سمك فيليه بالمايونيز في عزومة "سفرة دايمة"

يوم الجمعة بتحلى اللمة على الأكل..
علشان كده حبينا نشاركك اللمة الحلوة دي..
ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا..
ونقدّم لك كل يوم جمعة اقتراح لعزومة مكوّنة من: العصير، والطبق الرئيسي، وطبق السلطة، وطبق الحلو..
علشان تنوّعي لعيلتك.. وتبهريهم بأكلاتك الجامدة..
تعالي بقى نشوف هنعمل إيه النهارده..
***************
كوكتيل كله فيتامينات
كوكتيل فواكه
المقادير:
2 ثمرة خوخ
1/4 بطيخة
تفاحة
ثمرة مانجا
4 معالق سكر
كوبين ونصف ماء
الطريقة:
1- اغسلي الفاكهة كويّس، وقطّعيها لمكعبات صغيّرة.
2- حطيهم في الخلاط مع إضافة السكر والمية، واضربيهم في الخلاط مع بعض، وبعد كده صفّيهم بالمصفى بتاعة العصير.
3- حطّي العصير في الثلاجة، وقدّميه ساقع.. وبالهنا والشفا.
***************
ممكن تزينيها بالبقدونس
سلطة الطحينة والبقدونس
المقادير:
2 كوب طحينة
4 فصوص ثوم مهروس
1/2 كوب زيت
عصير 3 ليمونات
ملح حسب الرغبة
2 معلقة كبيرة بقدونس
معلقة صغيرة زعتر
الطريقة:
1- اخلطي الطحينة مع الثوم، وضيفي ليها كمية صغيرة من المية والثوم والملح والزعتر وعصير الليمون، وقلّبيهم مع بعض كويس جداً.
2- حطّي الخليط في طبق التقديم، وزيّنيها بالبقدونس.. وبالهنا والشفا.
***************
طبق الشوربة ده ممكن تضيفي له كاليماري وجمبري
شوربة السمك بالجزر
المقادير:
1/2 كيلو سمك فيليه مقطّع مكعبات
4 معالق كبيرة زيت
بصلة مفرومة
كوب كرفس مقطّع
فصين ثوم مفرومين
3 معالق كبيرة دقيق
2 كوب طماطم مقطعة مكعبات
6 كوب مية
2 مكعب ماجي بالخضراوات
كوب بقدونس مفروم
كوب كزبرة خضرة مفرومة
3 أوراق لاورا
ملح وفلفل حسب الرغبة
جزرة مقطّعة حلقات
الطريقة:
1- سخّني نصف كمية الزيت في حلة، وشوّحي فيها قطع السمك، ولغاية ما تحسّي إنها بقت نصف سوى.
2- ضيفي باقي الزيت عليهم، وحطي البصل والكرفس والثوم، وقلّبيهم على النار.
3- بعد كده ضيفي الدقيق، وقلّبي كويس، وبعدين ضيفي قطع الطماطم والمية بعد ما تكوني دوّبتي فيها الماجي كويس، وقلّبيهم مع بعض كويس.
4- حطّي الكزبرة والبقدونس وشرائح الجزر وورق اللاورا والملح والفلفل، وسيبيهم على النار حتى الغليان.
5- بعد ما الشوربة تغلي سيبيها لمدة 20 دقيقة على نار هادية.
6- صبّي الشوربة في أطباق التقديم، وزيّنيها بالكزبرة أو البقدونس.. وبالهنا والشفا.
وعلى فكرة طبق الشوربة ده ممكن تضيفي له قطع من الكاليماري والكابوريا والجمبري.
***************
طبق سمك طعمه لذيذ
سمك فيليه بالمايونيز والمسطردة
المقادير:
6 قطع سمك فيليه
كوب ونصف بقسماط مطحون
1/2 معلقة ملح
1/4 معلقة فلفل أحمر مطحون
1/8 معلقة زعتر
1/8 معلقة فلفل أسود
معلقة بقدونس ناشف
1/3 كوب مسطردة
1/3 كوب مايونيز
زيت للقلي
الطريقة:
1- أحضري طبق، وحطّي فيه البقسماط والملح والفلفل الأحمر والزعتر والبقدونس والفلفل الأسود، وقلّبيهم مع بعض.
2- اخلطي المايونيز والمسطردة كويس جداً مع بعض في طبق غويط.
3- أحضري الطاسة اللي هتقلي فيها السمك، وحطّي فيها كمية الزيت المناسبة للقلي، وسيبيها على النار لغاية ما الزيت يسخن.
4- أحضري قطع السمك، وابدئي حطّي واحدة واحدة في خليط المايونيز والمسطردة، وبعد كده حطيهم في خليط البقسماط اللي عملتيه بحيث إن السمك يتغطى من الناحيتين بالبقسماط.
5- وفي الآخر حمّري قطع السمك في الزيت، وطلّعيهم على مناديل ورقية، وبعد كده حطيهم في طبق التقديم.
***************
كإنك عملتي تورتة جيلي
جيلي بالبسكويت
المقادير:
علبة ونصف بسكويت سادة "ماري أو أي نوع تحبيه"
ربع كيلو زبدة
ربع كوب سكر
علبة جيلي
كريم شانتيه للتزيين
الطريقة:
1- اضربي البسكويت في الخلاط، وحطّي عليه الزبدة والسكر.
2- بعد كده حطي خليط البسكويت في صينية، ودخليه الفرن لمدة خمس دقائق.
3- بعد كده حطي الجيلي في حلة، وحطي عليه كوبين مية، وسيبيه على النار مع التقليب المستمر لغاية ما تحسّي إن الجيلي كله ذاب في المية.
4- شيلي الجيلي من على النار وسيبيه لغاية ما يبرد.
5- حطي الجيلي على خليط البسكويت؛ بحيث يبقوا طبقتين؛ طبقة البسكويت اللي تحت وطبقة الجيلي، وبعد كده دخليهم الثلاجة، وسيبيهم لغاية ما الجيلي يجمد، وبعد كده طلعيه من الثلاجة، وقطّعيهم وحطيهم في أطباق التقديم، وممكن تزيّني الطبق بالكريم شانتيه.. وبالهنا والشفا.

وفي النهاية نتمنّى إن عزومة النهارده تكون عجبتِك..
وتجرّبي كل الوصفات وتبعتِ تقولي لنا على النتيجة..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...
"ورينا شطارتِك"
وإلى اللقاء في العزومة الجاية،،،