عزومة 12 رمضان

عصير الموز والجوافة باللبن
العصير ده لذيذ ومغذي وفيه فيتامينات مهمة جداً..
المقادير:
* 3 ثمرات موز
* 3 ثمرات جوافة
* كوب كبير لبن بارد
* 1/2 كوب سكر
* عصير ليمونة
* مكعبات تلج

الطريقة:
قطعي الموز مع الجوافة، مع مراعاة إنك تشيلي بذرة الجوافة، حطي الموز مع الجوافة مع عصير الليمون مع اللبن مع السكر مع المية في الخلاط، واضربيهم مع بعض كويس، بعد كده صفي العصير كويس وصبّيه في كاسات العصير وضيفي إليه مكعبات الثلج.

**********************
شوربة بالخضار والفراخ والمشروم
شوربة بالخضار والفراخ والمشروم
المقادير:
* 1/4 كيلو صدور فراخ مقطعة قطعاً كبيرة ومسلوقة
* 3 بصلات مقطعة قطع صغيرة جداً
* كوب لبن
* 3 أكواب شوربة فراخ
* كوب دقيق
* 1/4 كيلو مشروم مقطع شرائح
* 3 معالق كبيرة زبدة
* عصير ليمونة
* 1/2حزمة بقدونس مقطعة قطعاً صغيرة
* ملح وفلفل
* 3 أكواب خضار مشكل ومقطع مكعبات صغيرة (جزر - بسلة - بطاطس)
الطريقة:
1- سيّحي الزبدة على النار، وبعد كده ضيفي إليها البصل مع استمرار التقليب لغاية ما لون البصل يبقى ذهبي.
2- لما تلاقي إن لون البصلة بقى ذهبي ضيفي إليها الدقيق مع استمرار التقليب لمدة خمس دقائق أو لغاية ما الدقيق يحمرّ.
3- بعد مرور الخمس دقائق ضيفي إليه اللبن تدريجياً مع التقليب المستمر علشان الدقيق ما يكلكعش.
4- بعد كده ضيفي شوربة الفراخ مع استمرار التقليب لغاية ما تلاقي إن العجينة بقت متجانسة وسمكية ومش مكلكعة ضيفي إليها الخضار والمشروم.
5- سيبي الخليط علي النار لمدة ربع ساعة، وبعد كده ضيفي إليه عصير الليمون والبهارات والملح، وسيبه على النار لمدة ربع ساعة كمان أو لغاية ما تلاقي الخضار والمشروم استوى اطفي البوتجاز، وحطي الشوربة في أطباق التقديم وزيّني الأطباق بالبقدونس.

**********************
سلطة البسلة على الطريقة الروسية
سلطة البسلة على الطريقة الروسية
المقادير:
* 1/4 كيلو بسلة
* 5 ثمرات بطاطس مسلوقة
* حزمة فجل
* زيتون أخضر
* كرفس
* ملح
* معلقة مايونيز
الطريقة:
اسلقي الخضراوات دي مع بعضها ما عدا الفجل وبعد ما تسلقي الخضراوات حطيها في مصفاة، وبعد كده ضيفي إليها الملح والمايونيز وحلقات الفجل، وقلبيهم مع بعض وحطيهم في طبق السلطة.

**********************
برياني الدجاج
برياني الفراخ
المكونات:
* بصلة مقطّعة حلقات
* قطع فراخ مخلية من الجلد والعظم
* 5 فصوص ثوم مفروم ناعم
* زنجبيل مفروم ناعم
* شوربة فراخ
* طماطم مقطعة حلقات
* علبة زبادي
* 3 بيضات مسلوقة
* 3 أكواب أرز بسمتي
* معلقة زعفران
* كوب لبن
* بهارات مطحونة عبارة عن (شطة - ملح - فلفل أسود - كمون - حبهان - قرفة - كزبرة - زنجبيل)
* بهارات صحيحة (حبهان - ورق لاورا - فلفل أسود - قرنفل - شمر - قرفة)
الطريقة:
1- تبّلي قطع الفراخ بالبهارات المطحونة وسيبيهم مع بعض لمدة ساعة علشان الفراخ تتبّل كويس.
2- حطي شوية زيت في صينية على النار، وضيفي إليها البصل، وحمّريه لغاية ما لونه يبقى ذهبي.
3- بعد مرور الساعة ضيفي الفراخ إلى البصل مع التقليب المستمر، وبعد كده ضيفي إليه الثوم المفروم والزنجبيل المفروم وقلبيهم مع بعض كويس لمدة 20 دقيقة على النار، وبعد كده اطفي البوتاجاز.
4- بعد كده ضيفي إليهم الشوربة، ورصي من فوقه حلقات الطماطم، وضيفي إليه الزبادي وشوية كزبرة خضراء.
5- اغسلي الأرز كويس وانقعيه لمدة نص ساعة في المية، وبعد كده اسلقيه في حلة على النار فيها مية مضاف إليها البهارات الصحيحة.
6- صفي الأرز من المية بعد ما تسلقيه وضيفيه فوق سطح البرياني، ومن فوقه حطي الزبادي، واغرسي فيه البيض المسلوق.
7- انقعي الزعفران في اللبن لغاية لون اللبن ما يبقى برتقالي، ورشي اللبن على سطح الأرز، وبعد كده ضيفي إليه قطع من الزبد فوق الوجه.
8- حطي الصينية في الفرن لمدة نص ساعة، وبعد كده خرّجيها من الفرن وحطيه في أطباق التقديم، وعلى فكرة ممكن أنك تُزينيه بالكزبرة الخضراء والكاجو أو اللوز المحمص.

**********************
موز بالكراميل
موز بالكراميل
المقادير:
* 2 معلقة كبيرة عصير ليمون
* 1/3 كوب كريمة لباني
* معلقة كبيرة زبد
* 3/4 كوب سكر بني
* 1/2 كوب لوز مقشر ومقطّع نصفين بالطول "للتزيين"
* 1/2 كوب كريمة مخفوقة مثلجة
* 4 حبات موز
الطريقة:
1- دوبي الزبدة في إناء متوسط فوق نار متوسطة، وبعد كده ضيفي إليها السكر وقلبيهم مع بعض كويس، وسيبيهم على النار لغاية ما السكر يبقى لونه ذهبي.
2- ضيفي إليهم الكريمة اللباني، وقلبيهم مع بعض باستمرار لغاية ما تلاقي إن الصوص بقى أملس اطفي البوتجاز، وسيبيه علشان يبرد وخدي بالك إن لو كان قوام الصوص شديد الكثافة يبقى ضيفي إليه معلقتين من اللبن وقلبيهم مع بعض.
3- قطعي الموز بالطول إلى نصفين وحطي كل نصفين في طبق وادهنيهم بعصير الليمون، وصبي فوقهم صوص الكراميل وزينيه بالكريمة المخفوقه واللوز.

**********************

وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..

وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************