عزومة 8 رمضان

عصير الرمان والبرتقال
العصير ده من العصاير المفيدة والمغذية جداً...
المقادير:
* حبة رمان مقشرة
* عصير 3 برتقالات
* 1/4 كوب سكر
* كوب كبير مية باردة
* مكعبات تلج "اختياري"
الطريقة:
حطي حبوب الرمان مع عصير البرتقال مع المية مع السكر في الخلاط، واضربيهم كلهم مع بعضهم كويس، وقبل أذان المغرب بربع ساعة صبي العصير في كاسات العصير وضيفي إليه مكعبات التلج.

*****************

شوربة الجمبري
شوربة الجمبري
المقادير:
* نصف كيلو جمبري صغير
* ملح وفلفل أسود
* عصير ليمونة
* 1/2 كوب دقيق
* 3 أكواب مية
* بقدونس مقطع قطعاً صغيرة
* نص رأس ثوم مدقوق
* 1/4 كوب زيت
* معلقة سمنة
* أوراق بقدونس"للتزيين"
* 1/4 حزمة كزبرة مقطعة قطعاً صغيرة
الطريقة:
1- اغسلي الجمبري كويس، وبعد كده اخلطيه بالثوم المدقوق والملح والفلفل، وقلبيهم مع بعض كويس، وسيبيه نص ساعة علشان يتبل.
2- بعد مرور النص ساعة حطي الجمبري على النار وحطي معاه الزيت والسمنة مع التقليب المستمر لغاية ما الجمبري يبقى لونه ذهبي.
3- أثناء ما الجمبري بيتحمر اخلطي المية مع الدقيق مع التقليب لغاية ما شكلهم يبقى كريمي، بعد كده ضيفي إليهم الملح والبهارات والفلفل الأسود وقلبيهم مع بعض كويس.
4- بعد ما الجمبري يتحمر ضيفي إليه الخليط السابق، وسيبيه على النار لمدة نص ساعة مع استمرار التقليب المستمر علشان ما يكلكعش.
5- بعد كده صبي الشوربة في الأطباق، وضيفي إليها عصير الليمون، وزيّني الطبق بالكزبرة وأوراق البقدونس.

*****************

سلطة الخضراوات بالطحينة
سلطة الخضراوات بالطحينة
المقادير:
* 2 حبة طماطم
* 2حبة خيار
* بصلة
* شرائح ليمون
* حبة فلفل أخضر
* 3 فصوص ثوم مبشور
* معلقة كبيرة ملح
* 3 معالق طحينة
* حبة جزر
* معلقة صغيرة شطة حمراء
* معلقة صغيرة كمون
* معلقة زيت زيتون
* عصير ليمونة
الطريقة:
1- قطعي الطماطم والخيار والجزر والفلفل قطع صغيرة.

2- قطعي البصلة قطع صغيرة وضيفي إليها عصير الليمون والملح والفلفل والكمون، وضيفي إليها الثوم المبشور والطحينه وزيت الزيتون.. بعد كده ضيفي إليها باقي الخضار وقلبيهم مع بعض كويس.
3- بعد ما تقلبيهم مع بعض كويس حطي السلطة في أطباق التقديم وضيفي إليها شرائح الليمون.

*****************

فيليه السمك المقلي
فيليه السمك المقلي
المقادير:
* كيلو سمك فيليه "هامور أو أي نوع إنت بتحبيه"
* عصير ليمونة
* كوب دقيق
* كوب بقسماط
* 3 بيضات
* ملح وفلفل
* زيت للقلي
* 8 فصوص ثوم
* قرن فلفل أحمر مقطع قطعاً صغيرة
* كمون
* معلقة كبيرة بهارات سمك
* أوراق جرجير "للتزيين"
* شرائح ليمون "للتزيين"
الطريقة:
1- هاتي فصوص الثوم والفلفل الأحمر، وحطيهم في الهون، ومعاهم الملح والكمون والبهارات، واطحنيهم كويس مع بعض، وضيفي إليهم الليمون وقلبيهم.
2- هاتي السمك واغسليه كويس، وبعد كده رشي عليه الخليط السابق وسيبيه لمدة نص ساعة علشان يتبّل كويس.
3- هاتي طبق كبير وحطي فيه الدقيق والبقسماط والفلفل والملح.
4- هاتي طبق تاني صغير، وحطي فيه البيض المخفوق المضاف ليه رشة ملح وفلفل.
5- حطي السمك في البيض، وبعد كده حطيه في الدقيق والبقسماط، وكرري نفس الموضوع لغاية ما تلاقي السمك خلص.
6- سخني الزيت كويس قوي، واقلي السمك فيه، وبعد ما تخلّصي قلية السمك طلعيه وحطيه في أطباق التقديم، وزيني الطبق بأوراق الجرجير وشرائح الليمون؛ وممكن إنك تعملي مع الطبق ده بطاطس محمرة.

*****************

تارت التمر والكسترد
تارت التمر والكسترد
المقادير:
* 1/2 كوب زبدة
* بيضة
* 2 كوب دقيق
* 3 معالق كبيرة سكر
* 1/4 كوب تمر مقطع قطعاً صغيرة
* 1/3 كوب ماء
الحشو:
* كوب تمر
* كوب كسترد
* 2 معلقة كبيرة سكر بودرة "للتزيين"
الطريقة:
1- اخلطي الدقيق مع السكر، وقطع التمر وقلبيهم مع بعض كويس، وضيفي إليهم الزبد واعجني الخليط ده مع بعضه بأطراف أصابعك.
2- ضيفي للخليط السابق البيض والمية مع استمرار التقليب، لغاية ما تلاقي العجينة بقت لينة افرديها في القوالب الخاصة بالتارت وغطيها بالكسترد والتمر، وبعد كده حطيها في فرن درجة حرارته 160 درجة مئوية لمدة 20 دقيقة وبعدين طلعيه من الفرن وسيبيه لغاية ما يبرد وزينيه بالسكر البودرة.

*****************

وبكده تكون خلصت عزومتنا النهارده، وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة اوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************