أشهى الأطباق × عيد الأضحى على "سفرة دايمة"

كل سنة وكل أصدقاء "بص وطل" في كل مكان بصحة وخير وسعادة..
بعد أيام قليلة هنحتفل كلنا بعيد الأضحى المبارك..
علشان كده عددنا النهارده من "سفرة دايمة"..
هيكون عن أحلى الأصناف اللي بتميّز عيد الأضحى المبارك من لحوم ومشويات وفتة ورقاق..


*******************

آخر حاجة هتعمليها إنك تصبي صلصة الطماطم بالكمية اللي إنتِ عايزاها
الفتة المصرية بالصلصة والتقلية
مقادير الفتة:
* كيلو ونصف لحمة "ضاني أو بتلو"
* 2 ثمرة جزر مُقشر مُقطع حلقات
* 2 عود كرفس مُقطع مكعبات
* 2 بصلة متوسط مُقطع مكعبات
* 2 كوب أرز
* 6 أكواب ماء
* 2 ورق لاورا
* 2 فص مستكة
* 4 حبات قرنفل صحيح
* عيش محمص مكسّر
مقادير التقلية:
* 6 ملعقة كبيرة زيت زيتون
* 6 فص ثوم مفروم ناعم
* 4/ 1 كوب خل
* كوب شوربة لحمة
مقادير الصلصة:
* 3 ملعقة كبيرة صلصة طماطم (معجون)
* 1/ 4 كوب خل
* كوب شوربة لحمة
الطريقة:
1- اغسلي اللحمة كويس، وحطّيها لمدة 3 دقائق في ماء مغلي بحيث يُغطيها، وبعد كده ارفعيها من المية، وبعد كده اغسلي الأرز كويس وصفيه من المية بتاعته.
2- سخّني الماء في إناء على نار متوسّطة، وضيفي إليها اللحمة والخضار والبهارات والملح والفلفل.
3- أول ما المية تبدأ في الغليان، قللي درجة الحرارة، وسيبي اللحمة على النار لمدة 45 دقيقة، لغاية ما اللحمة تستوي تماماً، مع مراعاة إزالة الريم من سطح الشوربة كل ما يظهر، وأول ما اللحمة تستوي طلّعيها من الشوربة، وصفّي الشوربة كويس.
4- حطّي السمنة في إناء آخر على نار متوسطة، وحمّري الأرز لمدة 3 دقائق أو لغاية ما يتشرّب تماماً بالسمنة، وبعد كده ضيفي كوبين ونصف مية، وممكن تخلطي المية مع الشوربة، وتبّليه بشوية ملح، وسيبيه على النار لغاية ما يبدأ في الغليان، وبعد كده قلّلي النار، وغطّي الإناء وسيبيه لمدة 20 دقيقة أو لغاية ما تتأكّدي إنه استوى تماماً.
5- لتحضير التقلية، سخّني الزيت في طاسة على نار متوسطة، وبعد كده ضيفي عليه الثوم المفروم، وقلّبيه لمدة دقيقتين أو لغاية لونه ما يبقى ذهبي، وبعد كده شيلي نصف كمية الثوم دي على جنب، وضيفي الخل والشوربة وشوية ملح وفلفل على باقي الخليط اللي في الطاسة، وسيبيهم لغاية ما يغلوا، وبعد كده شيلي الخليط من على النار.
6- حطّي نصف كمية الثوم اللي شلتيها من التقلية في طاسة على نار متوسطة، وبعد كده ضيفي عليه صلصة الطماطم والخل والشوربة وملح وفلفل مع التقليب، وبعد كده سيبي الخليط لغاية ما يبدأ في الغليان، وبعد كده قلّلي درجة الحرارة وسيبيه لمدة 10 دقائق علشان الصلصة تتسبّك.
7- هاتي طبق التقديم وحطي فيه العيش المحمّص، وبعد كده رشّي عليه كمية صغيرة من التقلية اللي عملتيها، وسيبيه لمدة دقيقتين؛ علشان العيش يتشرّب منها، وبعد كده حطي طبقة من الأرز فوق العيش، وصبي عليه كوب شوربة، وبعد كده وزّعي قطع اللحمة فوق الوش، وآخر حاجة هتعمليها إنك تصبي صلصة الطماطم على حسب الكمية اللي إنتِ عايزاها.. وبالهنا والشفا.

