كفتة الجمبري على الطريقة البورسعيدية

كتير منكم بعتوا لنا بيطلبوا منا طريقة عمل كفتة الجمبري..
النهارده على "سفرة دايمة" هنقدم لكم كفتة الجمبري على الطريقة البورسعيدية، تابعونا.

كفتة الجمبري
المقادير:
* 1/2 كيلو جمبري
* 1/2 كيلو سمك فيليه
* حزمة (شبت، بقدونس، كسبرة)
* 3 ملاعق كبيرة دقيق (يمكن استبدال الدقيق بكوب أرز مطبوخ حسب رغبتك)
* ملعقة صغيرة كمون
* 2 فصوص ثوم
* عصير ليمونة
* بصلة صغيرة
* ملح وفلفل
* شطة

لعمل الصلصة:
* فص ثوم
* 3 ملاعق زيت
* كوب عصير طماطم
الطريقة:
1- هنخلط كل المكونات مع بعض في الكبة ونفرمهم كويس أوي علشان تبقى ناعمة.
2- بعد كده ابدئي شكّلي الكفتة واقليها في زيت غزير ساخن، ولو مش عايزة تقليها في الزيت، ممكن تدهنيها زيت بسيط ودخّليها الفرن.
3- لعمل الصلصة، شوحي الثوم المفروم في الزيت وبعدين حطي عصير الطماطم، وتبليها بالملح والكمون وسيبيها تتسبك.
4- بعد ما الصلصة تتسبك حطي فيها الجمبري وسيبيهم شوية على النار علشان الصلصة تتداخل في الكفتة، وبعد كده زيّنيها بالبقدونس وقدميها.. بالهنا والشفا.


خلصت وصفتنا النهارده
ابعتوا قولوا لنا آراءكم وتعليقاتكم
وكمان الوصفات اللي عايزين تعرفوها
سلام،،،