تشيكن فيليه وماربل كيك في عزومة "سفرة دايمة"

يوم الجمعة بتحلى اللمة على الأكل..
علشان كده حبينا نشاركك اللمّة الحلوة دي..
ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا..
ونقدّم لك كل أسبوع اقتراح لعزومة مكوّنة من العصير والطبق الرئيسي وطبق السلطة وطبق الحلو..
علشان تنوّعي لعيلتك.. وتبهريهم بأكلاتك الجامدة..
تعالي بقى نشوف هنعمل إيه النهارده..
********************
ممكن تزيني الكاسات بورق النعناع والليمون
عصير الجوافة باللبن
المقادير:
4 ثمرات جوافة مقطّعة لمكعبات
كوب لبن بارد
3 معالق لبن بودرة
سكر
ثلج
الطريقة:
1- نضع كل المقادير مع بعضها في الخلاط، وبعد كده صفي العصير وحطيه في الثلاجة، وعند التقديم صبي العصير في الكاسات.. وبالهنا والشفا.
********************
سلطة البسلة مفيدة وصحية جداً
سلطة البسلة والطماطم
المقادير:
1/2 كيلو بسلة
1 ثمرة طماطم
2 معلقة كبيرة زيت زيتون
1/4 معلقة صغيرة فلفل أسود
1/2 معلقة صغيرة ملح
ليمونة
الطريقة:
1- اسلقي البسلة، واغسلي الطماطم وقطعيها لمكعبات، وقلبيهم مع بعض.
2- اعصري الليمونة، واخلطي العصير بتاعها مع زيت الزيتون والملح والفلفل الأسود، وضيفي الخليط على البسلة والطماطم، وحطيهم في طبق التقديم.. وبالهنا والشفا.
********************
ممكن تزيني الشوربة بالبقدونس
شوربة الجزر والشوفان
المقادير:
معلقتين زيت زيتون
نصف كوب شوفان "متوافر عند العطار"
بصلة مقطّعة لقطع صغيرة
1/2 كيلو جزر مقطع لقطع صغيرة
فصين ثوم مفرومين
ثمرة بطاطس مقطعة لمكعبات
4 أكواب شوربة
ملح وفلفل أسود وكمون
بقدونس أو نعناع للتزيين

الطريقة:
1- هاتي طاسة، وحطي فيها الزيت، وشوّحي فيها البصل والثوم والبطاطس والجزر ومعاهم الملح والفلفل والكمون لمدة 5 دقائق.
2- بعد كده ضيفي عليهم الشوربة، وسيبيهم على النار لمدة 30 دقيقة، وبعدين اضربي الشوربة في الخلاط، وبعد كده رجعيها تاني على النار وضيفي عليها الشوفان وسيبيها على النار لمدة 5 دقائق، وبعد كده حطي الشوربة في أطباق التقديم وزينيها بالنعناع أو البقدونس.. وبالهنا والشفا.
********************
ممكن تعملي معاها طبق أرز أبيض أو بطاطس محمرة
تشيكن فيليه
المقادير:
6 قطع صدور فراخ
كوب لبن رايب "أو كوب زبادي مخفف بالمية أو اللبن"
4 معالق كبيرة بقسماط مطحون
ربع كوب جبنة رومي مبشورة
4 معالق كبيرة دقيق شوفان
5 معالق كبيرة زيت زيتون
4 فصوص ثوم مفرومين
كسبرة وروزماري
زنجبيل مبشور
ملح وفلفل
شطة
الطريقة:
1- اخلطي الملح مع الفلفل والشطة والكسبرة والروزماري والزنجبيل والثوم واللبن الرايب، وقلّبيهم مع بعض كويس، وتبلي بهم الفراخ، وشيليها في الثلاجة لمدة 10 دقايق.
2- اخلطي الجبنة مع الشوفان والبقسماط وشوية فلفل وروزماري، واطحنيهم مع بعض.
3- بعد كده حطي الفراخ على الخلطة ورصيهم في صينية ورشي على الوش زيت الزيتون، وبعدين دخلي الصينية الفرن وسيبيها لمدة 20 دقيقة، وبعد كده طلعيها وقدّميها.. وبالهنا والشفا.
********************
كيكة لذيذة وشكلها حلو
ماربل كيك
المقادير:
2 كوب دقيق
2 معلقة كبيرة دقيق ذرة
5 بيضات
كوب سكر
كوب زيت
نصف كوب لبن
2 معلقة صغيرة فانيليا
2 معلقة كبيرة نشا
3 معالق صغيرة بيكينج باودر
3 معالق كبيرة كاكاو
معلقة كبيرة مربى مشمش
ذرة ملح
الطريقة:
1- افصلي البياض عن الصفار، واضربي البياض كويس مع الملح وكمية صغيرة من السكر، وسيبيه على جنب.
2- بعد كده اضربي الصفار مع السكر والفانيليا، وبعد كده ضيفي الزيت لخليط الصفار تدريجياً مع الاستمرار في الخفق، وأثناء الخفق ضيفي المربى وبعدين اللبن.
3- بعد كده بتضيفي الدقيق والبيكينج باودر والنشا على خليط الصفار، وبعدين بتضيفي عليهم خليط بياض البيض اللي جهزتيه في الأول.
4- افصلي جزء من العجينة وضيفي عليه الكاكاو.
5- هاتي قالب مدهون زبدة ومرشوش بالدقيق، وحطي فيه كمية من العجين الفاتح، وبعد كده حطي كمية من العجين اللي عليه الكاكاو، وبعد كده العجين الفاتح، وتستمري على كده لغاية ما كمية العجين اللي عندك تخلص.
6- هاتي شوكة وابدئي تشكيل العجينة بشكل عشوائي؛ بحيث إن العجين الفاتح يتداخل مع العجين الغامق.
7- دخلي القالب في فرن ساخن على درجة حرارة عالية، وسيبيه لمدة 5 دقايق، وبعد كده قللي درجة حرارة الفرن وخليها متوسطة، وسيبي الكيكة في الفرن لمدة 35 دقيقة أو لغاية ما تحسي إنها استوت، وبعد كده طلعيها من الفرن وقطعيها شرائح.. وبالهنا والشفا.

وفي النهاية نتمنّى إن عزومة النهارده تكون عجبتِك..
وتجرّبي كل الوصفات وتبعتِ تقولي لنا على النتيجة..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...
"ورينا شطارتِك"
وإلى اللقاء في العزومة الجاية،،،