*******************

ممكن تقدّمي معاهم خضراوات مشوية وسلطة خضراء
طبق المشويات المشكّلة
المقادير:
* كيلو لحمة ضاني للكباب (يفضّل تكون من منطقة الفخذ)
* 1/ 2 كيلو لحمة ضاني مفرومة للكفتة (يفضّل تكون نسبة الدهن فيه مش أكتر من 20%)
* 1/ 2 كيلو ريش ضاني
* 4 ثمرات بصل متوسطة الحجم
* 2 ملعقة كبيرة بقدونس مفروم ناعم
* ملح وفلفل
* عصير ليمون
* عصير طماطم
* زعتر
الطريقة:
1- ابشري البصل وضيفي إليه شوية خل وملح صغيرين علشان ينزّل المية بتاعته، وبعد كده صفّيه من المية كويس وسيبيه على جنب.
2- حطّي قطع اللحمة الخاصة بالكباب والريش في مية البصل، وتبليهم بالملح والفلفل، وضيفي معاهم شوية زعتر وعصير طماطم وعصير ليمون، وغطّيه وشيليه في الثلاجة لمدة 3 ساعات على الأقل علشان تتشرّب من التتبيلة.
3- ضيفي بشر البصل المُصفى والبقدونس إلى اللحمة المفروم للكفتة، وتبليها بالملح والفلفل.
4- حطّي قطع اللحم (الكباب) في الأسياخ، بس راعي إن عددها يكون قليل، وتكون في منتصف السيخ.
5- صبّعي اللحمة المفرومة على الأسياخ، مع الضغط عليها علشان حجمها يبقى متساوي.
6- حطّي أسياخ الكباب والكفتة مع الريش على الشواية، وسيبيهم لغاية ما يستووا، بس راعي إن كل حاجة منهم ولها توقيت في السوى، فلازم تكوني منتبهة كويس علشان الحاجة ما تنشفش منك، وكمان لما تحطي الكفتة على الشواية سيبيها لمدة دقيقتين، وبعد كده أقلبيها على الجنب التاني، علشان تتماسك كويس وما تفكش من السيخ، وعند التقديم ممكن تقدّمي معاهم خضراوات مشوية وسلطة خضراء.. وبالهنا والشفا.
الطرب
علشان تعملي الطرب بتجيبي المنديل (الغلاف الرقيق اللي بيُحيط بالمعدة)، وبتتبليه بنفس التتبيلة الخاصة بالكباب، وبعد كده بتحشيه بخلطة الكفتة، وتقفليه كويس من كل الجوانب، وبعد كده حطيه على الشواية لغاية ما يستوي.. وبالهنا والشفا.

*******************

بعد ما يطلع من الفرن سيبيه يبرد شوية وبعد كده قطّعيه وقدّميه
رقاق باللحمة المفرومة
المقادير:
* 1/ 2 كيلو رقاق
* 1/ 4 كيلو لحمة مفرومة معصّجة
* شوربة لحم ساخنة
* سمنة أو زبدة
* ملح وفلفل
الطريقة:
1- ادهني الصينية بالسمنة أو الزبدة على حسب الرغبة، وبعد كده اسقي الرقاق بالشوربة علشان يطرى، وابدئي في رص نصف كمية الرقاق في الصينية.
2- بعد كده افردي كمية اللحمة المفرومة على الرقاق، وبعدين رصّي باقي كمية الرقاق، وادهني سطح الرقاق بكمية بسيطة من السمن أو الزبدة، ودخّلي الصينية في فرن ساخن، وبعد شوية قللي درجة الحرارة عليه، وسيبيه لغاية ما الوش يحمر، وبعد كده طلّعيه من الفرن وسيبيه يبرد شوية وبعد كده قطّعيه وقدّميه.. وبالهنا والشفا.

ولغاية هنا خلصت وصفاتنا النهارده..
ومستنيين نعرف رأيك في الأصناف دي بعد ما تعمليها..
وكمان ابعتِ لنا لو عايزة تعرفي وصفة معينة..
وإحنا هنقدّم لك طريقتها في أسرع وقت..
واستنونا في العيد مع أطباق جديدة ووصفات أكتر..
وكل سنة وكلكم طيبين،،،،
*********************
للتعرف على مزيد من الوصفات الشهية
اضغط هنا "سفرة دايمة"
*********************