فكّريه إنه حذرِك منها.. فإزاي دلوقتي بيصدق ألاعيبها

أنا مرتبطة، وبنحب بعض جداً بس المشكلة إني كان ليّ واحدة صاحبتي، كنا رُوحنا فى بعض وصحاب جداً جداً، وهو ياما حذرني منها وماكنتش بسمع كلامه، وياريتنى سمعت كلامه..
المهم هي مش بتحب اللي أنا بكلمه ده خالص، وكانت بتحاول توقع بيننا كتير، وكانت عايزاني أسيبه وأكلم واحد هي تعرفه وأنا ماكنتش راضية طبعاً.. بدأت تبعت رسالة للي أنا مرتبطة بيه، وبتقول عليّ إني مش كويسة! وطبعا ماكُناش نعرف مين اللي بيبعت،وجِبت الرقم اللى بَعت له الرسالة وخليتها تكلمه، وقال لها: "أيوه يا.." ونطق اسمها فعرفت إنها هي اللي ورا اللي بيحصل؛ فبعدت عنها وقلت لها: "إنتِ انسانة مش محترمة.." وكده..
حبّت تنتقم مني، وفضلت تبعت له رسايل كتير وحشة عني، وقالت له إني كنت باكلّم ولاد، وخلّتْ واحد يكلّم اللي مرتبطة بيه ويقول له هي نفسها كانت بتكلمني وإني كنت مرتبطة بيه وبولاد كتير، وقال له حاجة تخليه يصدقه.. وهي بقى صاحبتي دي شغالة على كده لحد دلوقتي، وساعات تسكت وتخلي ولد يكلم اللي مرتبطة بيه، ويقول له إنه كان بيكلمني ومش عارفة أعمل إيه وهو بيتغير معايا ويقول لي: "معقولة دول كلهم كدابين؟" وبيتغير معايا، ومش عارفة أتصرف إزاي..
ياريت تساعدونى
الحيرانة

لو عايز تفضفض لنا دوس هنا