بيتي فور مالح للفطار والحفلات على "سفرة دايمة"

كتير بعتوا لنا على وصفات وأكلات سريعة للفطار..

والنهارده في "سفرة دايمة" هنقدم لكم طريقة عمل بيتي فور مالح..

وده من الحاجات البسيطة اللي ممكن ناكلها مع الشاي الصبح..

وكمان لو عندك عيد ميلاد في البيت وعايزة تعملي أصناف بإيديك، تابعونا.
بيتي فور مالح
المقادير:
* 3 بيضات
* 1 1/ 4 كوب زبدة
* 1 3/ 4 كوب دقيق
* ملعقة كبيرة ملح
* ملعقة كبيرة سكر
* 2 ملعقة كبيرة زعتر
* 2 ملعقة كبيرة سماق
* 1/ 4 ملعقة صغيرة فانيليا
* 1/ 4 ملعقة صغيرة بيكنج بودر
للتزيين:
* قطع طماطم
* زيتون أسود
* جبن كريمة
الطريقة:
1- اخلطي الدقيق والزبدة والبيكنج بودر والملح والسكر في العجانة لمدة دقيقتين على سرعة متوسطة.
2- حُطي البيض تدريجيا والفانيليا، واستمري في العجن؛ لحد ما العجين يبقى ناعمة.
3- قسمي العجينة نصفين، وحُطي على نص منها الزعتر وقلبيه بالإيد، والنص التاني حُطي عليه السماق.
4- ابدئي شكّلي العجين بماكينة البيتي فور أو كيس الحلواني بالشكل اللي أنت عايزاه.
5- رُصي البيتي فور في صاج مدهون زبدة، وزيّنيه بقطع الطماطم والزيتون على السطح.
6- حُطّيه في الفرن لمدة 15 دقيقة أو لحد ما يستوي، وبعدين سيبيه يبرد.
7- بعد ما يبرد حُطي كمية قليلة من الجبن الكريمة على سطح البيتي فور الملامس للقاع، والصقي عليه حبة بيتي فور تانية، وكرري العملية مع باقي الكمية.


خلصت وصفتنا النهارده
ابعتوا قولوا لنا رأيكم
وكمان كل الوصفات اللي عايزين تعرفوها
سلام،،،