جمبري مقلي بالجبنة

النهاردة هنقدم لكم طريقة مميزة جداً لعمل الجمبري..
وهي طريقة عمل الجمبري المقلي بالجبنة..
نتمنى إنكم تجربوها وتعجبكم..
المقادير
2 بيضة مخفوقة
معلقة كبيرة بقدونس مفروم ناعم
كوب جبنة رومي مبشورة
زيت ذرة للقلي
كوب دقيق
كيلو جمبري مقشر
ملح وفلفل
كوب بقسماط
معلقة صغيرة ثوم مفروم
الطريقة
1- اغسلي الجمبري كويس وبعد كده حطيه في مصفاة وسيبيه علشان يصفي المية.
2- هاتي فصوص الثوم وقرن فلفل أحمر مقطعاً قطعاً صغيرة، وحطيهم في الهون ومعاهم الملح والكمون والبهارات، واطحنيهم كويس مع بعض.. بعد كده ضيفي إليهم الليمون وقلبيهم مع بعض ومعاهم الجمبري، وقلبيهم مع بعض كويس ، وسيبيه لمدة ساعتين علشان يتبّل كويس.
3- حطي الدقيق في طبق، وفي طبق آخر اخلطي البقسماط والجبنة، وحطي البيض في وعاء ثالث، وضيفي إليهم نص معلقة ملح وفلفل واخفقيه كويس.
4- بعد مرور ساعتين وبعد ما الجمبري يتبل اغمسي الجمبري في الدقيق ثم البيض، وبعد كده في مزيج البقسماط والجبنة وغطيه وحطيه في التلاجة لمدة 15 دقيقة.
5- سخني الزيت كويس، وبعد كده حمّري الجمبري في الزيت لغاية ما لونه يبقى ذهبي، وبعد كده طلعيه على ورق التقديم وزيّني الطبق بالبقدونس وقطع الليمون.
في النهاية كل أسرة "قمر 14" بتشكر الأصدقاء اللي بعتوا لنا وصفاتهم الجامدة دي..
ويا ريت تجرّبوها فعلاً..
وفي انتظار آرائكم..
وكمان وصفاتكم الجامدة على لينك..
ورينا شطارتِك،،،