السلام عليكم ورحمه الله وبركاته أنا عندى 22 سنه وشغال الصبح مدرس كمبيوتر وبعد الظهر بشتغل ف نادي طبعا مش عارف ابدا المشكله منين او المشاكل عموما بس هاختار جزء اتكلم عنه بما انى داخل ف 23 فأمي شايفه انى لازم اخطب وبابا كمان تقريبا العيله كلها شايفه ومجمعه على ده وانا ماعنديش حاجه تمنعنى بس الضغط بيبقى تقيل من ناحيه بنت عمك مننا وعلينا او بنت عمك التانيه وباباها ميت وانت اولى بدل ماحد غريب يدخل عليهم ويبهدلها ومن ناحيه بنت عمتى فاقلتلهم انى مابفكرش ف الموضوع دلوقتى وده مش حل نهائى انا عارف بس انا شفت كذا واحده من بره العيله وهما مش هايعترضوا على اللى اختاره بس خايف اختار غلط الاختيار فى حد ذاته انى اخد من بره ولو حصلت مشاكل لاقدر الله او اختارت غلط هايقولوا ماحنا قلنالك خد من العيله وخايف انى لو خدت من العيله تحصل مشاكل سعتها مش هاقدر اتكلم لانها هاتكبر ومابين الاختيارين مش عارف اختار خصوصا لو عشت التجربتين قدامك . لو كنت انا ميال شويه لبنت عمى اللى باباها متوفى لانه كان قريب منى بس هيه لسه فى 1 ثانوى وبعدين خايف تكون واخده طبع امها لانها كانت واخده عمى وعازلاه عننا وبينا وبينها خلافات هابقى اقول عليها مرة تانيه بس بردو هيه كمان تقريبا واخده طبع امها ديه حتى لما بتبقى نازله عالسلم مابتسلمش عليا قلت يمكن عشان لابسه النقاب وكده بتتكسف اما الاتنين التانيين فهى واحده ساكنه معانا ف البيت منقبه بردو ومخلصه وفى سنى وواحده فى 3 ثانوى انا روحت وقابلت عمها وكلمت باباها بس قالى لما تخلص ثانوى وصليت استخارة علشان اعرف مافيش حاجه ظهرت مش عارف اعمل ايه ساعات كتير بفكر انى اقفل الموضوع كله وساعات بحس انى عايز اكمله بس مش عارف مع مين . ومابين الاختيارين بيظهرلى اختيار تالت بقفل الموضوع او تاجيله الى ما لا نهايه صديقنا العزيز أولاً بالنسبة لعمرك لسه الحياة أمامك للبحث عن شريكة حياتك بس فى نفس الوقت أتصور أن البحث عن زوجة كاملة هو أمر صعب للغاية، لذا حدد أهم الصفات التي ترى أنها هامة بالنسبة لك سواء كانت هذه الصفات موجوده بأقاربك فأن وجدت يبقى خير بها ونعمة، وإن لم تجدها فعليك البحث في الخارج حتى تجد الفتاة اللى تريحك طول العمر بغض النظر عن وجهة نظر أهلك، الحياة الزوجية لا تخلو من المشاكل سواء كانت صغيرة أو كبيرة وهذا امر طبيعي بين الأزواج؛ لأنه رباط بين شخصين مختلفين ولا تنسى حديث رسول الله صلى الله عليه وسلم ( تنكح المرأة لأربع لمالها ،ولحسبها، ولجمالها، ولدينها ، فاظفر بذات الدين تربت يداك)، إنك تتزوج من العائل أمر مستحب ولكن هل تلك الفتاة هي اللي أنت بتتمناها والأجابة على السؤال ده إنت لوحدك اللي هاتقدر تجاوب عليه!
