فراخ بصوص الزبدة على الطريقة الهندية

لو بتحبّي تنوّعي في أكلك وتجرّبي وصفات جديدة من مطابخ عالمية، هنقدِّم لكم النهارده على "سفرة دايمة" طريقة جديدة للفراخ بصوص الزبدة من المطبخ الهندي، جرّبوها وابعتوا لنا كل الوصفات اللي عايزين تعرفوها.
فراخ بصوص الزبدة على الطريقة الهندية
المقادير:
* 1/ 4 كيلو صدور فراخ
* 2 ثمرة طماطم
* 1/ 2 كوب زبادي
* ملعقة كبيرة زيت
* ملعقة كبيرة سكر
* ملعقة صغيرة بهارات
* ملعقة كبيرة بابريكا
* ملعقة صغيرة كزبرة
* ملعقة صغيرة كمون
* 2 ملعقة كبيرة زبدة
* ملعقة متوسطة ثوم
* ملعقة صغيرة كزبرة فريش
* 2 ملعقة كبيرة كريمة طهي
* ملعقة متوسّطة زنجبيل فريش
* ملح
الطريقة:
1- قطّعي الفراخ مكعبات، وتبّليها بخليط الزبادي والزنجبيل والثوم المفروم والبهارات والكمون والكزبرة الناشفة والبابريكا والزيت، وسيبيها في التتبيلة لمدة ساعتين على الأقل.
2- بعد ما الفراخ تتبّل حطّيها في صينية، ودخّليها الفرن على درجة حرارة متوسطة، وسيبيها لحد ما تستوي.
3- قشّري الطماطم، وحطّيها في مية تتسلق، وحطّي معاها رشة بابريكا وبهارات وقرفة وحطّي الزبدة، وسيبيها على النار لمدة نصف ساعة، وبعدين اهرسيها أو اعصريها في الخلاط.
4- حطّي الفراخ بعد ما تستوي في صوص الطماطم، وسيبيها على النار لمدة 10 دقائق، وقبل ما تطفي عليها حطي الكريمة والكزبرة الفريش، وتبّليها بالملح وحطي السكر وملعقة زبدة، وقدّميها بالهنا والشفا.

خلصت وصفتنا النهارده..
استنونا مع وصفات جديدة كل يوم..
سلام،،،