أستغفر الله.. روشنة في رمضان!!

"فتكات" الشهيرة ب"فيفي" فتاة جامعية أصرّ والدها أن يسميها على اسم جدتها التي توفّيت في نفس عام ولادتها، ولكن مشكلة فتكات (فيفي) ليست في اسمها؛ بل إنها تتصرف كالتالي:
عايشة حياتها في الجامعة طول بعرض، بتلبس بنطلونات ضيقة وجوبات قصيرة والتيشرتات بنص كم، وبتحط ماكياج صارخ، وواخدة راحتها على الآخر.. فيفي فيفي يعني..
وأول يوم في رمضان الحاجة فيفي تروح الجامعة لابسة واسع وطويل ومغطية شعرها ووشها بلونه الطبيعي بعيداً عن الألوان الصناعية.. إيه اللي حصل يا فيفي وفين الروشنة؟ أستغفر الله روشنة في رمضان؟!!
فيفي بتصوم وبتصلي وبتقرأ في المصحف كمان، ده كله في رمضان، وأول ما بيخلص رمضان بترجع فيفي لعادتها القديمة، يعود الشيطان من فترة الإجازة بتاعته بعد رمضان، وتعود فيفي أدراجها معه..
والسؤال الآن: أليس رب رمضان هو رب بقية الشهور؟ أم أن الله يرانا في رمضان فقط؟ أم ماذا؟
يا ست فيفي رمضان مش عرض، رمضان نظام.. أيوه رمضان نظام المفروض إنه مستمر معانا طول السنة مش عرض لفترة محدودة تلاتين يوم وبعدين كأننا لا رحنا ولا جينا..
فيفي محتاجة تعرف الهدف من الصيام وهو تحقيق التقوى في نفس المسلم {يا أيها الذين آمنوا كُتب عليكم الصيام كما كُتب على الذين من قبلكم لعلكم تتقون}.. "تتقون" يعني يبقى عندكم خوف من ربنا وتعبدوه وتتبعوا أوامره ونواهيه بعد رمضان ولحد رمضان اللي بعده، مش شهر ونرجع زي ما كنا.
إلى كل "فيفي" أنصحك بأن تستغلّي فرصة رمضان إنك عملتِ لنفسك جو جديد وشخصية جديدة وقدرت تقاومي رغبتك في الميك أب وأحدث الموضات، كمّلي بقى على كده وخلي ربنا يحبك ويتقبل صيامك وعيشي حياتك زي ما إنت عايزة؛ بس عيشيها صح بعيد عن كل حاجة تغضب ربنا، وربنا يرضى عنك وعننا آمين.
*********************
للتعرف على مزيد من سلوكياتنا في رمضان
اضغط هنا "اللهم إني صائم"
*********************