شوربة السمك وآيس كريم الزبادي في عزومة "سفرة دايمة"

يوم الجمعة بتحلى اللمة على الأكل..
علشان كده حبينا نشاركك اللمّة الحلوة دي..
ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا..
ونقدّم لك كل أسبوع اقتراح لعزومة مكوّنة من العصير والطبق الرئيسي وطبق السلطة وطبق الحلو..
علشان تنوّعي لعيلتك.. وتبهريهم بأكلاتك الجامدة..
تعالي بقى نشوف هنعمل إيه النهارده..

**************
كوكتيل الفواكه
عصير كوكتيل الفواكه
المقادير:
* علبة أناناس مقطع ومحفوظ بميّته
* كوب عصير برتقال مركز
* 3 أكوب مية
* 6 ثمرات موز مقطع لقطع صغيرة
* سكر
الطريقة:
اخلطي كل المكونات في الخلاط مع بعضها، وبعد كده حطيه في الثلاجة، وعند التقديم طلعيه وصبيه في الكوبايات.. وبالهنا والشفا.

**************
سلطة التونة بالكرفس والفجل
سلطة التونة بالكرفس والفجل
المقادير:
* 3 أكواب تونة مصفاة من الزيت
* 8 ثمرات فجل صغيرة مقطعة لشرائح
* 2 عود كرافس مقطعين لقطع صغيرة
* 1/4 كوب بقدونس مفروم
* 2 معلقة كبيرة عصير ليمون
* معلقة كبيرة زيت زيتون
* ملح وفلفل
الطريقة:
1- هاتي طبق غويط، واخلطي فيه التونة والفجل والبقدونس والكرافس وعصير الليمون وزيت الزيتون والملح والفلفل، وقلبيهم مع بعض كويس.
2- حطي طبق السلطة في الثلاجة، وطلعيه عند التقديم وممكن تقدمي معاها عيش محمّص.. وبالهنا والشفا.

**************
شوربة السمك والجندوفلي
شوربة السمك والجندوفلي
المقادير:
* 1/2 كيلو سمك فيليه مطقع لمكعبات
* 1/4 كيلو جندوفلي
* معلقة كبيرة زيت زيتون
* 2 عود كرات مقطع لشرائح صغيرة
* فصين ثوم مفرومين
* كوب بقدونس مفروم
* رأس بصلة خضراء صغيرة مقطعة لشرائح
* عصير نصف كيلو طماطم
* 3 معالق كبيرة صلصة طماطم
* 1/4 معلقة فلفل أحمر مطحون
* 1/2 كوب زيتون للتقديم
* زنجبيل
* ملح
الطريقة:
1- شوّحي الكرات والثوم والبصل الأخضر في الزيت على نار متوسطة مع التقليب لمدة 3 أو 4 دقايق لغاية ما تحسي إنهم استووا.
2- بعد كده ضيفي الطماطم وصلصلة الطماطم والفلفل الأحمر والملح والزنجبيل، وسيبيهم على النار لغاية ما يغلوا، وبعد كده وطّي النار، وسيبيهم على نار هادية لمدة 15 دقيقة.
3- بعد كده بتضيفي السمك والجندوفلي، وقلبيهم بالراحة لغاية ما تحسي إن السمك استوى والجندوفلي فتح معاكي، بعد كده ضيفي البقدونس وقلّبي الشوربة كويس على النار، وبعد كده قدّميها مع الزيتون.. وبالهنا والشفا.

**************
سمك فيليه وباذنجان مشوي
سمك فيليه مشوي مع صوص الزنجبيل والكسبرة
المقادير:
* كيلو سمك فيليه
* 2 معلقة كبيرة صويا صوص "هتلاقيه في أي سوبر ماركت"
* 1 ثمرة باذنجان صغيرة "حوالي نصف كيلو" مقطعة حلقات
* 1 حبة فلفل حامي مقطع لشرائح صغيرة
* معلقة كبيرة زنجبيل طازة مفروم
* 1/2 كوب كسبرة طازة
* 2 معلقة كبيرة خل
* ملح وفلفل
* زيت
الطريقة:
1- سخني الشواية على درجة حرارة متوسطة.
2- اخلطي معلقتين زيت مع معلقة من الصويا صوص مع الملح والفلفل بس خلي بالك إنك ماتزوديش الملح علشان الصويا صوص طعمه حادق، يعني ممكن تحطي ربع معلقة صغيرة ملح، ونفس الكمية من الفلفل.
3- ادهني الباذنجان والسمك بخليط الزيت والصوص.
4- ادهني سطح الشواية بكمية صغيرة من الزيت، وحطي عليها شرائح السمك والباذنجان، وسيبيهم لغاية ما تحسي إن السمك والباذنجان استووا ولونهم اغمقّ شوية، يعني بتسيبيهم لمدة من 3 - 5 دقايق، وبعد كده اقلبيهم على الوش التاني.
5- اخلطي الخل والزنجبيل والفلفل الحامي والكسبرة والمعلقة الباقية من الصويا صوص مع بعض، ورشيهم فوق السمك والباذنجان المشوي عند التقديم.. وبالهنا والشفا.

**************
آيس كريم الزبادي بالموز وصوص الشيكولاتة
آيس كريم الزبادي بالموز مع صوص الشيكولاتة
المقادير:
* 2 كوب زبادي "يفضل إنك تحطيه في الفريزر قبل الاستخدام"
* 1/4 كوب لوز محمص ومفروم "ممكن تستبدليه بسوداني غير مملّح"
* 3 معالق كبيرة بودرة كاكاو من غير سكر
* 2 موزة مقطعة شرائح
* 1/4 كوب سكر
* 1/4 كوب مية
الطريقة:
1- في طاسة صغيرة اخلطي السكر مع الكاكاو وضيفي عليهم المية بالتدريج، وقلّبيهم كويس على النار وسيبيهم لغاية ما يغلوا، وبعد كده وطّي النار مع الاستمرار في التقليب لغاية ما تحسي إن الخليط بقى سميك، بعد كده اطفي النار وسيبي الخليط على جنب لغاية ما يبرد.
2- هاتي الزبادي وقسّميه على كوبايات التقديم، وبعد كده حطي عليه شرائح الموز، وعلى الوش حطي صوص الشيكولاتة اللي عملتيه واللوز.. وبالهنا والشفا.

وفي النهاية نتمنّى إن عزومة النهارده تكون عجبتِك..
وتجرّبي كل الوصفات وتبعتي تقولي لنا على النتيجة..
وكمان لو عندك وصفة حلوة عايزة تشتركي بيها معانا..
ممكن تبعتيها لنا على لينك...
"ورينا شطارتِك"
وإلى اللقاء في العزومة الجاية،،،