازية
كوب نعناع أخضر
الطريقة:
1- حطي السكر والميه في حلة صغيرة، وحطيهم على نار متوسطة وقلبيهم، وبعدين سيبيهم على النار لحد ما السكر يدوب تماما، وحطي فيه قطعة قشرة برتقال، وحطيها مع السكر والميه.
2- اعصري الليمون والبرتقال بالعصّارة سواء اليدوية أو الكهربائية، وبعدين صبي العصير في زجاجة، وصبي عليه الشربات اللي جهّزتيه، وحطيه في التلاجة.
3- عند التقديم.. حطي أوراق نعناع في كل كوب، وصبي نصف الكوب من عصير البرتقال، وبعدين صبي الصودا أو أي مياه غازية تحبيها في باقي الكوب، وقدميه.. بالهنا والشفا.
خلصت وصفاتنا النهارده..
استنونا في العيد مع وصفات وأكلات شهية ولذيذة..
وكل عام وأنتم بخير..
سلام،،،