عزومة 15 رمضان

عصير جريب فروت
طبعاً العصير ده هيناسب الناس اللي بتعمل ريجيم في رمضان..
المقادير:
* عصير نصف حبة جريب فروت
* 2 معلقة كبيرة عسل "اختياري"
* معلقة صغيرة نعناع مفروم
* عصير ليمونة
* مكعبات ثلج
الطريقة:
اضربي كل المقادير اللي عندك في الخلاط، صبي العصير في كاسات العصير وضيفي إليه مكعبات الثلج.

**********************
سلطة الطحينة بالزبادي
سلطة الطحينة بالزبادي
المقادير:
* 1/2 علبة زبادي
* 4 معالق طحينة
* نص حزمة بقدونس مقطعة قطعاً صغيرة
* 3 فصوص ثوم مفروم
* ملح وفلفل وبهارات
* 3 معالق مية سخنة
الطريقة:
هاتي طبق السلطة وحطي فيه الطحينة وبعد كده ضيفي إليه المية والزبادي وقلبيهم بالمعلقة كويس، وبعد كده ضيفي إليهم الثوم والملح والفلفل والبهارات والبقدونس واستمري في التقليب لغاية ما تلاقي إن الطحينة بقت سايلة.

**********************
شوربة لسان العصفور بالجمبري
شوربة لسان العصفور بالجمبري
المقادير:
* 1/2 كيلو لسان عصفور
* 1/2 كوب زيت ذرة
* بصلة مقطعة قطعا صغيرة جدا
* 3 فصوص ثوم مفروم
* 1/4 كيلو جمبري صغير مقشر
* 2 كوب مية
* 2 ورقة لاورا
* عصير أربع ليمونات
* 6 أعواد كرفس مقطع قطعا صغيرة
* بهارات سمك
* ملح وفلفل وكمون
* قرن فلفل أحمر مقطع قطعا صغيرة
الطريقة:
1- هاتي الثوم والفلفل الأحمر وحطيهم في الهون ومعاهم الملح والكمون والبهارات واطحنيهم كويس مع بعض، وبعد كده ضيفي إليهم الليمون وقلبيهم مع بعض.
2- هاتي الجمبري واغسليه كويس وبعد كده رشي عليه الخليط السابق وسيبيه لمدة نص ساعة علشان يتبّل كويس.
3- شوّحي لسان العصفور في الزيت لغاية ما لونه يبقى ذهبي، وبعد كده اطفي البوتاجاز.
4- حمّري البصلة والثوم فى الزيت، وبعد كده ضيفى إليهم الجمبري والمية المذاب فيها بهارات السمك.
5- اتركي الخليط في الحلة على النار مع إضافة ورق اللاورا وأعواد الكرفس وعصير الليمون لمدة ربع ساعة وبعد كده اطفي البوتاجاز.. وبالهنا والشفا.

**********************
بطاطس بالجمبري والكاليماري
بطاطس بالجمبري والكاليماري
المقادير:
* كيلو باذجان رومي
* 1/2 كيلو بطاطس
* بصلة مفرومة ناعم
* 5 فصوص ثوم مفروم ناعم
* قرن فلفل أحمر مقطع قطعا صغيرة
* 1/4 كيلو بروكلي
* زيت زيتون
* ملح و فلفل أسود وكمون وبهارات
* 1/2 كيلو جمبري متوسط الحجم
* خليط من الريحان وعيدان البصل الأخضر
* 1/2 كيلو كاليماري مقطع قطعا في حجم الجمبري
* 1/4 كوب جبنة موتزاريللا
* 1/2 كوب خليط من الدقيق والبقسماط
* زيت للتحمير
الطريقة:
1- هاتي الثوم والفلفل الأحمر وحطيهم في الهون ومعاهم الملح والكمون والبهارات واطحنيهم كويس مع بعض، وبعد كده ضيفي إليهم الليمون وقلبيهم مع بعض.
2- هاتي الجمبري والكاليماري واغسليهم كويس وبعد كده اخلطي كل واحد لوحده بالخلطة اللي إنتِ عملتيها وسيبيهم لمدة نص ساعة علشان يتبّلوا كويس.
3- قطعي الباذنجان والبطاطس إلى مكعبات صغيرة وشوّحيهم مع البروكلي في الزيت لمدة ربع ساعة.
4- حطي شوية زيت زيتون في حلة وحطيهم على النار وبعد كده ضيفي إليهم البصل وقلبيهم مع بعض لمدة عشرة دقائق وبعد كده ضيفي إليهم الثوم وقلبيهم مع بعض على النار لغاية ما لونهم يبقى ذهبي ضيفي إليهم الملح الفلفل.
5- بعد كده ضيفي إليهم الجمبري وقلبيهم مع بعض لغاية ما لون الجمبري يبقي برتقالي، وبعدين ضيفي عليه خليط الريحان وعيدان البصل ألاخضر.
6- ضيفي الكاليماري إلى الجمبري وقلبيهم مع بعض لمدة ربع ساعة وبعد كده ضيفي إليهم الباذنجان والبطاطس وقلبيهم على النار لمدة عشرة دقائق.
7- بعد مرور العشر دقائق ضيفي إليهم عصير الطماطم وزيت الزيتون وقلبيهم على النار.. هاتي صينية فرن وحطي فيها كل الحاجات اللي فاتت ورصّي عليها من على الوش الطماطم والجبنة الموتزاريللا ورشي شوية دقيق وبقسماط وزيت الزيتون.
8- شغلي الفرن على درجة حرارة متوسطة ودخلي الصينية فيه لمدة نص ساعة أو لغاية ما وشها يحمر، وبعد كده خرجيها وقدميها.. وبالهنا والشفا.

**********************
سلطة فواكه
سلطة فواكه
المقادير:
* ثمرة تفاح
* 5 تمرات برتقال
* ثمرة كيوي
* ثمرة كمثرى أو جوافة
* ثمرة مانجو
* 6 ثمرات فراولة
* 6 حبات عنب أخضر
* 6 حبات عنب أحمر
* عصير ليمونة
الطريقة:
هاتي البرتقال واعصريه، وقطعي التفاح والكيوي والكمثرى والمانجو والبرتقال لمكعبات متوسطة الحجم، وقطعي الفراولة بالنصف.. وبعدين اخلطي كل الحاجات دي مع بعضها وحطيهم في طبق كبير وضيفي إليهم عصير البرتقال وعصير الليمون.

**********************
وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام

*********************
للتعرف على مزيد من الوصفات الشهية
اضغط هنا "سفرة دايمة"
*********************